گولوۆكين كارەراسىن اياقتاسا، ءىزىن كىم باسۋى مۇمكىن؟ ساراپتاما

 استانا. قازاقپارات - كاسىپقوي بوكستاعى قازاقستاننىڭ ەڭ تيتۋلى كوپ وكىلى، داڭقتى جەرلەسىمىز گەننادي گولوۆكيننىڭ مەكسيكالىق ساۋل الۆارەستەن جەڭىلىپ قالعانى بەلگىلى.

 وتانداسىمىز وسىعان دەيىن ۋىسىندا ۇستاعان WBA، WBC، IBO تۇجىرىمدارى بويىنشا بەلبەۋلەرىنەن ايىرىلدى. قازىرگى كەزدە گەننادي گولوۆكين مەن ساۋل الۆارەستىڭ جەكپە- جەگىنە قاتىستى ءار ءتۇرلى پىكىرلەر ايتىلىپ جاتىر، دەپ حابارلايدى Baq.kz ءتىلشىسى.

ەكى بوكسشى تۋرا وسىدان 1 جىل بۇرىن العاش رەت جولىققان ەدى. ول كەزدە كەزدەسۋ تەڭ اياقتالعان. ءبىراق بىلتىرعى ناتيجەگە گولوۆكيننىڭ دە، كانەلونىڭ كوڭىلى تولماعان. سوندىقتان وسى ولقىلىقتىڭ ورنىن تولتىرۋ ءۇشىن قوس بوكسشى 16 - قىركۇيەك كۇنى جەكپە- جەككە ەكىنشى رەت شىقتى. ونىڭ ۇستىنە ورتا سالماقتاعى ءتورت بىردەي چەمپيوندىق تيتۋل ساراپقا سالىندى: WBA، WBC، IBO جانە The Ring.

ءبىرىنشى جەكپە- جەگى نەسىمەن ەستە قالدى؟

گولوۆكيننىڭ ءستيلى كوپشىلىككە جاقسى تانىس. جەرلەسىمىز ۇنەمى قارسىلاسىن قىسىمعا الىپ، جويقىن سوققىسىمەن ەسەڭگىرەتۋگە تىرىسادى. گەناديدىڭ جەڭىس فورمۋلاسى وتە قاراپايىم: قارسىلاستى قابىرعاسىنان قاقىراتا ۇرىپ قۇلاتۋ.

الۆارەس فينت جاساۋ مەن قارىمتا شابۋىلدىڭ شەبەرى بولىپ العان. ءبىراق مەيۆەزەردىڭ ستيلىنەن بولەك. كانەلونىڭ گولوۆكيننىڭ وزگە قارسىلاستارىنان ءبىر ەرەشەلىگى جاقسى قورعانا الادى. قازاقستاندىق وڭ جاق بۇيىردەن اۋىر سوققى جۇمساعاندا، مەكسيكالىق ونى كۇتىپ الىپ، سول قولىمەن اپپەركوت جاساپ ۇلگەرىپ كەتىپ ءجۇردى. مۇنى گەننادي جاقسى ءتۇسىنىپ، سوسىن الداپ ۇرۋعا كوشتى. ياعني قارسىلاسىنىڭ اشىلعانىنىن كۇتىپ، سول قولمەن ۇرۋعا تىرىستى. جەكپە- جەكتە تىزگىندى ەكى بوكسشى الما- كەزەك ءوز قولدارىن الىپ وتىردى. ءبىراق گولوۆكيننىڭ سوققىلارىنىڭ دالدىگى كوپ بولعانىن ايتا كەتۋىمىز كەرەك.

تورەشىلەردىڭ شەشىمى ساراپشىلار مەن فاناتتاردىڭ ءتىپتى الۆارەستىڭ كومانداسىن ءوزىن تاڭقالدىرعان ەدى: ءبىر تورەشى 118:110 ەسەبىمەن جەڭىستى الۆارەستىڭ پايداسىنا شەشتى، ەكىنشىسى كۇمان تۋدىراتىن ناتيجەنى تىركەدى - 114:114؛ ءۇشىنشىسى عانا ادەكۆاتتى شەشىم قابىلداپ، 115:113 ەسەبىمەن گولوۆكين جەڭدى دەپ حابارلادى. ءسويتىپ، جەكپە- جەك تەڭ اياقتالدى. قازاقستاندىق بوكسشىنىڭ باپكەرى ابەل سانچەس كانەلونى قاشقىن دەپ اتادى.

