سينوپتيكتەر: قازاقستاندا جاڭبىر جاۋىپ، اۋا تەمپەراتۋراسى تومەندەيدى

استانا. قازاقپارات - سينوپتيكتەر 20-22- قىركۇيەك ارالىعىندا قازاقستانداعى اۋا رايى بولجامىن ۇسىندى، دەپ حابارلايدى قازاقپارات.

«بىرنەشە كۇنگە جالعاسقان جىلى جانە قۇرعاق اۋا رايىنان كەيىن رەسپۋبليكانىڭ سولتۇستىك وبلىستارىنا اتموسفەرالىق فرونتتارمەن تسيكلون كەلەتىن بولادى. سوندىقتان، الداعى ءۇش تاۋلىكتە سولتۇستىك، سونداي-اق ورتالىق وبلىستاردىڭ كەي جەرلەرىندە جاڭبىر جاۋىپ، 22-قىركۇيەكتە قاتتى جاۋىن-شاشىن بولۋى مۇمكىن»، - دەلىنگەن «قازگيدرومەت» ر م ك حابارلاماسىندا.

تسيكلونمەن بايلانىستى سۋىق اۋا اعىندارىنىڭ ىقپالىمەن قازاقستاننىڭ وڭتۇستىك جانە وڭتۇستىك-شىعىس وبلىستارىندا كۇن كۇركىرەپ، جاڭبىر جاۋادى. سونداي-اق، اۋا تەمپەراتۋراسى وسى كەزەڭدەگى قالىپتى تەمپەراتۋرادان 2.. .4°س تومەن بولادى.