ساراندا ورتالىق ازياداعى ەڭ ءىرى كۇن ەلەكتر ستانساسى ىسكە قوسىلادى
قاراعاندى وبلىسىنىڭ اكىمى ەرلان قوشانوۆ كۇن پاركىنىڭ اۋماعىن كوردى.
- قازىرگى تاڭدا كومپانيا بەس باعىت بويىنشا جۇمىس جۇرگىزىپ جاتىر. ءبىرىنشى نىسان - كۇن پاركىنىڭ قۇرىلىسى، ەكىنشى نىسان - 100-30-30 قوسالقى ستانسانىڭ قۇرىلىسى. ناتيجەسىندە ولار قۋاتتىلىعى 100 مۆت كۇن ەلەكتر ستانسياسىنا بىرىكتىرىلەدى. بۇعان قوسا تاعى ءۇش جوبا بار. ول «قاراعاندى جارىق» ج ش س جۇرگىزەتىن 110 كۆت ەلەكتر جەلىلەرىن، ۆەل-35 جوعارى ۆولتتىق جەلى مەن ارۋ-110 جەلىسىن قالىپقا كەلتىرۋ. بۇل جوبالار بىزگە ستانسا جەلىگە قوسىلىپ، ەلەكتر قۋاتىن شىعارۋعا، ونى ۇلتتىق ەلەكتر جەلىلەرىنە تاراتۋ ءۇشىن قاجەت، - دەپ مالىمدەدى ايماق باسشىسىنا «SESSaran» ج ش س باس ديرەكتورى ەۆگەنيي گرەبەننيكوۆ.
ونىڭ ايتۋىنشا، ينۆەستيتسيالاردىڭ جالپى سوماسى 988 ميلليون تەڭگەنى قۇرادى.
- قازىر باعانالىق القاپتاردى قاعۋ بويىنشا جۇمىستار جۇرگىزىلىپ جاتىر، ونىڭ 60 پايىزدى ورىندالدى. مەتالل قۇرىلىستارىن جيناۋ جۇرگىزىلۋدە، الداعى كۇندەرى ءبىز كۇن پانەلدەرىن ورناتۋدى تولىقتاي باستايمىز دەپ جوسپارلاپ وتىرمىز. كۇن پاركىنىڭ اۋماعى 20 ينۆەكتورلىق قوسىمشا ستانسالاردى ورناتۋدى قاراستىرادى، ولار ەلەكتر قۋاتىن تۇراقتى توقتان اۋىسپالىعا اينالدىراتىن بولادى. سونداي- اق جەلىنىڭ جاعدايى تۋرالى اقپاراتتى جيناقتاپ، كۇن سايىن مونيتورينگ جۇرگىزەدى. بۇل «سمارتگين» سوڭعى بۋىندى وتە اقىلدى ماشينالار.
مىسالى، ەگەر قانداي دا ءبىر بولشەك بۇزىلاتىن بولسا، ول جايلى اقپارات قويماعا اۆتوماتتى تۇردە جەتكىزىلەدى. ول وزدىگىنەن جاڭا بولشەككە تاپسىرىس بەرە الادى، ياعني بارلىق پروتسەسس تولىعىمەن اۆتوماتتاندىرىلعان. بۇل ماشينالاردى دا ءبىز جاقىن ارادا ورناتامىز. ءبىزدىڭ باستى ماقساتىمىز - قازاننىڭ سوڭىنا دەيىن كۇن پاركىنىڭ اۋماعىندا قۇرىلىس- ورناتۋ جۇمىستارىن اياقتاۋ جانە قاراشادا ىسكە قوسۋ- رەتتەۋ جۇمىستارىن ورىنداۋ. قوسىمشا ستانسادا ءبىز اپتانىڭ سوڭىنا قاراي كۇش بەرەتىن ترانسفورماتوردىڭ جەتكىزىلۋىن كۇتىپ وتىرمىز، ول ءبىزدىڭ ستانسانىڭ جۇرەگى بولىپ تابىلادى. جۇمىستار مەرزىمگە ساي ءجۇرىپ جاتىر. ءبىز بارلىق جوسپارلاردى ورىنداۋعا تىرىسۋدامىز جانە جىل سوڭىنا دەيىن ستانسانىڭ ىسكە قوسىلۋى ءۇشىن بار كۇشىمىزدى سالۋدامىز، - دەدى ەۆگەني گرەبەننيكوۆ.
ايماق باسشىسىن ينۆەستورلاردا جۇمىس بارىسىندا مەملەكەتتىك ورگاندارمەن قارىم- قاتىناستا قانداي دا ءبىر قيىندىقتار تۋىنداي ما دەگەن ماسەلە قىزىقتىردى.
- ءبىز بۇل الاڭدى قازاقستاندىق كليماتتىق جاعداي كۇن ەلەكتر ستانساسى ءۇشىن بارىنشا ءتيىمدى بولادى دەپ ەسەپتەگەندىكتەن تاڭدادىق. مۇنداعى لوكاتسيا جاقسى، وتە تەگىس القاپ، قۇرىلىسقا ىڭعايلى جەر، - دەپ اتاپ ءوتتى باس ينۆەستور «Solamet/GoldbekSolar» باس ديرەكتورى يواحيم گولدبەك.
