كوكشەتاۋدا گولوۆكينگە ارنالعان فلەشموب ءوتتى
اكسيانىڭ ۆيدەوسى BMW اۆتوقاۋىمداستىعىنىڭ ينستاگرام جەلىسىندە جاريالاندى. وندا 20 عا جۋىق ماشينا «GGG» جازۋىن كورسەتىپ، تىزبەكتەلىپ تۇر. سونداي- اق بەينەۇزىندىدە كولىكتەردىڭ اسفالت ۇستىندەگى دريفتىن كورۋگە بولادى. الەۋمەتتىك جەلى قولدانۋشىلارى فلەشموبقا جانە 16 - قىركۇيەك كۇنى مەكسيكالىق بوكسشى ساۋل الۆارەستەن جەڭىلگەن قازاقستاندىق كاسىپقوي بوكسشى گەننادي گولوۆكينگە قاتىستى ءتۇرلى پىكىرلەر قالدىرۋدا.
ءبىرى: «دۇرىس، ول ءبىزدىڭ چەمپيون جانە سولاي بولىپ قالا بەرەدى» دەسە، ەندى ءبىرى گەنانىڭ جەڭىلگەنىنە ءالى دە سەنبەيتىنىن جازادى.
«GGG» ارينە، كانەلودان مىقتى. ەگەر سوڭعى كەزدەسۋدى تارازىلاساق «GGG» بارىن سالعان جوق. مەنىڭ ويىمشا، ونىڭ بۇدان دا جاقسى ونەر كورسەتۋگە مۇمكىندىگى بار. ول ءوزى جەڭىلگىسى كەلگەن سياقتى» ، دەپ جازادى «mart_ell» اككاۋنتىمەن تىركەلگەن قولدانۋشى.
ەسكە سالايىق، گولوۆكين - «كانەلو» رەماتچى 16 - قىركۇيەك كۇنى امەريكا قۇراما شتاتتارىنىڭ لاس ۆەگاس قالاسىنداعى T- Mobile Arena-دا وتكەن بولاتىن. ناتيجەسىندە وتانداسىمىز تورەشىلەر شەشىمىمەن (113-115, 114-114, 113-115) جەڭىلىپ، WBA Super، WBC جانە IBO تۇجىرىمدارى بويىنشا ورتا سالماقتاعى چەمپيوندىق بەلدىكتەرىنەن ايىرىلدى. ولاردىڭ ءبىرىنشى ايقاسى بىلتىر تەڭ ناتيجەمەن اياقتالعان ەدى.