ۇ ق ش ۇ- عا مۇشە مەملەكەتتەر ءىرى اسكەري وقۋ-جاتتىعۋعا دايىندالۋدا
بۇگىن ماسكەۋدە ۇجىمدىق قاۋىپسىزدىك تۋرالى شارت ۇيىمى بىرلەسكەن شتابىنىڭ باستىعى، گەنەرال-پولكوۆنيك اناتولي سيدوروۆتىڭ قاتىسۋىمەن بريفينگ وتكىزىلىپ، وعان تەلەكوپىر فورماتىندا استانا، بىشكەك، مينسك جانە ەريەۆان قوسىلدى.
بريفينگتە ءسوز سويلەگەن اناتولي سيدوروۆ 1- قازان مەن 2- قاراشا ارالىعىندا وتەتىن «جاۋىنگەرلىك باۋىرلاستىق-2018» جاتتىعۋى تۋرالى كەڭىرەك ايتىپ بەردى.
«ۇجىمدىق قاۋىپسىزدىك تۋرالى شارت ۇيىمى مويىندالعان ءارى قاۋىپسىزدىكتى قامتاماسىز ەتە الاتىن حالىقارالىق ايماقتىق ۇيىم بولىپ تابىلادى. ۇيىمنىڭ جاۋاپتى اۋماعىندا ۇ ق ش ۇ كەز كەلگەن قاۋىپكە جەدەل جاۋاپ بەرە الاتىن قۋاتتى ءارى الەۋەتتى ۇيىم. «جاۋىنگەرلىك باۋىرلاستىق-2018» جاتتىعۋىنا باقىلاۋشىلار رەتىندە ب ۇ ۇ، حالىقارالىق قىزىل كرەست كوميتەتىنىڭ وكىلدەرى مەن اسكەري باقىلاۋشىلار شاقىرىلدى. جاتتىعۋ اياسىندا وقۋ-جاتتىعۋ تاپسىرمالارىن بىرگە ورىنداۋ، ۇلتتىق مەرەكەلەردى اتاپ ءوتۋ، سپورتتىق سايىستار مەن كونسەرتتەردى ۇيىمداستىرۋ ۇيىمعا مۇشە مەملەكەتتەردىڭ اسكەريلەرىنىڭ دوستىعىن نىعايتا تۇسەدى. ۇ ق ش ۇ الداعى ۋاقىتتا دا ۇيىمعا مۇشە ەلدەردىڭ اسكەري قاۋىپسىزدىگىن قامتاماسىز ەتە بەرەتىنىنە سەنىم بىلدىرگىم كەلەدى»، - دەدى ماسكەۋدەن تىكەلەي تەلەكوپىر فورماتىندا سويلەگەن اناتولي سيدوروۆ.
قازاقستان، قىرعىزستان، تاجىكستان مەن رەسەي ەلدەرىنىڭ اۋماعىنداعى بىرلەسكەن جەدەل-ستراتەگيالىق وقۋ-جاتتىعۋ ءبىر ايعا سوزىلادى. ونىڭ اياسىندا ۇ ق ش ۇ مۇشە مەملەكەتتەردىڭ قارۋلى كۇشتەرىنىڭ بارلاۋ بولىمشەلەرىنىڭ «ىزدەۋ-2018» جاتتىعۋى، جەدەل جاۋاپ قاتۋ ۇجىمدىق كۇشتەرىنىڭ ء«وزارا ءىس-قيمىل - 2018» جاتتىعۋى، بىتىمگەرلىك كۇشتەردىڭ «جويىلماس باۋىرلاستىق-2018» جاتتىعۋى مەن ورتالىق ازيا ايماعىنىڭ «مەجە-2018» جاتتىعۋلارى بىرىكتىرىلمەك.
جاتتىعۋ شەڭبەرىندە اسكەري قاقتىعىستاردى شەشۋ مەن الدىن الۋدىڭ كەشەندى شارالارى ازىرلەنەتىن بولادى.