ەكىنشى جەكپە- جەك قالاي ءوتتى؟

 

رەماتچقا ادەلايدا بەرد (118:110 ەسەبىمەن الۆارەس جەڭدى دەگەن) جىبەرىلگەن جوق. ەسەسىنە دەيۆ ماروتتي (115:113 ەسەبىمەن گولوۆكين ۇتتى دەگەن) وسى جولى دا قىزمەت ەتتى.

ءبىر قىزىعى، العاشقى راۋندتان شارشى الاڭنىڭ ورتاسىن الۆارەس بيلەپ توستەي باستادى. گولوۆكين مۇندايدى كۇتكەن جوق. بۇعان دەيىن ۇنەمى رينگتىڭ ورتاسىن ەشكىمگە بەرمەيتىن. اقىرى، مەكسيكالىق بوكسشىنى ارتقا شەگىندىرە الماي قويدى. كاسىپقوي بوكستاعى 12 جىلدىق كارەراسىندا گولوۆكين ءدال وسىلاي رينگتە ارتقا شەگىنبەگەن شىعار.

ارتقا شەگىنگەن بوكسشى بۇرىنعىداي اسا قاۋىپتى ەمەس. ونى كانەلو جاقسى ءتۇسىندى. سوندىقتان ول نەگىزىنەن ورتا جانە جاقىن قاشىقتىقتا ۇرىس سالۋعا تىرىستى. وتانداسىمىز كەزدەسۋ بارىسىندا كورپۋستەن كوپ سوققى جىبەرىپ الدى - 46 (ءوزى بار جوعى 6 سوققىمەن جاۋاپ قاتتى) . بۇل جىلدامدىققا اسەر ەتكەنى ءسوزسىز. دەگەنمەن، 12 راۋندا سوزىلعان جەكپە- جەكتىڭ ەكىنشى بولىگىندە كينوداعى روككي سەكىلدى قارقىنىن ۇدەتىپ، مەكسيكالىقتى تىقسىرتا باستادى. الايدا، ەڭ ماڭىزدى فينالدىق راۋندتاردا قايتادان ساۋل كۇش الدى. 28 جاستاعى الۆارەس ناعىز پىسىق بوكسشى دەسە بولاتىن شىعار. كانەلونىڭ توزىمدىلىگى تاڭ قالدىرادى.

گولوۆكين دجەب سوققىلارىن جۇمساۋدان ءالى دە كوشباسشى ەكەنىن بايقاتتى. ەسەپ - 118:59. ءبىراق جويقىن سوققىدان قارسىلاسى الدا بولدى - 116: 143.

كەزدەسۋدە ءبىر تورەشى تەڭ ناتيجە تىركەپ، ەكى تورەشى مەكسيكالىقتى جەڭىسكە جەتتى دەپ تانىدى. ەسەپ: 115-113, 115-113 جانە 114-114. گولوۆكين 12  جىلدىق كارەراسىندا العاش رەت جەڭىلىپ، بارلىق تيتۋلىنان ايىرىلدى. 36 جاستاعى قازاقستاندىق وسىمەن كاسىپقوي بوكستا 40-رەت شارشى الاڭعا كوتەرىلدى ول بۇعان دەيىن 38 مارتە جەڭىسكە جەتىپ (34 كەزدەسۋدە نوكاۋتپەن جەڭگەن) ، ءبىر رەت تەڭ تۇسكەن.

بۇل كەزدەسۋدىڭ بىلتىرعىعا قاراعاندا تەڭ اياقتالعانىن كوپ ساراپشىلار راستاپ وتىر. ءبىراق مۇنداي تەڭ دارەجە وتكەن جەكپە- جەكتەردە قوسىمشا فاكتورلاردىڭ ءرول وينايتىنىن ۇمىتپاعان ءجون: جوعارى دارەجەدەگى قىسىم، شارشى الاڭدى باقىلاۋدا ۇستاۋ، فينالدىق راۋندتاردا بەلسەندى بولۋ. بۇل جاعىنان الۆارەس ۇزدىك بولدى. ەكى بوكسشى دا ايانىپ قالعان جوق. الايدا، كانەلو فاناتتاردى عانا ەمەس، تورەشىنى وزە وزىنە سەندىرە ءبىلدى. ول جاعىنان گولوۆكيندە پروبلەما بار.

