ولجاس سۇلەيمەنوۆ «نيەۆادا-سەمەي» قوزعالىسىنىڭ جينالىسىن وتكىزبەكشى

استانا. قازاقپارات - قوعام قايراتكەرى ولجاس سۇلەيمەنوۆ «نيەۆادا-سەمەي» قوزعالىسىنىڭ حالىقارالىق كونفەرەنتسياسىن وتكزۋدى جوسپارلاپ وتىر، دەپ حابارلايدى قازاقپارات ءتىلشىسى.

«كەلەسى جىلى اقپان ايىندا ءبىز كونفەرەنتسيانى وتكىزەمىز. اتالعان شارا «نيەۆادا-سەمەي» قوزعالىسىنىڭ 30 جىلدىعىنا ارنالادى. وعان جاپونيا، ا ق ش جانە تاعى باسقا ەلدەردى شاقىرامىز. سول جەردە يادرولىق قارۋسىزداندىرۋ سالاسىنداعى قوعامدىق ۇيىمداردىڭ ءرولىن تالقىلايتىن بولامىز»، - دەدى و. سۇلەيمەنوۆ استانادا وتكەن كونفەرەنتسيادا.

ونىڭ ايتۋىنشا، «نيەۆادا-سەمەي» قوزعالىسى قۇرىلعان جىلدارى قوعامدىق ۇيىمداردىڭ بەلسەندىلىگى جوعارى بولعان. قازاقستاندىق ۇيىمنىڭ باستاماسىمەن يادرولىق قارۋعا قارسى جاھاندىق اليانس تا قۇرىلعان ەدى. وعان وسى سالاداعى بارلىق بىرلەستىكتەر كىردى. سول كەزدە جۇمىس باعدارلاماسى ازىرلەنىپ، قوعامدىق ۇيىمداردىڭ قىزمەتى بويىنشا ناقتى جوبالار دا ۇسىنىلدى. سونىڭ ءبىرى - پارلامەنتارالىق رەفەرەندۋم.

«ءبىز «جەر-جاھاندا ءومىردى ساقتاپ قالۋ ءۇشىن يادرولىق قارۋدىڭ قاجەتى بار ما؟» دەگەن ناقتى ءبىر سۇراقتى عانا كۇن تارتىبىنە ەنگىزۋدى كوزدەدىك. بارلىق پارلامەنتتەر وسى سۇراققا «ءيا» نەمەسە «جوق» دەگەن ناقتى جاۋاپ بەرۋگە ءتيىستى. سوندا ك س ر و- نىڭ جوعارعى كەڭەسى ءبىرىنشى بولىپ «جوق» دەگەن جاۋاپ بەرەمىز دەدى. ارتىنان ا ق ش كونگرەسى دە سولاي ىستەيدى دەگەن جوسپار بولدى. اراداعى بايلانىسىمىز دا جاقسى بولدى. رەيگان دا قولدادى. سوندا ءبىزدىڭ «الەمنىڭ بارلىق سايلاۋشىلارى يادرولىق قارۋعا قارسى!» دەگەن ۇرانىمىز ءوز ناتيجەسىن بەرەتىن ەدى. ءبىراق كەڭەستەر وداعى ىدىرادى. وكىنىشكە قاراي، جاھاندىق اليانس تا ءوز جۇمىسىن توقتاتتى»، - دەپ اتاپ كورسەتتى و. سۇلەيمەنوۆ.

ايتا كەتەيىك، بۇگىن استانادا «قازاقستان مەن جاپونيانىڭ يادرولىق قارۋسىزداندىرۋ سالاسىنداعى ىنتىماقتاستىعى: ءبىر تاعدىر، جالپى ماقسات» تاقىرىبىندا حالىقارالىق كونفەرەنتسيا ءوتتى. شارانىڭ ۇيىمداستىرۋشىلارى - ق ر تۇڭعىش پرەزيدەنتى - ەلباسى قورى جانىنداعى الەمدىك ەكونوميكا جانە ساياسات ينستيتۋتى، سونداي-اق، گوي بەيبىتشىلىك قورى. كونفەرەنتسيادا يادرولىق قارۋسىزداندىرۋ سالاسىنداعى وزەكتى ماسەلەلەر تالقىعا سالىندى. سول جەردە ق ر پارلامەنت ءماجىلىسىنىڭ دەپۋتاتى اباي تاسبولاتوۆ كەڭەستەر كەزىندە اسكەردىڭ يادرولىق سوعىسقا قالاي دايىندالعانىن ايتىپ بەردى.

ال گوي بەيبىتشىلىك قورىنىڭ پرەزيدەنتى حيروو سايوندجي قازىرگى يادرولىق قارۋدىڭ قانشالىقتى قاۋىپتى ەكەنىن جەتكىزدى.