جۇمىسقا جاياۋ بارامىن - استانانىڭ جاڭا اكىمى

استانا. قازاقپارات - استانا قالاسىنىڭ اكىمى باقىت سۇلتانوۆ اكىمدىكتىڭ پروگرەسسيۆتى باستامالارىن جالعاستىرۋعا مۇددەلى، دەپ حابارلايدى قازاقپارات ءتىلشىسى.

«مەن بۇرىن دا تاڭەرتەڭ جۇمىسقا جاياۋ باراتىن ەدىم. قازىر دە ءۇيىم جاقىن. ەندى، ءسال اينالىپ بارۋ قاجەت. دەگەنمەن، ونىڭ دا جاڭا جۇمىسىما كومەگى بار. سەبەبى كوشەمەن كەلە جاتقاندا ءبىراز كەمشىلىكتەردى كورىپ، ءتيىستى تاپسىرمالاردى بەرۋگە مۇمكىندىك بار. ال كۇندىز وسى ۇكىمەتكە جانە باسقا دا وتىرىستارعا كەلگەندە تاكسيگە مىنەمىن. ويتكەنى اكىمدىكتىڭ بۇرىنعى پروگرەسسيۆتى يدەيالارىن توقتاتۋعا بولمايدى. سونىڭ ءبارىن جالعاستىرۋ قاجەت. مەنىڭ مىندەتتەرىمنىڭ ءبىرى - ول جاڭا يننوۆاتسيالىق ءارى كرەاتيۆتى يدەيالاردى توقتاتپاۋ، ناقتى ناتيجەگە جەتۋ»، - دەدى ب. سۇلتانوۆ ۇكىمەتتىڭ بۇگىنگى وتىرىسىنان كەيىن.

 قالا اكىمى قازىرگى جۇمىسىن بۇرىنعى مينيستر قىزمەتىمەن دە سالىستىردى. ونىڭ ايتۋىنشا، مينيسترلىكتە، كوبىنەسە، ساياسات پەن زاڭ شىعارۋ شارالارى باسىم بولدى. ال قالا بولەك ءبىر «قوجالىق» ىسپەتتى. «ەندى، استانانى بولەك ءبىر «قوجالىق» دەپ ەسەپتەۋگە بولادى عوي. ونىڭ ءارتۇرلى پروبلەمالارى بار. ەڭ الدىمەن، قالا تۇرعىندارىنان كەلەتىن تالاپتارعا نازار اۋدارۋ قاجەت. سونىڭ ءبارىن جەرگە تاستاماي، دەر كەزىندە ورىنداۋ قاجەت. سوندىقتان بۇل قىزمەت - مەن ءۇشىن پراكتيكالىق جۇمىس. ءار ادامنىڭ مانسابىنا قاجەت دەپ ويلايمىن. مەنىڭ الەۋمەتتىك جەلىلەردە اككاۋنتتارىم بار. سونىڭ ءبارىن ءجيى- ءجيى قاراپ تۇرامىن. ءبىراق جۇمىس كوپ بولعاننان كەيىن تىكەلەي ءوزىم جاۋاپ بەرە المايتىن شىعارمىن. دەگەنمەن، اشىق بولۋعا، كەرى بايلانىس ورناتۋعا تىرىسامىز. اكىم جۇمىسىنىڭ باستى ارتىقشىلىعى - تازا اۋادا ءجيى جۇرەسىڭ. سەبەبى بارلىق نىسانداردى ارالاپ، جۇمىستى ءوز كوزىڭمەن كورۋىڭ كەرەك»، - دەپ اتاپ كورسەتتى ب. سۇلتانوۆ.

 ايتا كەتەيىك، جۋرناليستەرگە سۇحبات بەرگەن قالا اكىمى ەڭ الدىمەن قاي ماسەلەلگە ءمان بەرەتىنىن دە ايتىپ بەردى. «ارينە، بۇل جۇمىس وتە قىزىقتى. ءبىر جاعىنان جوعارى تالاپتار قويىلىپ وتىر. سەبەبى استانا ءوسىپ كەلەدى، حالىقتىڭ سانى دا كوبەيىپ جاتىر. قازىردىڭ وزىندا ميلليوننان استام حالىق تۇرادى. سوندىقتان قىزمەت كورسەتۋ ساپاسىن دا ارتتىرۋ قاجەت. وتكەن جەتىدە ەلباسى اكتيۆپەن بولعان كەزدەسۋ كەزىندە ءبىراز ماسەلەلەردى كوتەرىپ، ناقتى تاپسىرمالار بەردى. سونىڭ ىشىندە ەلوردانى دامىتۋدىڭ جاڭا مودەلىن ازىرلەۋ مىندەتى بار. وسىعان بايلانىستى اكىمدىك قىسقا ۋاقىتتىڭ ىشىندە استانانى دامىتۋدىڭ 2050 -جىلعا دەيىنگى ستراتەگياسىن ۇسىنۋى قاجەت. ءبىز وسى جۇمىستى باستاپ كەتتىك»، - دەيدى ب. سۇلتانوۆ.

اۆتور: ارمان اسقاروۆ