استانا اۋەجايىنداعى توسىن وقيعا: ۇشاق قوزعالتقىشى ساراپتاماعا جىبەرىلدى
«15 قىركۇيەك كۇنى «اتىراۋ- استانا» باعىتىنداعى ك س 982 رەيسىن ورىنداعان Airbus ا320 ۇشاعى استانا اۋەجايىنا ساعات 17:17 دە شتاتتىق رەجىمدە قوندى. اتىراۋدان ۇشىپ شىعار الدىندا ۇشاق مىندەتتى تەحنيكالىق قىزمەت كورسەتۋدەن وتكەن جانە رەيستى ورىنداۋعا تولىقتاي دايىن بولعان. استاناعا كەلگەننەن كەيىن، اۋە كەمەسى تۇراققا توقتاپ، ساعات 17-26 دا ەكى قوزعالتقىشىن دا وشىرگەن سوڭ اۋە كومپانياسىنىڭ ينجەنەرلىك قىزمەتى سول جاق قوزعالتقىشتىڭ تۇتىندەگەنىن انىقتادى. ينجەنەرلىك قىزمەت پەن ءورت سوندىرۋشىلەر ساعات 17:39 دا ءورتتى تولىقتاي ءسوندىردى» ، - دەلىنگەن تاراتىلعان اقپاراتتا.
كومپانيانىڭ اتاپ وتۋىنشە، ۇشاق ەكيپاجى بولعان جايت جايىندا جولاۋشىلاردى دەر ۋاقىتىندا حابارلاندىرىپ، جاعدايدى تولىق باقىلاۋدا ۇستاعان. 91 جولاۋشى مەن 8 ەكيپاج مۇشەسىن ۇشاقتان ءتۇسىرۋ شتاتتىق تارتىپپەن تراپ ارقىلى جۇزەگە اسىرىلدى. زارداپ شەككەندەر جوق.
«بولعان جايتقا بايلانىستى تەرگەۋ امالدارى جۇرگىزىلەتىن بولادى. قازىرگى ۋاقىتتا قوزعالتقىش اقاۋ شىعۋ سەبەبىن انىقتاۋ جانە ودان ارى جوندەۋ ءۇشىن ساراپتاماعا جىبەرىلدى. ۇشۋ قاۋىپسىزدىگى «ەير استانا» اۋە كومپانياسىنىڭ باسىمدىعى سانالادى. سوندىقتان جاعدايدى انىقتاۋ ءۇشىن بارلىق شارالار قابىلدانادى» ، - دەپ اتاپ وتەدى باسپا ءسوز قىزمەتىنەن.
اۋدارما: مارلان جيەمباي