استانادان تۇركىستانعا ءبىر پويىزبەن بارۋعا بولادى

None
None
استانا. قازاقپارات - بۇدان بىلاي استانادان تۇركىستان وبلىسىنىڭ ورتالىعىنا دەيىن پويىز اۋىستىرماي- اق جەتۋگە مۇمكىندىك تۋادى، دەپ حابارلايدى قازاقپارات «جولاۋشىلار تاسىمالى» ا ق باسپا ءسوز قىزمەتىنە سىلتەمە جاساپ.

«جولاۋشىلار تاسىمالى» ا ق تۇركىستان وبلىسىنا كولىك قاتىناسىن دامىتۋ جانە جولاۋشىلاردى قازاقستاننىڭ تانىمال تۋريستىك ورىندارىنىڭ بىرىنە قاراي تاسىمالداۋ ماقساتىندا 176/175№ استانا-1 - شىمكەنت پويىزىنىڭ باعىتىن وبىلستىڭ اكىمشىلىك ورتالىعى - تۇركىستان قالاسىنا دەيىن ۇزارتىپ جاتىر» دەلىنگەن حابارلامادا.

تۇركىستان - قازاقستاننىڭ ەڭ ەجەلگى قالالارىنىڭ ءبىرى، ول شىمكەنتتىڭ سولتۇستىك- باتىسىندا ورنالاسقان. وندا قوجا احمەت ياسساۋي، ارىستان باب ماۆزولەيلەرى، ازىرەت سۇلتان قورىق مۋزەيى جانە ت. ب. ورنالاسقان.

العاشقى باعىت وسى جىلدىڭ 2- قاراشاسىندا استانا-1 ستانساسىنان شىعىپ، تۇركىستان ستانساسىنا 3- قاراشادا جەتەدى. كەرى باعىتتاعى پويىز تۇركىستان ستانساسىنان 4- قاراشادا جولعا شىعىپ، ەلورداعا 5- قاراشادا كەلەدى.

پويىزدىڭ قۇرامىندا 10 ۆاگون بار (5 كۋپە، 5  پلاتسكارت)، جالپى ورىندار سانى - 434 (174 كۋپە، 260 پلاتسكارت).

مارشرۋت مىنا ستانسالارعا توقتايدى: قاراعاندى، اقادىر، سارىشاعان، شىعاناق، شۋ، لۋگوۆوە، تاراز، بوراندى، تۇلكىباس، مانكەنت، شىمكەنت، ارىس-2. باعىتتىڭ قاشىقتىعى - 1646 كيلومەتر، 25 ساعات 3 مينۋت بارۋ جانە 25 ساعات 26 مينۋت قايتۋعا جۇمسالادى.

پويىزدىڭ كەستەسى جولاۋشىلارعا ىڭعايلى ەتىپ جاسالعان. پويىز استانادان جۇپ كۇندەرى 21 ساعات 40 مينۋتتا شىعىپ، تۇركىستان ستانساسىنا تاق كۇندەرى 22 ساعات 43 مينۋتتا جەتەدى. كەرى باعىتتا جۇپ كۇندەرى 11 ساعات 30 مينۋتتا اتتانىپ، ەلورداعا تاق كۇندەرى 12 ساعات 56 مينۋتتا كەلەدى. بۇل كەستە پويىزدار قوزعالىسىنىڭ جاڭا كەستەسى شىققانعا دەيىن (2018-جىلدىڭ 9- جەلتوقسانىنا دەيىن) جۇمىس ىستەيدى.

سوڭعى جاڭالىقتار