يتاليادا ەۋروپاداعى ەڭ بيىك اسپالى كوپىر پايدا بولادى

استانا. قازاقپارات - يتالياداعى ۆال تارتانو القابىندا ەۋروپاداعى ەڭ بيىك اسپالى كوپىر سالىنىپ جاتىر. موربەن جانە سوندريو ەلدى مەكەندەرىن جالعاستىراتىن بۇل قۇرىلىس 22- قىركۇيەكتە اشىلادى، دەپ حابارلايدى قازاقپارات Coriere della Sera باسىلىمىنا سىلتەمە جاساپ.

«اسپانداعى كوپىر» اتاۋىنا يە بولعان نىسان بيىكتىگى 1034 مەترلىك ەكى تاۋ شىڭىن جالعاستىرادى. كوپىردىڭ ۇزىندىعى -234 مەتر، ول 140 مەتر بيىكتىكتە ورنالاسادى. مۇنىڭ قۇرىلىسىنا 750 مىڭ ەۋرو جۇمسالدى.

ەندى ەرەكشە كوپىر ارقىلى جەرگىلىكتى تۇرعىندار وزگە ەلدى مەكەندەرگە جىلدام جەتپەك. سونداي-اق تۋريستەردىڭ جەرگىلىكتى تابيعاتتىڭ اسەم كورىنىستەرىن - كولومبەر سۋ بوگەتىن، ءالپى شىڭدارىن، اددا وزەنىنىڭ سارقىراماسىن، جايىلىمدىقتى تاماشالاۋعا مۇمكىندىك تۋادى.