- وسى ساتكە دەيىن ينۆەستيتسيالانعان بارلىق قاراجات - مەنىڭ جەكەمەنشىك قارجىم. ينۆەستيتسيالار سەنىمدىلىكتى تالاپ ەتەدى. مەن وسىلايشا ءوزىمنىڭ سەنىمدىلىگىمدى كورسەتتىم دەپ ويلايمىن. ەشقانداي قيىندىقتار تۋىنداعان جوق، بارلىعى جوسپار بويىنشا جۇرۋدە، مەملەكەتتىك قولداۋدىڭ بارلىق تۇرلەرىن كورىپ جاتىرمىز. جانە دە جەرگىلىكتى بيلىك، قاراعاندى وبلىسى اكىمدىگى، بارلىق مۇددەلى مينيسترلىكتەر، «قازاق ينۆەست» ۇلتتىق كومپانياسىنا كورسەتىپ جاتقان قولداۋلارىڭىز ءۇشىن العىسىمىزدى ايتامىز. كەلەشەكتە ءبىز قازاقستاندا تاعى دا قوسىمشا جوبالارعا ينۆەستيتسيا سالامىز، - دەيدى ول.
يواحيم گولدبەكتىڭ سوزىنە سۇيەنسەك، بارلىق ەلەكتر قۋاتى «SESSaran» ج ش س جانە «KEGOC» كومپانياسىنىڭ ەسەپ- قارجى ورتالىعى اراسىندا جاسالعان كەلىسىمشارتقا ساي تۇراقتى باعامەن ساتىلاتىن بولادى. مۇنداي ستانسا 30 جىلدان استام ۋاقىت قىزمەت ەتەدى، ال ەلەكتر قۋاتىنىڭ قۇنى ءبىر دەڭگەيدە قالادى.
سونداي- اق ينۆەستور جوبا اياقتالعان سوڭ ءارى قاراي سارانعا قولداۋ كورسەتۋدى كوزدەپ وتىرعانىن جەتكىزدى.
- وتكەن جىلى ءبىز قالانى قولداۋ بويىنشا بىرنەشە مىندەتتەمەلەر الدىق جانەدە ولاردى تولىعىمەن ورىندايمىز، ونىڭ ىشىندە شەتتەگى جوبالار دا بار، - دەپ اتاپ ءوتتى يواحيم گولدبەك.
ەرلان قوشانوۆ جوبانى ىسكە قوسۋدى جەلتوقساندا بولاتىن يندۋستريالاندىرۋ كۇنىنە ورايلاستىرۋدى ۇسىندى.
- جۋىردا ءبىزدىڭ ايماقتا جۇمىس ساپارىمەن ەلباسى بولىپ قايتتى، ءبىز وعان وسى جوبا تۋرالى مالىمدەدىك. پرەزيدەنت مەملەكەت تاراپىنان بارىنشا قولداۋ كورسەتۋدى تاپسىردى، جانە دە ءبىز سول تاپسىرمانى ورىنداپ جاتىرمىز دەپ ويلايمىن. ءبارىمىز جوبانى جەلتوقساندا اياقتاۋ ءۇشىن كۇش سالىپ، ستانسانىڭ اشىلۋىن يندۋستريالاندىرۋ كۇنىنە ورايلاستىرۋىمىز كەرەك. جۇمىستاردىڭ مەرزىمگە ساي اياقتالۋىنا بارلىعىمىز دا قىزىعۋشىلىق تانىتۋدامىز، سەبەبى بۇل وسى جىلدىڭ ەڭ ءىرى ينۆەستيتسيالىق جوبالاردىڭ ءبىرى، - دەدى وبلىس اكىمى.
ەستەرىڭىزگە سالا كەتەيىك، سارانداعى قۋاتتىلىعى 100 مۆت كۇن ەلەكتر ستانساسىنىڭ قۇرىلىسى 2017 -جىلى 7 - ماۋسىمىندا باستالعان بولاتىن. كاسىپورىن وسى سەكىلدى ستانسالار اراسىندا ورتالىق ازيا بويىنشا ەڭ ءىرىسى بولماق. ول 160 گەكتار اۋماقتى الادى، وندا 370 مىڭنان استام فوتوۆولتايكالىق پانەلدەر ورناتىلادى، ولار كۇن ەنەرگياسىن ەلەكتر قۋاتىنا اينالدىرىپ وتىرادى.
جوبا ەۋروپالىق وداقتىڭ وكىلدەرى يانا زوننەنشايننىڭ (چەحيا)، ارنولد بەرەنستىڭ (گەرمانيا) جانە دۋشان پودگورسكي (سلوۆاكيا) باستاماسى بويىنشا جۇزەگە اسىرىلىپ جاتىر. بازالىق سەرىكتەستەر «شنايدەر ەلەكتريك» جانە «گراسس ينجينيرينگ» (گەرمانيا) كومپانيالارى بولىپ تابىلادى. جوبانىڭ قۇنى 139,5 ميلليون ەۋرونى قۇرايدى، ءبىر جىلدىق جوبالىق قۋاتتىلىعى - 145 ميلليون كۆت/س، 4,9 ميلليارد تەڭگە.