الۆارەستىڭ اقىلدىلىعىنا، پراگماتيكاسىنا قول شاپالاقتاۋعا بولادى. مەكسيكالىق ءوز كۇشىن قالاي پايدالانۋ كەرەكتىگىن جاقسى بىلەدى. ياعني سوڭىندا شارشاپ قالماۋ ءۇشىن كۇشىن ءبولىپ- ءبولىپ جۇمسادى. ءاربىر ۇساق- تۇيەككە دەيىن ءمان بەرگەنى كورىنىپ تۇر.

گولوۆكين باپكەرى ابەل سانچەستىڭ جۇلدىزدى ساتتەرى ارتا قالعانىن ايتتتى. بۇل جەكپە- جەكتە قازاقستاندىق بوكسشى قارسىلاسىنا تاكتيكالىق تۇرعىدان ەسە جىبەرگەنى دە جاسىرىن ەمەس.

بوكسشىلاردىڭ وزدەرى نە دەيدى؟

گولوۆكين جەكپە- جەكتەن كەيىن جەڭىلمەگەنىن، بارلىق شارتتارى قاناعاتتاندىرىپ جاتسا، ءۇشىنشى رەت جولىعۋعا ءازىر ەكەنىن ايتتى.

 

 - كىم جەڭىسكە جەتكەنىنە قاتىستى پىكىر بىلدىرۋگە تىرىسپايمىن. ويتكەنى، تورەشىلەر كانەلونىڭ قولىن كوتەردى. جەكپە- جەك جانكۇيەرلەردىڭ كوڭىلىنەن شىقتى دەپ ويلايمىن. دەگەنمەن، مەن ءوزىمدى چەمپيونمىن دەپ سانايمىن. ول دا جاقسى ايقاستى. بۇگىن ەكى چەمپيوننىڭ جەكپە- جەگى بولدى دەسەم ارتىق ەمەس. كەزدەسۋ تىزگىنىن ءوز قولىما ۇستاۋعا تىرىستىم. بوكسشى بولعاندىقتان جۇمىسىمدى ءارىقاراي جالعاستىرا بەرەمىن. ەگەر، مۇمكىندىك بولسا ءۇشىنشى رەت كەزدەسسەك دۇرىس بولار ەدى. ءبىز بۇل جونىندە ءالى دە سويلەسەمىز. ءبىراق كەلەسى جەكپە- جەكتى لاس- ۆەگاس ەمەس باسقا قالادا وتكىزگەن دۇرىس بولار، - دەيدى گولوۆكين.

ال ساۋل الۆارەس ازىرگە وسى جەڭىسىنەن ءلاززات الىپ، از ۋاقىت دەمالاتىنىن ايتتى.

- مەن ءىس جۇزىندە بارلىعىن كورسەتتىم. گولوۆكين ارتقا شەگىندى. مەنىڭ ناتيجەگە كوڭىلىم تولدى. ويتكەنى، وتە كەرەمەت كەزدەسۋ بولدى. بۇل ەندى تازا جەڭىس. ەگەر كورەرمەندەر قالاسا، گولوۆكينمەن ءۇشىنشى رەت كەزدەسۋگە دايىنمىن. ازىرگە وسى جەڭىسىمنەن ءلاززات العىم كەلەدى، - دەيدى كانەلو.

گولوۆكينگە كارەراسىن اياقتاعان دۇرىس پا؟

گەننادي ۇزاق ۋاقىت بويى جەڭىلىسسىز كەلدى. ءتىپتى، تەڭ ناتيجەسى دە بولماعان. كانەلومەن كەزدەسكەن ەكى جەكپە- جەكتەن سوڭ، ستاتيستيكاسى بۇزىلدى. ارينە، موحاممەد ءالي دە، مايك تايسون دا ۇتىلعان. دەگەنمەن، گولوۆكيننىڭ جىل وتكەن سايىن بۇرىنعى قاۋقارى تاۋسىلا باستاعانىن ەڭ جاقىن جاندارىنىڭ ءوزى سەزەتىن سەكىلدى. سوندىقتان وعان كارەراسىن اياقتاۋعا كەڭەس بەرىپ جاتقاندار جەتەرلىك.

