تۇركىستان وبلىسىنىڭ تۇرعىندارىن سولتۇستىك وڭىرلەرگە كوشىرۋ جالعاسۋدا

  تۇركىستان. قازاقپارات - تۇركىستان وبلىسىنىڭ تۇرعىندارىن سولتۇستىك وبلىستارعا كوشىرۋ جۇمىستارى جالعاسۋدا.

وسى ماقساتتا قوستاناي وبلىسىنا قاراستى قارابالىق اۋدانى اكىمدىگىنىڭ ماماندارى بايدىبەك اۋدانىنىڭ جۇرتشىلىعىمەن كەزدەسۋ وتكىزدى، دەپ حابارلايدى قازاقپارات ءتىلشىسى.

 قوستانايدان كەلگەن ارنايى توپ مۇشەلەرى اتالعان اۋداننىڭ شالدار، بورالداي ەلدى مەكەندەرىندە بولىپ، ءتۇسىندىرۋ جۇمىستارىن جۇرگىزدى. سوڭىنان اۋدان ورتالىعىندا جيىن وتكىزىپ، حالقى تىعىز ورنالاسقان ءوڭىر تۇرعىندارىن ءوز ايماقتارىنا شاقىردى.

 قارابالىق اۋدانى اكىمىنىڭ ورىنباسارى رۋسلان حالىقوۆتىڭ ايتۋىنشا، چەليابى وبلىسىمەن شەكتەسەتىن وڭىردە نەبارى 28 مىڭ حالىق تۇرادى. قازىر مۇندا بارلىق الەۋمەتتىك سالالاردان باستاپ، مەحانيزاتور، جۇرگىزۋشىلەرگە دەيىن جۇمىس قولى تاپشى. قونىس اۋدارامىن دەۋشىلەرگە مەملەكەت تاراپىنان كوپتەگەن جەڭىلدىكتەر قاراستىرىلادى.