كەنيادا جاتتىعىپ جۇرگەن قازاق قىزى

None
None
 استانا. قازاقپارات - بىلتىر شىعىس قازاقستاندا وبلىس اكىمى دانيال احمەتوۆتىڭ باستاماسىمەن «Altay Athletics» كاسىبي جەڭىل اتلەتيكا كلۋبى قۇرىلعان بولاتىن.

 كلۋب قۇرامىنا لوندون وليمپياداسىنىڭ چەمپيونى، ازيا ويىندارىنىڭ ءتورت دۇركىن جەڭىمپازى ولگا رىپاكوۆا، بيىلعى ازيا ويىندارىنىڭ قولا جۇلدەگەرى نادەجدا دۋبوۆيتسكايامەن قاتار، نورا دجەرۋتو، دەيزي دجيپكەمەي، كارولين كيپكيرۋي سەكىلدى كەنيالىق جەلاياقتار دا الىنعان ەدى. جاقىندا وسكەمەندە وبلىستىق دەنە شىنىقتىرۋ جانە سپورت باسقارماسى كلۋبتىڭ ءبىر جىلدىق جۇمىسىن قورىتىندىلاپ، باسپا ءسوز ءماسليحاتىن وتكىزدى. وسى جيىندا كلۋبقا جاڭا مۇشەلەر قابىلدانعانى جايىندا ايتىلىپ، كلۋب ديرەكتورى اسحات سەيسەمبەكوۆ مارافونشى قازاق قىزى گۇلجانات جاناتبەكتى تانىستىرعان- دى. باسپاءسوز ءماسليحاتىنان كەيىن شەتەلدە جاتتىعۋعا مۇمكىندىك العان جەڭىل اتلەتتى اڭگىمەگە تارتتىق.

-  گۇلجانات، ءسىز 5, 10 شاقىرىم قاشىقتىقتار بويىنشا قىزدار اراسىندا قازاقستاننىڭ ءۇش دۇركىن چەمپيونى، گونكونگتە وتكەن ازيا چەمپيوناتىنىڭ قولا جۇلدەگەرىسىز. ريو- دە- جانەيرو وليمپياداسىنا دا قاتىستىڭىز. وسكەمەندىك «Altay Athletics» كاسىبي جەڭىل اتلەتيكا كلۋبىنا قاشان شاقىرتۋ الدىڭىز؟

-  مەن تالدىقورعان قالاسىندا دۇنيەگە كەلگەنمىن. «Altay Athletics» كلۋبىمەن كەلىسىمشارت جاساسقالى ەكى ايدان استام ۋاقىت بولدى. وسى كلۋبقا قابىلدانعاننان كەيىن كەنياعا بارىپ، سول ەلدىڭ جەڭىل اتلەتتەرىمەن بىرگە جاتتىعۋ وتكىزىپ كەلدىم.

-  كەنيادان العان اسەرىڭىز قانداي؟ ول جاقتىڭ جەلاياقتارى قالاي جاتتىعادى ەكەن؟

-  ەكى ايداي سول ەلدە بولدىم. كەنيا -  جەلاياقتار ەلى. قازىر ءبىزدىڭ ەلدە دە جەڭىل اتلەتيكاعا، بۇقارالىق سپورتقا جاقسى كوڭىل ءبولىنىپ، «استانا مارافونى» ، «الماتى مارافونى» ، «شىمكەنت مارافونى» سەكىلدى جارىستار وتكىزىلىپ كەلەدى. مەن 42 شاقىرىمعا جۇگىرەتىن مارافونشىمىن. كەنيا ماعان كاسىبي تۇرعىدان دامۋىما كومەكتەسەدى دەپ ويلايمىن.

-  سوندا ءسىزدى كەنيادا جاتتىعىپ جۇرگەن العاشقى قازاق دەۋىمىزگە بولا ما؟

-  بولاتىن شىعار. كەنيا استاناسى نايروبي قالاسىندا جاتتىقتىم. بۇل شاھار «چەمپيونداردىڭ قالاسى» دەپ اتالادى. ەكى دۇركىن وليمپيادا، ەكى مارتە الەم چەمپيونى دەۆيد رۋديشا مەن جارتىلاي مارافوننان الەمنىڭ ءۇش دۇركىن چەمپيونى مەري كەيتاني دە وسى قالادا جاتتىعادى.

-  ءسىز كىمدەرمەن بىرگە جاتتىعاسىز؟

-  باپكەرىم -  كەننەت روتيچ. مەن نورا دجەرۋتو، دەيزي دجيپكەمەي، كارولين كيپكيرۋي، شەدراك كوەچ سەكىلدى كەنيالىق جەلاياقتارمەن بىرگە جاتتىعامىن.