مىسالى، جامبىل وبلىسىندا دۇنيەگە كەلگەن رەسەيلىك پرومۋتەر ۆلاديمير حريۋنوۆ «سپورت- ەكسپرەسس» گازەتىنە جازعان ساراپتاماسىندا وسىنداي پىكىر ايتقان.

- گولوۆكين اۋەسقوي بوكستا 300 دەن استام كەزدەسۋ وتكىزدى. كاسىپقويدا قىرىققا جەتكىزدى. مەن ونىڭ ورنىندا بولسام، كارەراسىن اياقتاۋعا كەڭەس بەرەر ەدىم. بۇل ەندى گولوۆكيننىڭ ءوزىنىڭ جەكە ماسەلەسى. ويتكەنى، الداعى ۋاقىتتا بۇدان دا جاعدايى قيىنداۋى مۇمكىن. رينگتە كوپ نارسەنى كوردىك. سپورتتان ادەمى كەتۋ دە ونەر. قازىرگى كەزدە بارلىعى سوڭعى جەكپە- جەگى تۋرالى تالقىلاپ جاتىر. كوبىسى، تورەشىلەردىڭ شەشىمى ادىلەتتى بولماعانىنا كەلىسەدى. گولوۆكينگە دەگەن جانكۇيەرلەرىنىڭ ماحابباتى ودان سايىن ەسەلەي ءتۇستى. سوندىقتان ءدال وسىنداي ساتتە كارەراسىن اياقتاۋ ەڭ ۇتىمدى شەشىم بولار ەدى، - دەيدى ۆلاديمير حريۋنوۆ.

رەسەيدىڭ ەكى دۇركىن وليمپيادا چەمپيونى الەكسەي تيشەنكو «championat.com» سايتىنا بەرگەن سۇحباتىندا گولوۆكينگە جىل سايىن وقۋ- جاتتىعۋ جيىنىن وتكىزىپ، ءاربىر جەكپە- جەك دايىندالۋ وڭاي ەمەس ەكەنىن مەڭزەپتى. سوندىقتان كارەراسىن اياقتاۋعا تيشەنكو دا كەڭەس بەرگەن.

 - ماعان ءبىرىنشى جەكپە- جەكتەن كەيىن نەگىزگى قورىتىندىنى الۆارەس جاساعان سەكىلدى كورىندى. ول قارسىلاسىنا قاراعاندا بەلسەندى بولدى ءارى كوپ سوققى جۇمسادى. اراسىندا گولوۆكين دە شابۋىل جاسادى. ءبىراق ازداۋ. گەننادي وتە تۇسىنىكسىز جاعداي كوپ دەمالىس الدى. الۆارەس فۋنكتسيونالدىق تۇرعىدان جاقسى دايىندالعان. سوندىقتان جەڭىسكە لايىق بولدى دەپ ويلايمىن. بالكىم، گەنناديگە ءۇشىنشى رەت جولىعۋعا بولاتىن شىعار. كانەلونىڭ كەلىسۋ ءۇشىن ازداعان ءۇزىلىس الۋى كەرەك. وعان دەيىن وزگە بوكسشىلارمەن ءبىر- ەكى جەكپە وتكىزۋىنە دە بولادى. بالكىم، گولوۆكينگە كارەراسىن اياقتاعان دا دۇرىس پا دەپ ويلايمىن. ءوزىنىڭ جۇلدىزدى شاعى وتكەنىن سەزگەندە توقتاي قالۋ قاجەت. جىل بويى وقۋ- جاتتىعۋ جيىنىن وتكىزىپ، ءاربىر جەكپە- جەككە دايىندالۋدان دا شارشاعان شىعار. ونىڭ ءبارى فيزيكالىق تۇرعىدان عانا ەمەس، پسيحولوگيالىق جاعىنان وڭاي ەمەس. ەگەر، گولوۆكين دايىن بولسا، تاعى بايقاپ كورۋىنە بولادى، - دەيدى الەكسەي تيشەنكو.

گولوۆكيننىڭ ءىزىن كىم باسۋى مۇمكىن؟

شىنى كەرەك، قازاقستان بوكستان دەرجاۆا بولسا دا، كوبىسى اۋەسقويداعى جەتىستىكتەرىمەن توقتالىپ قالادى. وسى ۋاقىتقا دەيىن وليمپيادا چەمپيونى اتانعان ەرماحان يبرايىموۆ، سەرىك ساپيەۆ، باقتيار ارتايەۆ، باقىت سارسەكبايەۆتاردىڭ ەشقايسىسى ول جاققا اتتاپ باسقان جوق.

