مەملەكەتتىك ورگانداردىڭ ءبىرىڭعاي سايتى قۇرىلادى - داۋرەن ابايەۆ

استانا. قازاقپارات - قازاقستاننىڭ مەملەكەتتىك ورگاندارىنىڭ ءبىرىڭعاي سايتى قۇرىلادى. بۇل تۋرالى بۇگىن ق ر پرەزيدەنتى جانىنداعى ادام قۇقىقتارى جونىندەگى كوميسسيانىڭ وتىرىسىندا اقپارات جانە كوممۋنيكاتسيالار ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.

«اقپاراتقا قول جەتكىزۋ تۋرالى» زاڭعا سايكەس بارلىق ورتالىق مەملەكەتتىك جانە جەرگىلىكتى اتقارۋشى ورگانداردىڭ رەسمي ينتەرنەت-رەسۋرستارىنىڭ بولۋى مىندەتتى. بۇگىنگى كۇنى ولاردىڭ سانى شامامەن 300 ءدى قۇرايدى. سونىمەن قاتار وسى رەسۋرستاردى مونيتورينگىلەۋ اياسىندا جىل سايىن مەملەكەتتىك ورگانداردىڭ اشىقتىعى ساپاسىنا جانە حالىقارالىق رەيتينگتەرگە اسەر ەتەتىن ءبىرقاتار پروبلەمالار انىقتالدى»، - دەپ اتاپ ءوتتى مينيستر.

ونىڭ ايتۋىنشا، مەملەكەتتىك ورگانداردىڭ رەسۋرستارىنا ورنالاستىرىلعان اقپاراتتىڭ وزەكتى بولماۋى نەمەسە تولىق ەمەستىگى ءتان. مۇنان بولەك، بەلسەندى ەمەس سىلتەمەلەرى، اقپاراتتىڭ دۇرىس كورسەتىلمەۋى كەزدەسەدى. كورۋ قابىلەتى ناشار ادامدار ءۇشىن قىزمەتى تولىق ىسكە اسىرىلمايدى. بارلىق تالاپ ەتىلەتىن اقپاراتتىڭ قازاق جانە اعىلشىن تىلىندەگى نۇسقالارى بولماي جاتادى. ال جىل سايىن مەملەكەتتىك ورگانداردى حوستينگ، كونتەنت، سەرۆەرلىك جابدىقتار، باعدارلامالىق قامتىلىمدار جاعىنان قامتاماسىز ەتۋگە مول بيۋجەت قاراجاتى جۇمسالادى.

«اقپاراتپەن قامتاماسىز ەتۋدەگى بارلىق پروبلەمانى شەشۋ ءۇشىن كەشەندى ءتاسىل قاجەت ەكەنىن تۇسىنەمىز. وسى ماقساتتا مينيسترلىك مەملەكەتتىك ورگانداردىڭ ءبىرىڭعاي سايتىن قۇرۋ جۇمىسىن جۇرگىزىپ جاتىر. ءبىز بۇل رەتتە  ۇلى بريتانيانىڭ تاجىريبەسىنە سۇيەنىپ وتىرمىز. سونىمەن قاتار كانادا، جاڭا زەلانديا سياقتى ەلدەر دە ءبىرىڭعاي رەسۋرس قاجەت دەپ ەسەپتەيدى. ازاماتتار ءۇشىن ىڭعايلى «ءبىر تەرەزە» سەرۆيسى پايدالانۋشىعا قاجەتتى اقپاراتتى ءبىر رەسرۋستان تابۋعا مۇمكىندىك بەرەدى»، - دەدى داۋرەن ابايەۆ.

سونداي-اق ءمينيستردىڭ دەرەگىنشە، ءبىرىڭعاي سايتتى قۇرۋ جىل سايىن اقپاراتتىق رەسۋرستاردى ازىرلەۋ مەن سۇيەمەلدەۋگە بولىنەتىن شىعىستاردى ەكى ەسە قىسقارتۋعا مۇمكىندىك بەرەدى. مەملەكەتتىك ورگاندار ورنالاستىراتىن اقپاراتتى بىرىزدەندىرۋدى قامتاماسىز ەتەدى.

«جوبانى ىسكە اسىرۋ ءۇشىن ارينە، زاڭنامانى وزگەرتۋگە، ديزايندى، قۇرىلىمدى، كونتەنتتى پىسىقتاۋعا ۋاقىت تالاپ ەتىلەدى. ءبىراق، قورىتىندىسى بويىنشا ءبىز ايتارلىقتاي ناتيجە كۇتەمىز. 2019-جىلدىڭ ىشىندە ورتالىق مەملەكەتتىك ورگانداردىڭ، 2020-جىلدىڭ ىشىندە جەرگىلىكتى اتقارۋشى ورگانداردىڭ ينتەرنەت-رەسۋرستارىن ءبىرىڭعاي پلاتفورماعا كوشىرۋ جوسپارلانۋدا»، - دەدى ول.