شۆەيتسارياعا ەكولوگيالىق قاۋىپ ءتونىپ تۇر
بۇل 1995-جىلدان بەرى جەرسەرىگىنەن تۇسىرىلگەن 6,5 مىڭ سۋرەتتى زەرتتەگەن جەنيەۆا ۋنيۆەرسيتەتى عالىمدارىنىڭ پىكىرى. مۇنداي عىلىمي جۇمىس جەرگىلىكتى بيلىككە دە ءتيىمدى. سەبەبى ەرىگەن قار سۋىنىڭ قاۋپى دە انىقتالادى. جوبا جەتەكشىسى گرەگوري دجۋليانيدىڭ ايتۋىنشا، وزگەرىس تۋريزممەن جان باعىپ وتىرعان ەل ەكونوميكاسىنا دا كەسىرىن تيگىزبەي قويمايدى.
«ۆالە كانتونى - شاڭعى تەبۋگە قولايلى شۆەيتساريانىڭ ەڭ تانىمال جەرى. العاشقى ونجىلدىقتا وسىنداي وزگەرىسكە تاپ بولدىق. قارا كوكپەن بويالعان جەردە قالىڭ قار جاتقانىن بىلدىرەدى. ەندى ءدال وسى جەردى 2015 پەن 2017-جىلدار ارالىعىندا سالىستىرساق، قاردىڭ بىرتىندەپ ازايىپ بارا جاتقانىن بايقاۋعا بولادى. قاردىڭ ەرۋى تۋريستىك يندۋسترياعا دا تەرىس ىقپال ەتەدى. ۆالەدە دەمالۋ ورىندارى وتە كوپ. اسىرەسە تاۋ تۋريزمى شىعىنعا ۇشىراۋى مۇمكىن»، - دەيدى زەرتتەۋ جوباسىنىڭ جەتەكشىسى گرەگوري دجۋلياني.
2017-جىلى شۆەيتسارياعا اعىلعان ساياحاتشىلاردىڭ ءنوپىرى بىرنەشە ەسە ارتتى. فەدەرالدى ستاتيستيكالىق باسقارماسىنىڭ مالىمەتى بويىنشا وتكەن جىلى تۋريزم سالاسى ەل قازىناسىنا 47 ميلليارد شۆەيتساريا فرانكىسىن قۇيعان ەكەن.