سيندزو ابە ءۇشىنشى رەت جاپونيانىڭ پرەمەر-ءمينيسترى بولىپ سايلاندى

توكيو. قازاقپارات - بەيسەنبى كۇنى سيندزو ابە جاپونيا ليبەرال-دەموكراتيالىق پارتياسىنىڭ سايلاۋىندا جەڭىسكە جەتىپ، ەلدىڭ پرەمەر-ءمينيسترى لاۋازىمىن ساقتاپ قالدى.

ابە بۇل قىزمەتكە ءۇشىنشى رەت سايلانىپ وتىر، دەپ حابارلايدى قازاقپارات Kyodo سايتىنا سىلتەمە جاساپ.

ابە ءوزىنىڭ جالعىز قارسىلاسى، بۇرىنعى قورعانىس ءمينيسترى سيگەرۋ يسيبانى (254 داۋىس) باسىپ وزىپ، 553 داۋىس جينادى.

ابە سايلاۋدان كەيىن بىردەن قىزمەتىنە كىرىستى. ول كونستيتۋتسياعا نازار اۋداراتىن ۋاقىت كەلگەنىن، تابيعي اپاتتىڭ الدىن الاتىن جاڭا شارالار جاساۋ كەرەكتىگىن، سونداي-اق ديپلوماتياعا كوڭىل ءبولۋ قاجەتتىگىن اتاپ ءوتتى.

بۇدان بولەك، سيندزو ابە ۇكىمەتتە جانە پارتيا باسشىلىعىندا اۋىس-ءتۇيىس جۇرگىزۋدى جوسپارلاپ وتىر.

پرەمەر-مينيستر بۇل ماسەلەلەرمەن ب ۇ ۇ باس اسسامبلەياسىنىڭ وتىرىسىنا قاتىسىپ كەلگەننەن كەيىن، قىركۇيەكتىڭ سوڭىندا اينالىسپاق.

ابە ەلدىڭ پرەمەر-ءمينيسترى قىزمەتىنە 2012-جىلى سايلانعان ەدى، 2015-جىلى ول قايتا سايلاندى. ەگەر ابە جاپونيانىڭ ۇكىمەت باسشىسى لاۋازىمىندا 2021-جىلدىڭ قىركۇيەگىنە دەيىن قالسا، ول وسى قىزمەتتە ەڭ ۇزاق وتىرعان ساياساتكەر رەتىندە تاريحتا قالادى.

قازىرگى تاڭدا بۇل رەكورد جاپونيانىڭ 11-پرەمەر-ءمينيسترى بولعان تارو كاتسۋراعا تيەسىلى. ول بيلىكتە 2886 كۇن وتىرعان.