ەلوردادا «قازىرگى زامانعى ءسوز ەنەرگياسى» اتتى ادەبي فورۋم وتۋدە
«قازاق ادەبيەتىنىڭ بۇگىنگى قال- احۋالى بارشامىزدى الاڭداتاتىنى داۋسىز. «ەل ادەبيەتىن قايتسەك الەمگە تانىتامىز؟» دەگەن ماسەلە بارشامىزعا ورتاق. ەندەشە ءتۇرلى مەملەكەت وكىلدەرىمەن مادەني جانە ادەبي بايلانىس ورناتۋ ماقساتىندا وتكىزىلىپ وتىرعان بۇگىنگى شارانىڭ ورنى ەرەكشە. تاريحقا كوز جۇگىرتسەك، مۇنداي اۋقىمدى شارا ەلىمىزدە سوڭعى رەت 1973 -جىلى وتكەن. اراعا جارتى عاسىرعا جۋىق ۋاقىت سالىپ ەل ورداسى - استانا فورۋمى قوناقتارىنا قۇشاعىن ايقارا اشىپ وتىر»، - دەپ اتاپ ءوتتى مينيستر.
وسى رەتتە ول ەلباسى ن. نازاربايەۆتىڭ «رۋحاني جاڭعىرۋ» باعدارلامالىق ماقالاسى اياسىندا ءوتىپ وتىرعان فورۋمعا ەۋرازيا قۇرلىعىنىڭ بەلدى قالامگەرلەرى شاقىرىلعانىن باسا ايتتى.
«ءوز كەزەگىندە جاڭا زامانداعى الەم ادەبيەتىنىڭ كورنەكتى وكىلدەرىن ەل ورداسى - استانادا قارسى الۋ ۇلتىمىز ءۇشىن ۇلكەن ابىروي جانە زور جاۋاپكەرشىلىك! وسى رەتتە، مەملەكەت باسشىسىنىڭ «الەم ءبىزدى قارا التىنمەن نەمەسە سىرتقى ساياساتتاعى ءىرى باستامالارىمىزبەن عانا ەمەس، مادەني جەتىستىكتەرىمىزبەن دە تانۋى كەرەك» دەگەن قاناتتى ءسوزىن تاعى ءبىر ەسكە الۋدى ءجون كورىپ وتىرمىن. بۇگىنگى شارا، مادەنيەتىمىز بەن ادەبيەتىمىزدى الەم جۇرتشىلىعىنا تانىستىرۋ ءۇشىن بەرىلگەن بىردەن- ءبىر مۇمكىندىك»، - دەدى مينيستر.
وسى ورايدا ارىستانبەك مۇحامەدي ۇلى مادەنيەت جانە سپورت مينيسترلىگىنىڭ اتىنان جانە ءوز اتىنان فورۋمنىڭ وتۋىنە اتسالىسقان، ەلىمىزدەگى ەڭ العاشقى جانە ەڭ ءىرى شىعارماشىلىق بىرلەستىكتەردىڭ ءبىرى - جازۋشىلار وداعىنا ۇلكەن ريزاشىلىن ءبىلدىردى. سونىمەن قاتار فورۋمعا قاتىسۋشىلارعا جانە ونىڭ جۇمىسىنا ساتتىلىك تىلەدى.
اۆتور: مارلان جيەمباي