قازاقستان ەشبىر ەلدىڭ ازاماتىنا شەكارادا قاساقانا تەكسەرۋ جۇرگىزبەيدى
قىرعىز ديپلوماتتارى نازار اۋدارعان، الماتى حالىقارالىق اۋەجايىندا ورىن العان قىرعىزستان ازاماتتارىنا قاتىستى قازاقستاننىڭ قۇزىرەتتى ورگاندارىنىڭ تەكسەرۋ ءىس- شارالارىن ءتۇسىندىرۋ ماقساتىندا ەلىمىزدىڭ سىرتقى ىستەر ءمينيسترىنىڭ ورىنباسارى عالىمجان قويشىبايەۆ جانە ۇلتتىق قاۋىپسىزدىك كوميتەتى شەكارا قىزمەتىنىڭ ديرەكتورى دارحان ءدىلمانوۆ الماتىدا ارنايى جۇمىس كەزدەسۋىن وتكىزدى. ءىس- شارا بارىسىندا مۇددەلى ۆەدومستۆولاردىڭ قاتىسۋىمەن ق ر مەملەكەتتىك شەكاراسىندا باقىلاۋ- وتكىزۋ پۋنكتتەرىندە وتكىزۋ ءتارتىبىن جەتىلدىرۋ ماسەلەلەرى، شەكارا قىزمەتكەرلەرىنىڭ نەگىزسىز ءىس- ارەكەتتەرىنە جول بەرمەۋ جونىندەگى ماسەلەلەر تالقىلانىپ، وعان ارنايى قىزمەتتىك تەكسەرۋ باستالدى»، - دەدى ايبەك سمادياروۆ.
ونىڭ ايتۋىنشا، كەلەشەكتە قاجەتتى راسىمدەردى جۇزەگە اسىرۋ كەزىندە ءتۇرلى تۇسىنبەۋشىلىكتەردى بولدىرماۋ ماقساتىندا وبەكتيۆتى باقىلاۋ شارالارى كەشەنى جانە ءتيىستى ۆەدومستۆوارالىق كوميسسيا قۇرۋدى قوسا العاندا، بۇزۋشىلىقتارعا جىلدام ارەكەت ەتۋ جۇزەگە اسىرىلادى.
«بۇعان قوسا، كوزدەلگەن شارالار مەملەكەتتىك شەكارادان ءوتۋ ۋاقىتىن مينيمۋمعا دەيىن ازايتادى دەپ كۇتىلۋدە. جالپى العاندا، قازاقستاندىق تاراپ الەمدەگى ەشبىر ەلدىڭ ازاماتتارىنا قاساقانا تەكسەرۋ جۇرگىزبەيتىنىن جانە ق ر مەملەكەتتىك شەكاراسىنداعى باقىلاۋ پۋنكتەرىنەن ءوتۋ راسىمدەرى قابىلدانعان حالىقارالىق ستاندارتتار مەن نورمالارعا ساي ەكەنىن راستايمىز»، - دەدى س ءى م وكىلى.
اۆتور: مارلان جيەمباي