داۋرەن ابايەۆ ەلىمىزدەگى اشىق مينيسترلىك پەن اكىمدىكتى اتادى

استانا. قازاقپارات - بۇگىن ق ر پرەزيدەنتى جانىنداعى ادام قۇقىقتارى جونىندەگى كوميسسيانىڭ وتىرىسىندا اقپارات جانە كوممۋنيكاتسيالار ءمينيسترى داۋرەن ابايەۆ حالىق الدىندا اشىق مينيسترلىك پەن اكىمدىكتى اتادى، دەپ حابارلايدى قازاقپارات ءتىلشىسى.

«اقپارات جانە كوممۋنيكاتسيالار مينيسترلىگى مەملەكەتتىك ورگانداردىڭ «اشىق ۇكىمەت» پورتالدارىندا جانە رەسمي ينتەرنەت-رەسۋرستارىندا جۇرگىزەتىن قىزمەتىنىڭ تيىمدىلىگىنە جىل سايىن باعالاۋ جۇرگىزەدى. 2017-جىلدىڭ ناتيجەسى بويىنشا «مەملەكەتتىك ورگاننىڭ اشىقتىعى» باعىتىندا كوشباسشىلار شىعىس قازاقستان وبلىسىنىڭ اكىمدىگى مەن ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى بولدى. ال اۋتسايدەرلەردىڭ قاتارىندا جامبىل وبلىسىنىڭ اكىمدىگى بار»، - دەدى مينيستر.

سونىمەن قاتار داۋرەن ابايەۆ حالىقتىڭ حاباردار بولۋىن ارتتىرۋ ماقساتىندا 2016-2017-جىلدارى زاڭ نورمالارىن جانە «اشىق ۇكىمەت» پورتالدارىنىڭ مۇمكىندىكتەرىن تۇسىندىرۋگە باعىتتالعان دارىستەر، سەمينارلار مەن ۆەبينارلار تسيكلى وتكىزىلگەنىن ايتتى. ولاردى «MediaNet»  حالىقارالىق جۋرناليستيكا ورتالىعى، حالىقارالىق كوممەرتسيالىق ەمەس قۇقىق ورتالىعى، ماڭعىستاۋ وبلىسىنىڭ ازاماتتىق اليانسى سىندى ۇكىمەتتىك ەمەس ۇيىمدار ۇيىمداستىردى.

«مۇنان بولەك، «ۇلتتىق اقپاراتتىق تەحنولوگيالار ورتالىعى» ا ق مەملەكەتتىك ورگانداردىڭ جاۋاپتى تۇلعالارىن «اشىق ۇكىمەت» پورتالدارىندا جۇمىس ىستەۋگە وقىتۋ سەمينارلارىن تۇراقتى نەگىزدە وتكىزەدى. تەلەۆيدەنيە مەن الەۋمەتتىك جەلىلەردە «اشىق ۇكىمەت» پورتالدارىنىڭ جۇمىسى تۋرالى ءتۇسىندىرۋ روليكتەرىن روتاتسيالاۋ ىسكە قوسىلدى»، - دەدى ول.

ايتا كەتەيىك، ەلىمىزدە اقپاراتقا قولجەتىمدىلىكتى قامتاماسىز ەتۋدەگى اقپاراتتىق-كوممۋنيكاتسيالىق تەحنولوگيالاردىڭ ەرەكشە ءرولىن ەسكەرە وتىرىپ، «اشىق ۇكىمەت» پورتالدارى قۇرىلعان. سونىمەن قاتار «اشىق ۇكىمەت» تۇجىرىمداماسى اياسىندا «اشىق دەرەكتەر»، «اشىق بيۋجەتتەر»، «اشىق ن ق ا»، «اشىق ديالوگ» جانە «مەملەكەتتىك ورگاندار قىزمەتىنىڭ تيىمدىلىگىن باعالاۋ» سياقتى ينتەرنەت-پورتالدار جۇمىس ىستەيدى.