دەنيس تەننىڭ ولىمىنە كۇدىكتىلەردى قاماۋ مەرزىمى ءۇش ايعا سوزىلدى
«الماتى قالاسىنىڭ مامانداندىرىلعان تەرگەۋ سوتى 11-12- قىركۇيەكتە ارنايى قاۋلى شىعاردى. كۇدىكتىلەردى قاماۋدا ۇستاۋ مەرزىمى 3 ايعا دەيىن، ياعني 23- قازانعا دەيىن سوزىلدى»، - دەدى قالالىق سوتتىڭ باسپا ءسوز حاتشىسى دياس ماحامبەتوۆ.
ەسكە سالساق، قازاقستاندىق مانەرلەپ سىرعاناۋشى دەنيس تەن 19- شىلدە كۇنى پىشاق جاراقاتىنان قازا بولعان ەدى. وقيعا قۇرمانعازى مەن بايسەيىتوۆا كوشەلەرىنىڭ قيىلىسىندا 19- شىلدەدە تۇسكى ساعات 15:00 دەر شاماسىندا بولعان.
سپورتشى كولىگىنىڭ ايناسىن ۇرلاماق بولعان ەكى ادامنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنان جاراقات الدى. 25 جاستاعى تەن ءۇش ليتر قان جوعالتىپ، اۋرۋحاناعا وتە اۋىر جاعدايدا جەتكىزىلدى. ءبىراق الماتى قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قوسىمشا قان قاجەت ەمەستىگىن جانە رەسۋرستار جەتكىلىكتى ەكەندىگىن ءمالىم ەتكەن بولاتىن. 2,5 ساعاتقا جالعاسقان رەانيماتسيالىق شارالارعا قاراماستان، اۋرۋحانا دارىگەرلەرى ونىڭ ومىرىنە اراشا تۇسە المادى. ساعات 17.30 دا وليمپيادا جۇلدەگەرى قايتىس بولدى.
ادام ءولتىرۋ بابىمەن قىلمىستىق ءىس قوزعالدى. كەيىن بەلگىلى بولعانداي، سپورتشىنىڭ ولىمىنە قاتىسى بار كۇدىكتىلەر ۇستالىپ، قىلمىستارىن مويىندادى.