شيەلىدە كاسىپكەر سپورت كەشەنىن سالىپ بەردى

شيەلى. قازاقپارات - قىزىلوردا وبلىسى شيەلى اۋدانى توڭكەرىس اۋىلدىق وكرۋگىنىڭ ورتالىعى - شەگەن قودامانوۆ اۋىلىندا جاڭا سپورت كەشەنى سالتاناتتى تۇردە اشىلدى، دەپ حابارلايدى قازاقپارات ءتىلشىسى.

سپورت كەشەنى «توڭكەرىس-ك» ج ش س ديرەكتورى باۋىرجان كوپەيەۆتىڭ جەكە قاراجاتىمەن بوي كوتەردى. اتالمىش كەشەننىڭ جوبالىق قۇنى - 97 ميلليون 300 مىڭ تەڭگە.

يگىلىكتى شاراعا قىرىمبەك كوشەربايەۆ قاتىستى. ەل الدىندا ول ءوز لەبىزىن ءبىلدىردى.

«ءبىزدىڭ دانا حالقىمىز «جانى سەرگەكتىڭ ءتانى سەرگەك» دەپ تەگىن ايتپاعان. بۇگىنگى زىمىران زاماننىڭ تالابى دا بەلگىلى: تەك دەنى ساۋ ۇلت قانا مىنا مىڭ قۇبىلعان الەمدە باسەكەگە قابىلەتتى بولا الادى. ەندەشە، بۇل سپورت كەشەنىنىڭ اشىلۋى تەك سپورتشىلار ءۇشىن عانا ەمەس، بارشامىز ءۇشىن قۋانىش»، - دەدى وبلىس اكىمى.

ەلباسى جولداۋىندا ايتىلعانداي، 2020-جىلعا دەيىن بۇقارالىق سپورتپەن اينالىساتىن قازاقستاندىقتاردىڭ سانىن 30 پايىزعا دەيىن كوتەرۋ باعىتىندا سىر وڭىرىندە يگىلىكتى ىستەر قولعا الىنىپ كەلەدى. وسى ماقساتتا شيەلى اۋدانىندا زاماناۋي سپورت الاڭدارى، دەنە شىنىقتىرۋ جانە ساۋىقتىرۋ الاڭدارى كوپتەپ سالىنۋدا.

بىلتىرعى جىلى اۋداندا مەملەكەتتىك-جەكەمەنشىك ارىپتەستىك اياسىندا اقمايا اۋىلىنان جوبالىق قۇنى 70 ميلليون تەڭگەنى قۇرايتىن سپورت كەشەنى پايدالانۋعا بەرىلسە، بيىلعى جىلى 42 ميلليون تەڭگەنىڭ سپورت كەشەنى العاباس اۋىلىندا حالىق يگىلىگىنە تابىستالدى. سونداي-اق ەڭبەكشى، جولەك اۋىلدارىندا دا ءدال وسىنداي سپورت كەشەندەرى ىسكە قوسىلدى. سونىمەن بىرگە، كەردەلى، بەستام اۋىلدىق وكرۋگتەرىندە مەملەكەتتىك-جەكەمەنشىك ارىپتەستىك اياسىندا سپورتتىق ساۋىقتىرۋ كەشەندەرىنىڭ قۇرىلىسى جۇرگىزىلۋدە.