كاسىپقوي بوكسقا جولدى ۆاسيلي جيروۆ اشتى. IBF تۇجىرىمى بويىنشا ءبىرىنشى اۋىر سالماقتا الەم چەمپيونى اتاندى. گەننادي گولوۆكين ودان اسىپ ءتۇستى. نوكاۋتتارى دا كوپ. ەڭ باستىسى، حالىقتىڭ نازارىن اۋدارتا الدى. ءاربىر جەكپە- جەك سايىن ۇلتتىق شاپانمەن شىعادى، قازاقتىڭ تۋى مەن ءانۇرانى ناسيحاتتالادى. گولوۆكين - كوپشىلىكتەن قولىنان كەلمەگەن قازاقستاننىڭ برەندىن قالىپتاستىرۋدا وراسان زور ەڭبەك ءسىڭىردى. ءبىراق سپورتتىڭ اتى سپورت. بۇگىن بارسىڭ، ەرتەڭ جوقسىڭ. بۇل زاڭدىلىق. ەندى، گولوۆكيننىڭ جەتىستىگىن كىم قايتالاي الۋى مۇمكىن؟

جاقىندا كاسىپقوي بوكسقا تۇپكىلىكتى اۋىسقان، اۋەسقوي بوكستان 2013 -جىلعى الەم چەمپيونى جانىبەك ءالىمحان ۇلى الەۋمەتتىك جەلىدەگى پاراقشاسىندا مەكسيكالىق بوكسشىنى ءوزىم قۇلاتامىن دەپ جازىپتى.

- كانەلو، سەنىڭ قۋانىشىڭ ۇزاققا سوزىلمايدى. مەن سەنى وڭاي جەڭەتىن ءبىرىنشى بوكسشى بولامىن. مەن ساعان قازاق بوكسىنىڭ ءستيلىن كورسەتەمىن. مەن دايىنمىن!، - دەپ جازدى ول Instagram پاراقشاسىندا.

ازىرگە جانىبەك ءالىمحان ۇلىنىڭ قارقىنىن باعامداي المايمىز. ويتكەنى، ا ق ش- تاعى العاشقى كەزدەسۋىن 28 - قىركۇيەك كۇنى وتكىزەدى. ونىڭ قارسىلاسى كاسىپقوي بوكستا 24 جەكپە- جەك وتكىزىپ، 16 سىن جەڭگەن كولۋمبيالىق كارلوس گالۆان.

جانىبەك جاقىندا Top Rank پروموۋتەرلىك كومپانياسىمەن كەلىسىم- شارتقا وتىرعان بولاتىن. قازاق بوكسشىسى تانىمال جاتتىقتىرۋشى باددي ماكگيرتتىڭ قول استىندا دايىندىق ۇستىندە. باددي ماكگيرت كەزىندە مايك تايسوندى جاتتىقتىرعان.

 ال كەزىندە ءوزى دە بوكسپەن اينالىسقان، جانكۇيەر سەرعالي بالاجان الەۋمەتتىك جەلىدەگى پاراقشاسىندا گولوۆكيننىڭو ورنىن دانيار ەلەۋسىنوۆ باساتىنا سەنىمدى.

- گولوۆكيننىڭ ورنىن دانيار ەلەۋسىنوۆ الماستىرادى! گەناعا وكپە جوق، قانشاما جىل بويى ورتا سالماقتا كوشباسشى بولدى. ەندى جاس كەلدى، قارتايدى. دانيار دىننەن باس تارتىپ، سپورتتى تاڭداسا گەنانىڭ جەتكەن جەتىستىكتەرىنە ءسوزسىز جەتەدى، - دەيدى ول.

وزگە قازاق بوكسشىلارىنان مەيىرىم نۇرسۇلتانوۆ، باتىر جۇكەمبايەۆ، ءالي احمەدوۆتەردى ەرەكشە ايتا كەتۋگە بولادى. ءبىراق ولار گولوۆكيننىڭ جەتىستىگىن قايتالاي الا ما، جوق پا وعان ۋاقىت تورەشى.

 

ەرنۇر قوجاگەلدى

Baq.kz