قايرات ءابدىراحمانوۆ گەرمانيانىڭ سىرتقى ىستەر مەملەكەتتىك مينيسترىمەن كەزدەستى

استانا. قازاقپارات - ق ر سىرتقى ىستەر ءمينيسترى قايرات ءابدىراحمانوۆ گەرمانيانىڭ سىرتقى ىستەر مەملەكەتتىك ءمينيسترى نيلس اننەنمەن كەزدەستى. بۇل تۋرالى بۇگىن ق ر سىرتقى ىستەر مينيسترلىگى باسپا ءسوز قىزمەتىنىڭ جەتەكشىسى ايبەك سمادياروۆ ايتتى، دەپ حابارلايدى قازاقپارات ءتىلشىسى.

«بۇگىن سىرتقى ىستەر ءمينيسترى قايرات ءابدىراحمانوۆ ق ر پرەزيدەنتى اكىمشىلىگىندە، پارلامەنت ماجىلىسىندە جانە سىرتقى ىستەر مينيسترلىگىندە كەلىسسوزدەر جۇرگىزۋ ءۇشىن قازاقستانعا كەلگەن گەرمانيانىڭ سىرتقى ىستەر مەملەكەتتىك ءمينيسترى نيلس اننەنمەن كەزدەستى. گەرمانيانىڭ مەملەكەتتىك ءمينيسترى نيلس اننەن گەرمانيانىڭ قازاقستاندى ورتالىق ازياداعى سىرتقى ساياسي جانە ەكونوميكالىق بەلسەندىلىكتىڭ باسىم باعىتى رەتىندە قاراستىراتىنىن ايتىپ، گەرمانيانى 2019-2020 -جىلدارعا ارنالعان بىرىككەن ۇلتتار ۇيىمىنىڭ قاۋىپسىزدىك كەڭەسىنىڭ تۇراقتى ەمەس مۇشەلىگىندە قولداعانى ءۇشىن العىسىن ءبىلدىردى»، - دەدى ول.

ونىڭ ايتۋىنشا، ءوز كەزەگىندە قايرات ءابدىراحمانوۆ قازاقستان مەن گەرمانيا اراسىنداعى قارىم- قاتىناس دامۋدىڭ تۇراقتى ديناميكاسىمەن سيپاتتالاتىنىن جانە قازاقستان مەن ەۋروپالىق وداق اراسىنداعى سەرىكتەستىك بايلانىستاردى قالىپتاستىرۋدا بەرليننىڭ ماڭىزدى ءرولىن اتاپ ءوتتى.

«كەلىسسوزدەر بارىسىندا ەكى ەل اراسىندا ءوزارا قارىم- قاتىناستىڭ بارلىق اۋقىمىندا قول جەتكىزىلگەن ىنتىماقتاستىقتىڭ ستراتەگيالىق سيپاتى انىقتالدى. بۇل تۇرعىدا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ پەن گەرمانيا فەدەراتيۆتىك رەسپۋبليكاسىنىڭ فەدەرالدى پرەزيدەنتى فرانك- ۆالتەر شتاينمايەر جانە كانتسلەرى انگەلا مەركەل اراسىنداعى جوعارى دەڭگەيدە تۇراقتى بايلانىس ەرەكشە ماڭىزعا يە»، - دەدى ايبەك سمادياروۆ.

ونىڭ سوزىنە قاراعاندا، تاراپتار ەكىجاقتى ساۋدا- ەكونوميكالىق ىنتىماقتاستىقتىڭ پەرسپەكتيۆالارىن جەكە تالقىلاپ، قازاقستان مەن گەرمانيا اراسىنداعى تاۋار اينالىمىنىڭ تۇراقتى ءوسۋىن قاناعاتتانارلىقپەن اتاپ ءوتتى.

 «جالپى، وتكەن جىلى قوس مەملەكەت اراسىنداعى تاۋار اينالىمى 4,9 ميلليارد ا ق ش دوللارىنا جەتتى. ينۆەستيتسيالىق ىنتىماقتاستىقتى تەرەڭدەتۋدە ەلەۋلى الەۋەتتىڭ بار ەكەنى اتاپ ءوتىلدى. 2017 -جىلى گەرمانيانىڭ قازاقستان ەكونوميكاسىنا سالىنعان تىكەلەي ينۆەستيتسياسىنىڭ جالپى اعىنى 345 ميلليون ا ق ش دوللارىنان استى. جالپى، 2005 -جىلعى قاڭتاردان 2018 -جىلدىڭ قاڭتارىنا دەيىن گەرمانيادان قازاقستانعا قۇيىلعان تىكەلەي ينۆەستيتسيانىڭ جالپى اعىنى 4,2 ميلليارد ا ق ش دوللارىنان استى. قازاقستان ەكونوميكاسىنا قۇيىلعان نەمىس ينۆەستيتسياسىنىڭ 90 پايىزدان استامى «شيكىزاتتىق ەمەس» سالاعا، اتاپ ايتقاندا، وڭدەۋشى ونەركاسىپ، حيميا ونەركاسىبى، قۇرىلىس ماتەريالدارىن ءوندىرۋ، كولىك جانە اگروونەركاسىپ كەشەنىنە باعىتتالىپ وتىر. ىنتىماقتاستىقتىڭ قولدانىستاعى جانە جاڭا ينستيتۋتتارى ارقىلى ەكىجاقتى بايلانىستىڭ دامۋ قارقىنىنىڭ وسۋىنە قولداۋ كورسەتۋ تۋرالى ۋاعدالاستىققا قول جەتكىزىلدى»، - دەدى س ءى م وكىلى.

اۆتور: مارلان جيەمباي