قازاقستان پروكاتىنا كوكپار تۋرالى «مىقتىلار زامانى» اتتى فيلم شىعادى

الماتى. قازاقپارات - الماتىدا «تاباندىلار تارتىسى» تولىق مەتراجدى سپورتتىق دراما/ەكشننىڭ پرەمەراسى ءوتتى.

فيلمدە تۇركى حالىقتارىنىڭ ۇلتتىق ات سپورتى ويىنى - كوكپاردىڭ شىعۋ تاريحى كورسەتىلگەن، دەپ حابارلايدى قازاقپارات ءتىلشىسى.

فيلمدى ءتۇسىرۋ ءۇشىن 1100 ادام جۇمىس ىستەگەن، وعان بىرنەشە اي كەتكەن. بۇل جوبانى «سالام، New York» ، «انامدى ىزدەپ» فيلمدەرىمەن تانىلعان قىرعىزستاندىق رەجيسسەر رۋسلان اكۋن تاسپالاعان.

«بۇل رۋسلان اكۋننىڭ USC School of Cinematic Arts ماگيستراتۋراسىن تامامداعاننان كەيىنگى وسىنداي اۋقىمدى كولەمدەگى العاشقى جۇمىسى. بۇل فيلم شىنىندا دا وتە ماعىنالى جانە اسەرلى بولىپ شىقتى. وندا تەك قازاقستان مەن قىرعىزستاننىڭ عانا ەمەس، سونداي-اق ت م د ەلدەرىنىڭ قازىرگى قوعامداعى وزەكتى ماسەلەلەرى قوزعالعان»، - دەپ ەسەپتەيدى فيلمنىڭ پروديۋسەرى نۇربەك ايباشيەۆ.

كينوكارتينا تالانتتى كوكپار ويىنشىسى، «جالىن» كومانداسىنىڭ كاپيتانى ماقسات جايىندا بولادى. ماڭىزدى ءبىر كەزەكتى ويىنداعى جەڭىلىستەن كەيىن، «جالىن» كومانداسىنىڭ يەسى جاراقات العان اتپەن الاڭعا شىعۋدان باس تارتقان ماقساتتى كوماندادان شىعارماق بولادى. ءوزىنىڭ اۋىلىنا ورالعاننان كەيىن جاس جىگىت جاڭا كوماندا جيناپ، وسى سپورتتىڭ بيىك شىڭىنا جەتۋدىڭ اۋىر جولىن باستايدى.

«كوكپار» فيلمىنىڭ باستى رولدەرىندە قازاقستاندىق اكتەر ءارى كاسكادەر اسىلحان تولەپوۆ جانە اكتريسا گۇلناز جولانوۆا وينايدى.

سونداي-اق، باستى رولدەردىڭ ءبىرىن قىرعىزستاننىڭ تانىمال اكتەرى، ايگىلى شوۋمەن ەميل ەسەناليەۆ سومدايدى.

«مىقتىلار زامانى» فيلمىن تۇسىرۋگە كوكپارعا قاتىسىپ جۇرگەن قىرعىزستاننىڭ ۇزدىك جىلقىلارى ىرىكتەلىپ الىنعان.