كانەلونىڭ دوپينگپەن ۇستالعانى راس پا - قازاقستان كاسىبي بوكس فەدەراتسياسىنىڭ جاۋابى

استانا. قازاقپارات - قازاقستاننىڭ كاسىبي بوكس فەدەراتسياسى ساۋل الۆارەس «كانەلونىڭ» دوپينگپەن ۇستالۋى تۋرالى اقپاراتتى تەرىسكە شىعاردى، دەپ حابارلايدى قازاقپارات ءتىلشىسى.

مامىر ايىندا ءۇشىنشى جەكپە-جەك وتكىزۋ تۋرالى دا ەشقانداي كەلىسسوز جۇرگىزىلمەگەن.

«كانەلونىڭ دوپينگپەن ەكىنشى رەت ۇستالۋى تۋرالى اقپارات جالعان. مۇنداي مالىمدەمەنى ەشكىم جاساعان جوق. مامىر ايىندا ءۇشىنشى كەزدەسۋ وتكىزۋ تۋرالى اقپاراتقا دا كۇمانىم بار. بۇل تۋرالى «Golden Boy» پروموۋتەرلەرى مەن گولوۆكيننىڭ پروموۋتەرى توم لەففلەر رەسمي حابارلاۋى كەرەك. ەگەر ولار بۇل تاقىرىپتا سويلەسسە، بىزگە حابار جەتەر ەدى. ازىرگە ەش حابار جوق. ءۇشىنشى جەكپە-جەك تۋرالى ەشكىم ەشقانداي كەلىسسوز جۇرگىزگەن جوق»، - دەدى ق ك ب ف ۆيتسە-پرەزيدەنتى ۆيكتور دەميانەنكو قازاقپارات تىلشىسىنە بەرگەن سۇحباتىندا.

ۆيتسە-پرەزيدەنتتىڭ ايتۋىنشا، سوققىلاردى ەسەپكە الاتىن كومپيۋتەرلىك جۇيەنىڭ ەسەبى رەسمي دەرەك بولىپ سانالمايدى.

«بۇعان دەيىن دە گولوۆكيننىڭ جەڭىلگەنىن ايتقانمىن. بۇل جولى گولوۆكين سوڭىنا دەيىن ايقاسپادى. ونىڭ بوكستاسۋ مانەرى تورەشىلەردىڭ كانەلونىڭ پايداسىنا شەشىم شىعارۋىنا جەتكىلىكتى بولدى. ال كومپيۋتەرلىك جۇيەنىڭ ەسەبى رەسمي دەرەك بولىپ سانالمايدى. جەكپە-جەكتە وتىرعان تورەشىلەر ءاربىر راۋندتى ءجىتى باقىلاپ، ناتيجەسىن كورسەتتى. مۇنى ەندى ەشكىم وزگەرتە المايدى»، - دەدى ول.

سونىمەن بىرگە، دەميانەنكو «ءۇشىنشى كەزدەسۋ بولعان كۇندە دە وتانداسىمىزدىڭ جەڭىسكە جەتۋى مۇمكىن بە؟» دەگەن سۇراققا جاۋاپ بەردى.

«ارينە، مۇمكىن. بوكس - ادام بولجاي المايتىن سپورتتىڭ ءتۇرى. جەڭىسكە جەتۋ ءۇشىن ءبىر سوققىنىڭ ءوزى جەتكىلىكتى. سوندىقتان، مۇندا قوس تاراپتىڭ دايىندىعىنا قاراپ بولجام عانا جاساي الامىز. مۇندا دا نيۋانستار كوپ، سپورتشىلار جاتتىعۋدا جاراقات الۋى مۇمكىن، اۋىرىپ قالۋى مۇمكىن. سوندىقتان، قىزىقتىڭ ءبارى الدا»، - دەدى ۆيكتور دەميانەنكو.