زاڭدى سالىنىپ جاتقان استاناداعى تۇرعىن ۇيلەردىڭ ءتىزىمى جاريالاندى

استانا. قازاقپارات - استانا قالاسىنىڭ ساۋلەت، قالا قۇرىلىسى جانە جەر قاتىناستارى باسقارماسى ۇلەسكەرلەردىڭ قاتىسۋىمەن تۇرعىن ءۇي سالۋعا جەرگىلىكتى اتقارۋشى ورگاننان رۇقساتتار بەرىلگەن قۇرىلىس كومپانيالاردىڭ ءتىزىمىن جاريالادى، دەپ حابارلايدى قازاقپارات.

ايتا كەتەيىك، «تۇرعىن ءۇي قۇرىلىسىنا ۇلەستىك قاتىسۋ تۋرالى» قازاقستان رەسپۋبليكاسىنىڭ جاڭا زاڭى 2017-جىلدىڭ 10- قازانىنان باستاپ كۇشىنە ەندى. وعان سايكەس، تۇرعىن ءۇي قۇرىلىسىنا ۇلەستىك قاتىسۋ مىنا تاسىلدەردىڭ بىرەۋىمەن جۇزەگە اسىرىلادى: كەپىلدىك بەرۋ قورىنىڭ كەپىلدىگىن الۋ؛ ەكىنشى دەڭگەيلى بانكتىڭ جوباسىنا قاتىسۋ؛ تۇرعىن ءۇي قورشاۋىن سالۋدان كەيىن ۇلەسكەرلەردىڭ اقشاسىن تارتۋ.

ءبىرىنشى ءتاسىل بويىنشا شەشىمدى «تۇرعىن ءۇي قۇرىلىسىنا كەپىلدىك بەرۋ قورى» ا ق قابىلدايدى.

ەكىنشى جانە ءۇشىنشى تاسىلگە رۇقساتتى جەرگىلىكتى اتقارۋشى ورگان ساۋلەت، قالا جانە جەر قۇرىلىسى باسقارماسى ۇسىنادى.

سونداي-اق قۇرىلىس كومپانياسىنىڭ مىندەتتى تۇردە: مەملەكەتتىك نەمەسە مەنشىك قۇقىعىنداعى جەر ۋچاسكەسى؛ ۆەدومستۆودان تىس كەشەندى ساراپتامانىڭ وڭ قورىتىندىسى بار تۇرعىن ءۇيدىڭ جوبالاۋ-سمەتالىق قۇجاتتاماسى؛ تۇرعىن ءۇيدىڭ قاڭقاسىنىڭ بولۋى تۋرالى ينجينيرينگىلىك كومپانيا راستاعان ەسەپ؛ ينجەنەرلىك كومپانيامەن جاسالعان شارت بولۋى ءتيىس.

اتالعان نورمالار زاڭنىڭ 9 جانە 10-باپتارىندا ايقىن كورسەتىلگەن.

استانادا ءتيىستى رۇقساتتارى بار كومپانيالاردىڭ ءتىزىمىن مىنا جەردەن كورۋگە بولادى. وعان ءارتۇرلى كومپانيالار سالىپ جاتقان 72 تۇرعىن ءۇي كەشەنى، سونداي-اق «تۇرعىن ءۇي قۇرىلىسىنا كەپىلدىك بەرۋ قورى» ا ق- مەن شارت جاساسقان مەردىگەرلەردىڭ 5 تۇرعىن نىسانى بار.