بالقاشتا ىشكى اعزالارى اۋىسىپ كەتكەن ءسابي دۇنيەگە كەلدى

قاراعاندى. قازاقپارات - بالقاش قالاسىنىڭ دارىگەرلەرى تۋا ءبىتتى پاتالوگيالارى بار ءسابيدىڭ ءومىرىن ساقتاپ قالدى. ءمالىم بولعانداي، قىز بالانىڭ ىشكى اعزالارى اۋىسىپ كەتكەن. ونىڭ جۇرەگى وڭ جاعىندا ورنالاسقان، دەپ حابارلايدى قازاقپارات ءتىلشىسى.

وبلىستىق دەنساۋلىق ساقتاۋ باسقارماسىنان اتاپ وتكەندەي، شاقالاق 24 - تامىز كۇنى 3 كەلى 702 گرامم سالماقپەن (بويى 54 س م) دۇنيەگە كەلدى. تۋا سالا وعان ءبىرقاتار اۋىر دياگنوزدار قويىلعان - ديافراگمالى جارىق اۋرۋى، تۋابىتتى پنيەۆمونيا، وكپەلەردىڭ گيپوپلازياسى، جاڭا تۋعان نارەستەنىڭ گەمموراگيالىق سىرقاتى، اسقازانعا قان كەتۋ، ىشەكتىڭ پارەزى جانە انەميا. بۇدان بولەك، بالانىڭ جۇرەگى وڭ جاعىندا ورنالاسقان. ءسابي دۇنيەگە كەلگەندە ونىڭ جاعدايى «وتە اۋىر» دەپ باعالانعان بولاتىن.

ناۋقاستىڭ جاعدايىنا بايلانىستى ونى كولىكپەن تاسىمالداۋ مۇمكىندىك بولمادى. سول سەبەپتى ساناۆياتسيا جەلىسى بويىنشا دارىگەرلەردى الدىرتىپ، شۇعىل تۇردە وتا جاساۋ شەشىمى قابىلداندى.

«بالاعا وبلىستىق بالالار كلينيكالىق اۋرۋحاناسىنىڭ دارىگەرلەرى وپەراتسيا جاسادى. لاپاروتوميا جاسالدى، پليەۆرا قۋىسىنان ىشكى اعزالار الىنىپ تاستالدى. باۋىردىڭ سول جاق بولىگىنەن جانە كوك باۋىرىنان ديافراگمالى جارىق الىندى. وتا ەكى ساعاتقا جۋىق ۋاقىتقا جالعاستى. قازىر ءسابي ءوزىن جاقسى سەزىنۋدە جانە ۇيىنە شىعارۋعا دايىندالۋدا. قاجەتتى بارلىق مەديتسينالىق كومەك كورسەتىلدى» ، - دەپ ءمالىم ەتتى ۆەدومستۆودان.