ارىستانبەك مۇحامەدي ۇلى: تۇراقتىلىق - تۋريزمدى دامىتۋدىڭ باستى كەپىلى

استانا. قازاقپارات - ەلوردادا «بىرلىككە بارار جولدا» اتتى جىبەك جولىنا قاتىسۋشى ەلدەردىڭ حالىقارالىق فورۋمى باستالدى، دەپ حابارلايدى قازاقپارات ءتىلشىسى.

فورۋمدى ق ر مادەنيەت جانە سپورت مينيسترلىگى تاپسىرىسىمەن جانە اۋە كولىگى حالىقارالىق قاۋىمداستىعىنىڭ (ءى ا ت ا) قولداۋىمەن «Kazakh Tourism» ۇ ك» ا ق وتكىزىپ جاتىر. شارا اياسىندا بىرنەشە پانەلدىك كەزدەسۋ وتكىزىلىپ، تۋريستىك سالانىڭ ءار ەلدەن كەلگەن ماماندارى سەرۆيس ستاندارتتارىن جەتىلدىرۋ، تۋريزم ماركەتينگىن ءتيىمدى ەتۋ، ينتەرنەتتەگى قىزمەتتەردى ناسيحاتتاۋ، دوستاستىق ەلدەردىڭ تابىس تاريحى، حالىقارالىق اۋە تاسىمالدارىن دامىتۋ، كولىك سالاسىنىڭ ينۆەستيتسيالىق الەۋەتىن ارتتىرۋ مەن جىبەك جولى ەلدەرىنىڭ ءوزارا سەرىكتەستىگىنىڭ بولاشاعىن تالقىلايدى.

«بيىل الاكول مەن بۋرابايدا، وزگە تۋريستىك نۇكتەلەر تۋريستەرگە تولىقتى دەپ اۋىز تولتىرىپ ايتۋعا بولادى. وسىناۋ انشلاگتىڭ ءوزى ءبىزدىڭ تۋريزم سالاسىندا بەلسەندى جۇمىسىمىزدىڭ ايقىن دالەلى. البەتتە، ءبىز وسى دامۋ داڭعىلىن جالعاستىرعىمىز كەلەدى. مەملەكەت باسشىسى الاكولگە، بۋرابايعا، ماڭعىستاۋعا ءجيى بارىپ تۇراتىنىن بىلەسىزدەر. جۋىقتا انكاراعا بارعان كەزدە ەكى ەلدىڭ باسشىلارى (قازاقستان مەن تۇركيا ەلدەرىنىڭ باسشىلارى) دا تۋريزم سالاسىندا ىنتىماقتاسۋدى ەرەكشە اتاپ وتكەن بولاتىن. ءوزىمنىڭ ارىپتەسىم تۇركيا رەسپۋبليكاسىنىڭ مادەنيەت جانە تۋريزم مينيسترىمەن سول جەردە بايانداما جاساعان ەدىم»، - دەدى ق ر مادەنيەت جانە سپورت ءمينيسترى ارىستانبەك مۇحامەدي ۇلى فورۋم سىرتىندا تىلشىلەرگە بەرگەن سۇحباتىندا.

مينيستر قازىرگى تاڭدا شەتەلدىك تۋروپەراتورلاردىڭ قازاقستانعا دەگەن قىزىعۋشىلىعى جىل ساناپ ارتىپ كەلە جاتقانىن اتاپ ءوتتى.

«شىنىندا دا، ولارمەن سەرىكتەستىك ءبىز ءۇشىن ۇلكەن ۇمىتتەرگە جول اشادى. سەرۆيستىك ورتالىقتاردىڭ كوپتەپ سالىنۋىندا العاشقى قادامداردى جاساپ جاتقانىمىزدى بىلەسىزدەر. بۇگىنگى تاڭدا الدىڭعى كەزەكتە بۋراباي، الماتى، شىعىس قازاقستان وبلىستارىندا تۋريزم سالاسى ءبىرشاما جولعا قويىلعان. مەملەكەت باسشىسىنىڭ تاپسىرماسى بويىنشا ءبىز وسى جىلدىڭ سوڭىنا دەيىن تۋريزم تۋرالى زاڭ مەن ءتۋريزمدى دامىتۋدىڭ مەملەكەتتىك باعدارلاماسىن تانىستىرۋىمىز كەرەك. قازاقستاندا وسىنداي شارالاردى كەڭىنەن وتكىزگەن ءجون. ماقساتىمىز وتە زور. تۇراقتىلىق پەن ىنتىماقتاستىق ەڭ ماڭىزدى فاكتور. ءبىزدىڭ ەلدەگى تۇراقتىلىقتى ماقتانىشپەن ايتا وتىرىپ، تۇراقتىلىق تۋريزمدى دامىتۋدىڭ باستى كەپىلى ەكەنىن ايتا كەتكىم كەلەدى»، - دەدى مينيستر.