فيلمدەردى قازاق تىلىنە اۋدارۋدىڭ ءۇش نۇسقاسى ۇسىنىلدى - مادەنيەت ءمينيسترى

استانا. قازاقپارات - كينەماتوگرافيا تۋرالى جاڭا زاڭ جوباسىندا فيلمدەردىڭ پروكات ءتىلى ماسەلەسىنە ايرىقشا ءمان بەرىلدى.

بۇل تۋرالى بۇگىن پارلامەنت ءماجىلىسىنىڭ جالپى وتىرىسىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتتى، دەپ حابارلايدى قازاقپارات.

«قازاقستان رەسپۋبليكاسىنىڭ تاۋەلسىزدىك جىلدارىندا العاش رەت «كينەماتوگرافيا تۋرالى» زاڭ جوباسى ازىرلەندى. بۇل كينەماتوگرافيانىڭ دەربەس تىنىسىن اشاتىن مادەنيەت سالاسىنداعى العاشقى زاڭ. زاڭنىڭ قابىلدانۋى قازاقستان كينەماتوگرافيا تاريحىنداعى ماڭىزدى وقيعا بولادى دەپ سەنەمىن»، - دەپ توقتالدى مينيستر.

ا. مۇحامەدي ۇلىنىڭ سوزىنە قاراعاندا، زاڭ جوباسىندا فيلمدەردىڭ پروكات ءتىلى ماسەلەسىنە ەرەكشە كوڭىل بولىنگەن.

«بۇگىنگى كۇنى قولدانىستاعى «مادەنيەت تۋرالى» زاڭنىڭ فيلمدەردى قازاق تىلىنە مىندەتتى تۇردە دۋبلياجداۋعا قاتىستى بابى دەكلاراتيۆتى بولىپ تابىلاتىنى بەلگىلى. ەلگە 300 گە جۋىق شەتەلدىك فيلمدەر اكەلىنەدى جانە ولاردىڭ بارلىعىنىڭ پروكاتى قازاق تىلىندە نۇسقاسىز جاسالادى. ول كوپتەگەن سەبەپتەرگە بايلانىستى. ەگەر حالىقارالىق تاجىريبەگە جۇگىنسەك، قىتايدا، ا ق ش- تا بارلىق فيلمدەردى ءتۇپ نۇسقا تىلىنەن اۋديتوريانىڭ تىلىنە سۋبتيترلەرمەن قامتاماسىز ەتۋ مىندەتتى شارت بولىپ تابىلادى. سوندىقتان ءبىز قازاق تىلىنە اۋدارۋدىڭ ءۇش نۇسقاسىن ۇسىندىق - بۇل دۋبلياج، نە سۋبتيترلەۋ، نە فيلمدەردى كادردان تىس اۋدارما جاساۋ. بۇل جالعا بەرۋ ءتىلى بويىنشا نورمالاردى تولىققاندى ىسكە اسىرۋعا مۇمكىندىك بەرەتىن ەڭ قولايلى جانە ءتيىمدى تەتىكتەردىڭ ءبىرى دەپ سانايمىز»، - دەدى ۆەدومستۆو باسشىسى.