كەڭەس وداعى يادرولىق سوعىسقا قالاي دايىندالدى

استانا. قازاقپارات - ق ر پارلامەنت ءماجىلىسىنىڭ دەپۋتاتى اباي تاسبولاتوۆ كەڭەستەر كەزىندە اسكەردىڭ يادرولىق سوعىسقا قالاي دايىندالعانىن ايتىپ بەردى، دەپ حابارلايدى قازاقپارات ءتىلشىسى.

«مەن اسكەري سالادا 43 جىل قىزمەت ەتتىم. سونىڭ ىشىندە 23 جىلىمدى كەڭەس ارمياسىندا وتكىزدىم. اشىعىن ايتايىن، سول كەزدە ءبىزدى يادرولىق سوعىسقا دايىندادى. ءالى ەسىمدە، فرۋنزە اتىنداعى اسكەري اكادەميادا وقىعاندا مەنىڭ ديپلومدىق جۇمىسىم موتواتقىشتار ديۆيزياسىنىڭ يادرولىق قارۋدىڭ كومەگىمەن شابۋىل جاساۋ تاكتيكاسىنا ارنالدى. سول كەزدە ديپلومدىق جۇمىستاردىڭ 60 پروتسەنتى، وقۋ- جاتتىعۋلار دا يادرولىق قارۋدى قولدانۋ ماسەلەسىن قامتىدى. تاكتيكالىق قارۋدان باستاپ جاھاندىق اۋقىمعا دەيىنگى شارالار بولدى. وكىنىشكە قاراي، اسكەري ادامداردىڭ وزدەرى يادرولىق قارۋدىڭ قاۋىپ- قاتەرىن تۇسىنبەدى. ءبىزدى جاۋدى جويۋعا عانا ۇيرەتتى. ال ونداي سوعىستىڭ سالدارى قانداي بولاتىنىن ايتپادى»، - دەدى ا. تاسبولاتوۆ يادرولىق قارۋسىزداندىرۋعا ارنالعان كونفەرەنسيادا.

ونىڭ ايتۋىنشا، وقۋ- جاتتىعۋلار كەزىندە اسكەريلەردىڭ جەكە ءىس- قيمىلىنان باستاپ بروندالعان تەحنيكامەن ارەكەت ەتۋگە دەيىنگى بارلىق شارالار اتقارىلدى.

 «شىنى كەرەك، بۇنىڭ ءبارى ەشكىمدى قۇتقارمايتىن ەدى. جاپونيانىڭ يادرولىق قارۋدان قالايشا زارداپ شەككەنىن ءبارىمىز جاقسى بىلەمىز. قازاقستان جەرىندە 400 دەن استام جارىلىس بولدى. 1,5 ميلليون ادام زارداپ شەكتى، ادامدار ءالى كۇنگە سونىڭ زاردابىن تارتىپ كەلەدى»، - دەپ اتاپ كورسەتتى ا. تاسبولاتوۆ.

ايتا كەتەيىك، بۇگىن استانادا «قازاقستان مەن جاپونيانىڭ يادرولىق قارۋسىزداندىرۋ سالاسىنداعى ىنتىماقتاستىعى: «ءبىر تاعدىر، جالپى ماقسات» تاقىرىبىندا حالىقارالىق كونفەرەنسيا ءوتتى.

شارانىڭ ۇيىمداستىرۋشىلارى - ق ر تۇڭعىش پرەزيدەنتى - ەلباسى قورى جانىنداعى الەمدىك ەكونوميكا جانە ساياسات ينستيتۋتى، سونداي- اق، گوي بەيبىتشىلىك قورى.

كونفەرەنسيادا يادرولىق قارۋسىزداندىرۋ سالاسىنداعى وزەكتى ماسەلەلەر تالقىعا سالىندى. بۇگىندە جاپونيا وسى سالادا قازاقستاننىڭ نەگىزگى سەرىكتەستەرىنىڭ ءبىرى بولىپ سانالادى. اتالعان مەملەكەت تە يادرولىق قارۋدىڭ تاۋقىمەتىن كوردى. سول سەبەپتى يادرولىق قارۋعا قارسى ءۇش قاعيداسىنا جۇگىنىپ، الەم ەلدەرىن يادرولىق قارۋسىزداندىرۋ قوزعالىسىنا قوسىلۋعا ۇندەپ وتىرادى. ال قازاقستان «سەمەي- نيەۆادا» قوزعالىسى، «اتوم» باعدارلاماسى جانە يادرولىق قارۋدان باس تارتۋدىڭ حالىقارالىق كۇنى سياقتى باتىل باستامالاردى ىسكە اسىرا ءبىلدى.

اۆتور: ارمان اسقاروۆ