كيەلى جەرلەردى ارالاعانى ءۇشىن «التىن» بەرىلەدى
كومپانيا ءتوراعاسىنىڭ ورىنباسارى قايرات ءسادۋاقاسوۆتىڭ ايتۋىنشا، الداعى ۋاقىتتا «Pokemon Go» ويىنى نەگىزىندە وتاندىق كۆەست جاساپ شىعارۋ جوسپارلانعان. سونىڭ نەگىزىندە قازاقستاننىڭ كيەلى جەرلەرىن ارالاپ قانا قويماي، ۇپاي جيناۋعا بولادى. ارتىنان سونىڭ ءبارىن جەڭىلدىككە ايىرباستاۋعا مۇمكىندىك بار. ءتىپتى، «حان» دارەجەسىنە دەيىن وسۋگە بولادى.
«الدىمەن بارلىق كيەلى جەرلەردىڭ ەلەكتروندى نۇسقاسى ازىرلەنەدى. سونىڭ نەگىزىندە ۇلكەن كۆەست جاساۋ ويىمىزدا بار. ويىنشىعا ۇپاي دا بەرىلەدى. ماسەلەن، ۇلىتاۋعا، يا بولماسا، باسقا ءبىر كيەلى جەرگە بارساڭ، سول ءۇشىن ۇپاي ەسەپتەلەدى. كۆەست- ساياحاتتىڭ گەوگرافياسى كەڭەيگەن سايىن ۇپايدىڭ سانى كوبەيدى. ۇپايدىڭ شارتتى اتاۋى - «التىن» . التىنداردى سانالۋان جەڭىلدىكتەرگە ايىرباستاۋعا مۇمكىندىك بار. ماسەلەن، اۋەكومپانياسى ەكونوم- كلاستىڭ ورنىنا بيزنەس- كلاستى بەرە الادى، يا بولماسا، جۇكتى تەگىن جەتكىزەدى. ۇپايدان بولەك ءاربىر ادامنىڭ جەكە ستاتۋسى بولادى. ويىندا الدىمەن «ۇلان» بولاسىڭ، ودان كەيىن «سۇلتان» ، ءسويتىپ، «حان» دەگەن مارتەبەگە دەيىن وسۋگە مۇمكىندىك بار. ونداي ادامدارعا ارنايى جەڭىلدىكتەر بەرىلەدى» ، - دەدى ق. ءسادۋاقاسوۆ قازاقپارات تىلشىسىنە بەرگەن سۇحباتىندا.
ونىڭ ايتۋىنشا، اتالعان جوبا - ءتۋريزمدى دامىتۋ شارالارىنىڭ ءبىرى. نەگىزگى ماقسات - جاڭا تەحنولوگيالار ارقىلى جاستاردى قىزىقتىرۋ، تۋعان ەلدىڭ كيەلى جەرلەرىن ارالاۋعا دەگەن ىنتاسىن ارتتىرۋ.
«ارينە، ءبىر ويىنمەن بارلىق ماسەلەنى شەشە المايمىز. بىزگە الەۋمەتتىك جارنامانى كۇشەيتۋ كەرەك. ايماقتاردىڭ تۋريزمگە جاۋاپتى ادامدارى باسقا وڭىرلەرگە بارىپ، ءوز وبلىسىنداعى تۋريستىك ورىندارعا جارناما جاساۋى قاجەت. ءسويتىپ، تۋريستەردى كوپتەپ تارتقانى ءجون. نەگىزى، بۇرىن ءبىز ىشكى ءتۋريزمدى ءبىرىڭعاي نارىق دەپ قاراستىردىق. ولاي ەمەس. ىشكى نارىقتا دا باسەكە بار. ماسەلەن، استانا تۋريستەردى كوپتەپ تارتۋ ءۇشىن الماتى قالاسىمەن باسەكەلەسەدى. سول سياقتى شىمكەنت تە وسى باسەكەگە قوسىلىپ وتىر. ماڭعىستاۋ بار. ايماقتار حالىققا اقپاراتتى كوبىرەك بەرسە، ىشكى تۋريزم جاندانا تۇسەدى» ، - دەپ اتاپ كورسەتتى ق. ءسادۋاقاسوۆ.