ماڭعىستاۋدا ع. مۇسىرەپوۆ اتىنداعى تەاتردىڭ گاسترولى ءوتىپ جاتىر

اقتاۋ. قازاقپارات - ماڭعىستاۋ ساحناسىندا ع. مۇسىرەپوۆ اتىنداعى قازاق مەملەكەتتىك بالالار مەن جاس وسپىرىمدەر تەاترى ۇزدىك تۋىندىلارىن ساحنالاۋدا.

كاسپي ماڭى ەلدەرىنىڭ II حالىقارالىق فەستيۆالىنە كەلگەن ونەر ۇجىمى «شىڭىراۋ» دراماسىن كورەرمەن نازارىنا ۇسىندى، دەپ حابارلايدى قازاقپارات ءتىلشىسى.

ماڭعىستاۋ ولكەسىنە كاسپي ماڭى ەلدەرىنىڭ II حالىقارالىق فەستيۆالى اياسىندا كەلگەن 73 -جىلدىق تاريحى بار ع. مۇسىرەپوۆ اتىنداعى ونەر ۇجىمى - ۇلتتىق جانە الەمدىك تۋىندىلاردى حالىققا كەڭىنەن ۇسىنىپ، كورەرمەننىڭ كوزايىمىنا اينالعان تەاتر.

العاشقى كۇنى ونەر ورداسى كورەرمەن نازارىنا ءومىردىڭ تاۋقىمەتىن كورىپ، شىڭىراۋعا تۇسكەن ادامداردىڭ تاعدىرى تۋرالى باياندالعان «شىڭىراۋ» سپەكتاكلىن قويدى. سپەكتاكلدە ءۇمىتى ۇزىلگەن ادام، ساعى سىنعان پەندەلەر، ادال جولدان اداسىپ، ومىردەن باز كەشكەن تۇلعالار مەن ولاردىڭ جان ايقايى سۋرەتتەلەدى. مىنە، وسى كورىنىستەر ارقىلى رەجيسسەر قازىرگى قوعامنىڭ اششى شىندىعىن كورسەتكىسى كەلگەن.

«ونەر جولىندا ءجۇرىپ، حالىقتىڭ ىقىلاسىنا بولەنگەن اكتەر، ءبىرى اقىن، ءبىرى ءبيشى، ءانشى بولعان پەندەلەردىڭ قاسىرەتى سۋرەتتەلەدى. كەيىپكەرلەردىڭ كوبى شىڭىراۋدىڭ تۇبىنە تۇسكەندەر. مىسالى، مەن سومداعان اكتەر كەزىندە گاملەتتى ويناعان، تانىمال بولعان. ونەرىن ەشكىم باعالاماعاننان كەيىن ءىشىپ، ماسكۇنەمدىك جولعا ءتۇسىپ كەتكەن. ول وسى قيىندىعىنان ارىلعىسى كەلەدى. ايتقىمىز كەلگەنى، قازىرگى قوعامدا ساتسىزدىككە ۇشىراپ، دۇنيە-مۇلكىن ساتىپ، وتباسىنان ايىرىلعان ازاماتتار بار. مىنە، سولار ۋاقىتشا سىناقتى جەڭە ءبىلۋى كەرەك»، - دەيدى تەاتر ءارتىسى ەربول ىدىرىسوۆ.

پەسانىڭ قويۋشى رەجيسسەرى - دانيار بازارقۇلوۆ. قويىلىمدا 15 اكتەر وينايدى. ارتىستەر 4 اي دايىندالىپتى. قويىلىم بىردە مونولوگ، بىردە ديالوگ رەتىندە ءوربيدى. سپەكتاكل وسىعان دەيىن ءبىراز فەستيۆالدەرگە قاتىسىپ، تەاتر مايتالماندارىنىڭ جوعارى باعاسىن الىپ ۇلگەرگەن. تەاتر ديرەكتورى وسى جولى دا مىقتى دايىندىقپەن كەلگەنىن ايتتى.

«رەسپۋبليكالىق فەستيۆالدەردەن جۇلدەلى ورىندار الىپ ءجۇرمىز. ءبىزدىڭ رەپەرتۋارىمىزداعى ەڭ جاقسى سپەكتاكلدەردىڭ ءبىرى. ءبىزدىڭ تەاتر 17- قىركۇيەكتەن باستاپ، گاسترولدىك ساپاردا ءجۇر. مىقتى ارتىستەرىمىز ماڭعىستاۋعا كەلەدى. ليديا كادەنوۆا سەكىلدى تانىمال اكتريسا، اكتەرلەرىمىز ونەر كورسەتەدى»، - دەيدى تەاتر ديرەكتورى ءسابيت ءابدىحالىقوۆ.

ع. مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاس وسپىرىمدەر تەاترى - شوقتىعى بيىك قويىلىمدارى جانە دارىندى ونەر مايتالماندارىمەن بىرگە ماڭعىستاۋلىق كورەرمەنمەن قاۋىشاتىن ءساتتى اسىعا كۇتەدى.

ەسكە سالا كەتسەك، 18، 19، 20 قىركۇيەكتە ساعات 11.00 جانە 13.00 دە ەلباسى نۇرسۇلتان نازاربايەۆتىڭ «لاتىن الىپبيىنە كوشۋ» باستاماسىن قولداۋ ماقساتىندا جاڭادان ساحنالانعان «ارىپتەر الەمىنە ساياحات» (اۆت. ءا. بايبول ) اتتى بالالارعا ارنالعان مۋزىكالىق-تانىمدىق ەرتەگىسى، 18- قىركۇيەكتە «مەن، ۇمىتىلمايمىن...» (اۆت. م. ماقاتايەۆ ) ليريكالىق دراماسى قويىلادى.

ال 19- قىركۇيەكتە كورەرمەندەر «ەنەلەر مەن كەلىندەر» (اۆت. س. بالعابايەۆ ) كومەدياسىن، 22- قىركۇيەكتە «كەلىندەر كوتەرىلىسى» (اۆت. س. احماد ) كومەدياسىن تاماشالايدى.

سونداي-اق جاڭاوزەن قالاسىنىڭ تۇرعىندارى 20، 21- قىركۇيەك كۇندەرى قويىلىمداردى «مۇنايشى» مادەنيەت سارايىنىڭ ساحناسىنان كورە الادى.