شەتەل ونەرپازدارى قۇرمانعازى كۇيلەرىن ورىنداۋدان سايىسقا تۇسەدى
شارانى نەگىزگى ۇيىمداستىرۋشى - قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترى. الماتى مەن استانادا وتەتىن ءدۇبىرلى شاراعا رەسەي، قىرعىز رەسپۋبليكاسى، وزبەكستان جانە وزگە دە ەلدەردەن ساحنا ساڭلاقتارى كەلەدى.
شەتەلدىك ونەر يەلەرى مەن وتاندىق كۇيشىلەر اراسىندا كۇيتارتىس جوسپارلانعان. دومبىرا تارتىسى قۇرمانعازىنىڭ «بالبىراۋىن» كۇيىنەن باستاۋ الىپ، «اداي» كۇيىمەن اياقتالادى.
استانالىقتار ءتورت كۇن بويى تەگىن ءداستۇرلى مۋزىكا تۋىندىلارىن تىڭداپ، كۇمبىرلەگەن كۇيمەن قۇلاق قۇرىشىن قاندىرا الادى.
«رۋحاني جاڭعىرۋ» باعدارلاماسى اياسىندا ۇيىمداستىرىلىپ وتىرعان ءىس-شاراعا «يۋنەسكو» شتاب-پاتەرىنەن، «تۇركسوي» ۇيىمىنان، رەسەي فەدەراتسياسىنان ارنايى وكىلدەر، جاقىن جانە الىس شەت ەلدەردىڭ جەتەكشى ءداستۇرلى ورىنداۋشىلارى، قىرعىزستان، رەسەي، وزبەكستان رەسپۋبليكالارىنىڭ ونەر ۇجىمدارى جانە ەلىمىزدىڭ «اكادەميالىق» دارەجەسى بار وركەسترلەرى قاتىسادى.
ءۇش كۇنگە سوزىلاتىن شارادا «1- رەسپۋبليكالىق ءداستۇرلى ورىنداۋشىلار فورۋمى»، رەسپۋبليكامىزدىڭ، جاقىن شەت ەلدەردىڭ كۇيشىلىك مەكتەبى مايتالماندارىنىڭ كونسەرتى، رەسپۋبليكامىزدىڭ، جاقىن شەت ەلدەردىڭ ۇلت اسپاپتار وركەسترلەرىنىڭ كونسەرتى، وركەسترلەر شەرۋى جوسپارلانعان.
سونىمەن قاتار، مەملەكەتتىك سىيلىقتىڭ لاۋرەاتى، سۋرەتشى شاحان ماحانبەتوۆ پەن تانىمال فوتو ءتىلشى رافحات حالەلوۆتىڭ «كۇي جانە كۇيشى» اتتى فوتوكورمەسى ۇيىمداستىرىلماق.