باقىت سۇلتانوۆ استانانى دامىتۋدىڭ جاڭا ۇلگىسىن جاساۋدى تاپسىردى
«مەملەكەت باسشىسى ءبىزدىڭ الدىمىزعا جاقىن ارادا ورىندالۋى ءتيىس ءبىرقاتار باسىم مىندەتتەردى قويىپ وتىر» ، - دەپ مالىمدەدى باقىت سۇلتانوۆ.
قالانى دامىتۋدىڭ جاڭا ۇلگىسىن ەنگىزۋ جانە يننوۆاتسيالاردى ىلگەرىلەتۋ، كرەاتيۆتى ادامدار سانىن كوبەيتۋ ءۇشىن قولايلى ورتانى قالىپتاستىرۋ - 2050 -جىلعا دەيىنگى دامۋ ستراتەگياسىن ازىرلەۋدى تالاپ ەتەدى. جاڭا ستراتەگيانى قۇرۋ جونىندەگى تاپسىرمانى مەملەكەت باسشىسى وسى جىلدىڭ 11 - قىركۇيەگىندە بەرگەن بولاتىن.
اكىم قالاداعى قازىرگى احۋالعا كەشەندى تۇردە تالداۋ وتكىزىپ، ستراتەگيالىق ماقساتتى انىقتاۋدى، بولاشاقتىڭ قانداي بولاتىنىن بولجاۋدى تاپسىردى. ياعني ءومىر ساپاسىن ارتتىرۋ، قالالىق ورتانىڭ ۇيلەسىمدىلىگى، تۇراقتى ەكونوميكالىق ءوسىم، رەسۋرستاردى ءتيىمدى پايدالانۋ جانە ت. ب.
ەلوردانىڭ جاڭا ستراتەگيالىق دامۋ ۇلگىسى «استانا» حالىقارالىق قارجى ورتالىعى بازاسىندا ىسكەرلىك قارجىلىق حابتى دامىتۋدى قامتيدى. بۇل باعىت سونىمەن قاتار تۋريزم يندۋسترياسى سالاسىن كەڭەيتۋ بويىنشا جۇمىستى كۇشەيتە ءتۇسۋدى تالاپ ەتەدى.
«وسىعان بايلانىستى ىسكەرلىك تۋريزم سالاسىندا الدىڭعى قاتارلى حالىقارالىق ۇيىمدارمەن ارىپتەستىكتى نىعايتۋدى تاپسىرامىن. تۋريزم سالاسىندا قىزمەت كورسەتۋ سەرۆيسىنىڭ ساپاسىن حالىقارالىق ستاندارتتارعا كوتەرۋ وتە ماڭىزدى» ، - دەدى ب. سۇلتانوۆ.
اسىرەسە قالالىقتاردىڭ قولايلى ءومىر ءسۇرۋى ءۇشىن جاسالاتىن يگىلىكتەرگە ەرەكشە كوڭىل ءبولىنۋى تيىستىگى اتاپ ءوتىلدى. بۇل - اباتتاندىرۋ، الەۋمەتتىك وبەكتىلەردى سالۋ، تۇرعىن ءۇي قۇرىلىسى جانە تاعى باسقاسى.
بۇدان بولەك، ەلوردا باسشىسى بيىلعا جوسپارلانعان جالپى الاڭى 2,3 ميلليون شارشى مەتردەن كەم ەمەس تۇرعىن ۇيلەردى پايدالانۋعا بەرۋدى تاپسىردى (جىل باسىنان بەرى 1699,6 مىڭ شارشى مەتر تۇرعىن ءۇي بەرىلدى) .
«اكىمدىكتىڭ جۇمىسى مەملەكەت باسشىسى اتاپ وتكەن بەس الەۋمەتتىك باستامانى جۇزەگە اسىرۋعا باعىتتالۋى كەرەك. وسى مىندەتتەردى اتقارۋ جاڭا جۇمىس ورىندارىن اشۋعا جانە قالانىڭ ءارى قاراي ەكونوميكاسىن دامىتۋعا اسەر ەتەدى» ، - دەپ ايرىقشا توقتالدى ب. سۇلتانوۆ.