قازاقستاندىقتاردىڭ شەتەلدە تاركىلەنگەن مۇلكى قالاي قايتارىلماق
بۇل تۋرالى بۇگىن استانادا ق ر قارجى مينيسترلىگى قارجىلىق مونيتورينگ كوميتەتىنىڭ ءتوراعاسى ءانۋار جۇمادىلدايەۆ ايتتى، دەپ حابارلايدى قازاقپارات ءتىلشىسى.
«شەتەلدە تاركىلەنگەن مۇلىكتەردى قايتارۋ ماسەلەسى رەتتەلمەگەن. ماسەلەن، قىلمىسكەر بولىپ شىعىپ، تۇتقىندالدى، مۇلكى تاركىلەندى. ال وعان كىم يەلىك ەتۋى كەرەك. ءبىزدىڭ ەلىمىز بە، الدە باسقا ما؟ نەمەسە ءدال وسىنداي جاعداي ءبىزدىڭ ەلىمىزدە وزگە ەلدىڭ ازاماتىنا قاتىستى بولۋى دا مۇمكىن. كىمگە قانداي ۇلەس تيەتىندىگىن ەكىجاقتى كەلىسىمدەر ارقىلى قاراستىرۋعا ءتيىسپىز» ، - دەدى ءا. جۇمادىلدايەۆ ادىلەت مينيسترلىگى جانىنداعى زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيانىڭ كەزەكتى وتىرىسىنان كەيىن باق وكىلدەرىنە بەرگەن سۇحباتىندا.
بۇعان دەيىن، ق ر قارجى مينيسترلىگى ەلىمىزدە تاركىلەنگەن مۇلىكتەر قورىنىڭ پايدا بولۋى مۇمكىن ەكەندىگىن حابارلاعان بولاتىن. مۇنداي جاڭالىق «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ماسەلەر بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تۇجىرىمداسىندا كوزدەلگەن.