قازاقستان قارتايۋ ءجۇرىپ جاتقان ەلدەر قاتارىنا ەنۋى مۇمكىن

استانا. قازاقپارات - ەكى جىلدان كەيىن قازاقستان تۇرعىندارى اراسىندا قارتايۋ ءۇردىسى باستالعان ەلدەردىڭ قاتارىنا ەنۋى مۇمكىن.

بۇل تۋرالى «ءبىرىڭعاي جيناقتاۋشى زەينەتاقى قورى» باسشىلىعىمەن وتكەن كەزدەسۋدە سەنات دەپۋتاتى ءبىرعانىم ايتىموۆا ءمالىم ەتتى، دەپ حابارلايدى قازاقپارات ءتىلشىسى.

«ءبىزدىڭ ساراپشىلار قازاقستانداعى قارتايۋ ۇردىسىنە الاڭداۋلى. ب ۇ ۇ جىكتەۋىنە سايكەس، ەگەر دە 65 جاستاعى جانە ودان جوعارى جاستاعى ازاماتتار سانى 7 پايىزدى قۇراسا، وندا بۇل قوعام قارتايىپ كەلە جاتقانىن بىلدىرەدى»، - دەدى ب. ءايتىموۆا.

وسى ورايدا دەپۋتات بۇل ماسەلە بۇگىندە ەۋروپالىق ەلدەردە وتە وزەكتى بولىپ وتىرعاندىعىن ءسوز ەتتى.

«بۇگىندە قازاقستاندا وسى ساناتقا كىرەتىن ەگدە جاستاعى ادامداردىڭ ۇلەسى 6,6 پايىزدى قۇراپ وتىر. 2020 -جىلدىڭ سوڭىنا قاراي بۇل كورسەتىش 7 پايىزدان اسىپ، 7,4 پايىزعا جەتۋى مۇمكىن. اتاپ ايتقاندا، بىرنەشە جىلدان كەيىن ەلىمىز حالىقتىڭ قارتايۋ پروتسەسى ورىن العان ءبىرقاتار ەۋروپالىق مەملەكەتتەر قاتارىنا ەنۋى ىقتيمال»، - دەدى ءبىرعانىم ءايتىموۆا.

بۇدان بۇرىن حابارلانعانداي، قازاقستاندا زەينەتاقى جيناقتارى بويىنشا ەرلەردىڭ ۇلەسى باسىم.

 سونىمەن قاتار، ن. ناۋرىزبايەۆا بيىلعى شىلدەنىڭ باسىندا قازاقستاندىقتاردىڭ زەينەتاقى جيناقتارىنىڭ كولەمى 8,4 تريلليون تەڭگەگە جەتكەنىن ايتتى.

اۆتور: رۋسلان عابباسوۆ