قوستانايداعى عاسىردان استام تاريحى بار مەشىت بۇزىلمايدى

قوستاناي. قازاقپارات - قوستاناي ورتالىعىنداعى مارال يشان مەشىتى تاريحي- ولكەتانۋ مۋزەيىنىڭ باللانسىنا بەرىلدى، دەپ حابارلايدى قازاقپارات وبلىستىق مادەنيەت باسقارماسىنىڭ باسشىسى ەرلان قالماقوۆقا سىلتەمە جاساپ.

ەل اراسىندا اقمەشىت اتاۋىمەن تانىمال مارال يشان مەشىتى 1893 -جىلى قۇرىلعان. ەكىنشى دۇنيەجۇزىلىك سوعىس جىلدارىندا وندا ەۆاكۋاتسيالىق پۋنكت ورنالاستى. سوعىستان كەيىنگى جىلدارى كينوتەاتر، 1980-1991 -جىلدارى فيلارمونيا جايعاستى. 1991 -جىلعى 1 - قاراشادا مەشىت حالىققا قايتارىلدى. سول جىلى 70 جىل ۇزىلىستەن كەيىن العاش رەت قۇربان ايت نامازى وقىلدى.

2002 -جىلى مەشىتكە عۇلاما مارال يشان قۇرمان ۇلىنىڭ ەسىمى بەرىلدى.

وبلىستىق مادەنيەت باسقارماسىنىڭ باسشىسى ەرلان قالماقوۆتىڭ ايتۋىنشا، اتالعان مەشىت تامىز ايىنا دەيىن قازاقستان مۇسىلماندارى ءدىني باسقارماسىنىڭ باللانسىندا بولعان.

«مەشىت ەكى جىل بويى پايدالانباي تۇردى. عيمارات ەسكىردى، ءىشى- سىرتى ابدەن توزعاندىقتان، ونى اۋەلى قالپىنا كەلتىرۋ قاجەت. وسى ۋاقىتقا دەيىن عيماراتتى مەشىت رەتىندە ساقتاپ قالۋ ماسەلەسى قاراستىرىلىپ كەلدى. مۇسىلماندار ءدىني باسقارماسى مەشىتتى قايتا جاڭعىرتا المادى»، - دەدى ەرلان قالماقوۆ اگەنتتىك تىلشىسىنە.

تۇرعىندار اراسىندا مەشىتتىڭ بۇزىلۋى مۇمكىن ەكەنى ايتىلعانى راس. بۇل ماسەلە كوكتەمدە وبلىس اكىمىنىڭ ەسەپ بەرۋ كەزدەسۋىندە دە كوتەرىلدى.

«وبلىس تۇرعىندارى بۇل عيماراتتى مەشىت قانا ەمەس، جالپى تاريحي ورىن رەتىندە ساقتاپ قالۋ تۋرالى ماسەلە قوزعادى. ەندى ءبىز بۇل نىساندى جەرگىلىكتى اتقارۋشى ورگاننىڭ بالانسىنا وتكىزەمىز. الداعى ۋاقىتتا قالپىنا كەلتىرۋ جۇمىستارىنا جۇمسالاتىن شىعىن ەسەپتەلەتىن بولادى. جوندەۋگە كەتەتىن قارجى قايدان الىناتىنىن ازىرگە ايتا المايمىز»، - دەدى باسقارما باسشىسى.

سونىمەن، اقمەشىت وبلىستىڭ تاريحي- ولكەتانۋ مۋزەيىنىڭ باللانسىنا ءوتتى. ەندى عيماراتتىڭ جوبالىق- سمەتالىق قۇجاتتارى جاسالماق.

Мuftyat.kz سايتىنىڭ مالىمەتىنە سۇيەنسەك، مەشىت اۋماعى 844,3 شارشى مەترگە تەڭ. ءبىر كۇمبەزدى، ءبىر مۇنارالى، ال كۇمبەزىنىڭ بيىكتىگى - 18,890 مەتر، مۇناراسىنىڭ بيىكتىگى - 22,745 مەتر. مەشىت 1000 ادامعا ارنالعان.

فوتو: kst-museum.kz

اۆتور: قاسقىرباي قويشىمانوۆ