-  كەنيادا ەكى ايداي بولدىڭىز. نە ءتۇيدىڭىز؟ كەنيالىقتاردىڭ جەلاياق بولۋىنىڭ سىرى نەدە؟

-  بىرىنشىدەن، جۇگىرۋ ولاردىڭ قاندارىنا سىڭگەن قاسيەت. ءبىزدىڭ ەلدە سپورتتىڭ بوكس، اۋىر اتلەتيكا، كۇرەس سياقتى تۇرلەرىنە جاقسى كوڭىل بولىنسە، ول جاقتا جۇگىرۋگە ايرىقشا دەن قويادى. قاي جەرگە قاراساڭ دا، جۇگىرىپ جۇرگەن ادامداردى كورەسىڭ. تاڭعى 5 تە تۇرساڭ دا كوشەدە جۇگىرىپ بارا جاتقاندارعا كوزىڭ تۇسەدى. الەمنىڭ كوپتەگەن مىقتى سپورتشىلارى وسىندا جاتتىعادى. بۇل جەردىڭ اۋا رايى دا وزگەشە، تەڭىز دەڭگەيىنەن 2500 مەتر بيىكتىكتە ورنالاسقان.

-  ەكى ايدا ءوز ناتيجەڭىزدى جاقسارتا الدىڭىز با؟

 -  بيىل الماتىداعى ءال- فارابي اتىنداعى قازاق ۇلتتىق ۋنيۆەرسيتەتىنىڭ ماگيستراتۋراسىن ءبىتىردىم. ساباققا كوبىرەك كوڭىل ءبولىپ، ەمتيحان تاپسىرىپ، ديپلوم قورعاپ، جارىستارعا دۇرىس قاتىسا المادىم. ءبىراز ۋاقىت جاتتىعۋدى توقتاتۋعا تۋرا كەلدى. «Altay Athletics» كلۋبىنا شاقىرتۋ العاننان بەرى جاتتىعۋدى قولعا الىپ جاتىرمىن. ناتيجە بىردەن بولمايدى عوي. اۋەلى كەنيانىڭ اۋا رايىنا، تاماعىنا بەيىمدەلۋ كەرەك. كەلەسى جىلعا دەيىن ناتيجەمدى جاقسارتامىن دەپ ويلايمىن.

-  كەنياعا قايتا باراسىز با؟

-  بىرەر كۇندە ۇشامىز. قاراشاعا دەيىن سول ەلدە جاتتىعامىن. وسى ايدا 42 شاقىرىمدىق ۇلكەن مارافون وتەدى. قازىر سوعان قاتىسۋعا ازىرلەنىپ جاتىرمىن. مەنىڭ جۇگىرۋدەگى ەڭ جاقسى ناتيجەم -  2 ساعات 38 مينۋت. بۇل -  قازاقستان بويىنشا جاقسى كورسەتكىش. ال الەمدىك دەڭگەيگە جەتۋ ءۇشىن 42 شاقىرىمدى 2 ساعات 30 مينۋتتا جۇگىرۋىڭ قاجەت. دەمەك، 8 مينۋت ءتۇسىرۋ كەرەك. وليمپيادا ويىندارىندا جاقسى كورسەتكىش -  2 ساعات 20 مينۋت.

-  الداعى جوسپارىڭىز قانداي؟

-  ەندىگى جوسپار -  حالىقارالىق دەڭگەيدەگى جارىستارعا قاتىسۋ. 42 شاقىرىمدى 2 ساعات 35, 2 ساعات 30 مينۋتتا جۇگىرۋدى ماقسات ەتىپ وتىرمىن. ازيا ويىندارىنا دەيىن ەكى اي كەنيا سپورتشىلارىمەن بىرگە جاتتىقتىم. ولاردان ۇيرەنەرىمىز كوپ. وكىنىشكە قاراي، قازاقستاندا ۇزاق قاشىقتىققا كاسىبي تۇردە جۇگىرەتىن سپورتشىلار ساۋساقپەن سانارلىق. بۇعان بىلىكتى جاتتىقتىرۋشىلاردىڭ جوقتىعى دا سەبەپ. ۇلكەن قاشىقتىققا جۇگىرۋ ءۇشىن كەمىندە 6 اي، 1 جىل كولەمىندە دايىندىق كەرەك. سوندا عانا ناتيجە شىعادى. دەگەنمەن، توكيوعا جاقسى دايىندىقپەن بارامىز دەپ ويلايمىن. وسى مۇمكىندىكتى پايدالانىپ، شەتەلدە جاتتىعۋىما، تاجىريبە جيناۋىما مۇمكىندىك بەرگەن شىعىس قازاقستان وبلىسىنىڭ اكىمى دانيال احمەتوۆكە، وبلىستىق دەنە شىنىقتىرۋ جانە سپورت باسقارماسىنىڭ باسشىسى اسقار موجانوۆقا، «Altay Athletics» كاسىبي جەڭىل اتلەتيكا كلۋبىنىڭ ديرەكتورى اسحات سەيسەمبەكوۆكە العىسىمدى بىلدىرگىم كەلەدى. -  اڭگىمەڭىزگە راحمەت.

اڭگىمەلەسكەن ازامات قاسىم، «ەگەمەن قازاقستان»

سۋرەتتە: گۇلجانات باپكەرى كەننەت روتيچ جانە جەلاياق كارولين كيپكيرۋيمەن بىرگە

سوڭعى جاڭالىقتار