كيم چەن ىن: كورەيا تۇبەگىندەگى جاعدايدى تۇراقتاندىردىق

پحەنيان. قازاقپارات - سەيسەنبى كۇنى سولتۇستىك كورەيا كوشباسشىسى كيم چەن ىن ءوڭىردى تۇراقتاندىرعان امەريكا قۇراما شتاتتارىمەن كورەيا تۇبەگىن يادرولىق قارۋسىزداندىرۋ تۋرالى كەلىسسوزدەردى ىلگەرى دامىتۋعا ۇمىتتەنەتىنىن جەتكىزدى، دەپ حابارلايدى قازاقپارات رەنحاپ اگەنتتىگىنە سىلتەمە جاساپ.

كيم مۇنداي پىكىردى وڭتۇستىك كورەيا پرەزيدەنتى مۋن چجە ينمەن پحەنيانداعى ءۇشىنشى ەكىجاقتى سامميت كەزىندە ءبىلدىردى. ول 12 - ماۋسىمدا سينگاپۋردە ا ق ش پرەزيدەنتى دونالد ترامپپەن تاريحي كەزدەسۋ وتكىزۋگە ىقپال ەتكەنى ءۇشىن وڭتۇستىك كورەيا پرەزيدەنتىنە العىس ايتتى.

«پرەزيدەنت مۋن سولتۇستىك كورەيا مەن ا ق ش اراسىندا تاريحي كەلىسسوزدەر وتكىزۋگە كومەكتەستى»، - دەدى سولتۇستىك كورەيا كوشباسشىسى پحەنيانداعى سامميتتە.

«وسىنىڭ ارقاسىندا وڭىردەگى احۋال تۇراقتاندى. پرەزيدەنت مۋننىڭ قوسقان ۇلەسى ءۇشىن تاعى دا راحمەت ايتامىن»، - دەدى كيم.

ايتا كەتكەن ءجون، وڭتۇستىك كورەيا پرەزيدەنتى وسى سامميت بارىسىندا سولتۇستىك كورەيالىق ارىپتەسىن «باتىل شەشىم قابىلداعانى» ءۇشىن ماقتادى.

مۋن پحەنيانعا تاڭەرتەڭ ەرتە كەلىپ، وسى ەلگە كەلگەن وڭتۇستىك كورەيانىڭ ءۇشىنشى كوشباسشىسى اتاندى. كوشباسشىلار كەزدەسۋى كورەيا جۇمىس پارتياسى ورتالىق كوميتەتىنىڭ شتاب- پاتەرىندە ءوتتى. بۇل سولتۇستىك كورەيا كوشباسشىسىنىڭ شەتەلدىك مەملەكەت باسشىسىن جۇمىس پارتياسى ورتالىق كوميتەتىنىڭ كەڭسەسىندە العاش رەت قابىلداۋى ەدى.

كەزدەسۋ بارىسىندا وڭتۇستىك كورەيا پرەزيدەنتى الەمگە سولتۇستىك كورەيانىڭ كورەيا تۇبەگىن يادرولىق قارۋسىزداندىرىپ، بەيبىتشىلىك ورناتۋدى قالايتىنىن كورسەتۋ قاجەتتىگىن اتاپ ءوتتى.

«بۇكىل الەمنىڭ نازارى بىزدە، سوندىقتان الەمدەگى بارلىق ادامدارعا بەيبىتشىلىك پەن گۇلدەنۋدىڭ جەمىسىن كورسەتەمىز دەپ ۇمىتتەنەم»، - دەدى مۋن.

 باسقوسۋ جەرگىلىكتى ۋاقىتپەن كەشكى ساعات 5:45-تە اياقتالدى. مۋن مەن كيم سارسەنبى كۇنى تاڭەرتەڭ كەلىسسوزدەردىڭ ەكىنشى كەزەڭىن وتكىزۋ ءۇشىن كەزدەسەدى.