استانادا «قازىرگى زامانعى ءسوز ەنەرگياسى» اتتى ەۋرازيالىق ادەبي فورۋم وتەدى
بۇل فورۋم ەلوردامىزدىڭ 20 جىلدىعىنا ارنالادى. فورۋم ەۋرازيا حالىقتارىنىڭ كوركەم ادەبيەتىن تانىمال ەتۋ، ۇلتتىق مادەنيەت وكىلدەرىنىڭ اراسىنداعى بايلانىستى نىعايتۋ، ءبىرىڭعاي ەۋرازيالىق ادەبي كەڭىستىكتى قالىپتاستىرۋ، سونداي- اق، جاستار اراسىندا تالانتتاردى انىقتاۋ ماقساتىندا وتكىزىلەدى.
بۇل القالى جيىن بيىلعى جىلدىڭ ينتەللەكتۋالدىق رەسۋرستاردى جيناقتايتىن جانە حالىقارالىق ىنتىماقتاستىق پەن مادەني سۇحباتتاردى دامىتۋعا ارنالعان ەڭ ءىرى ادەبي جوبا بولماق. XXI عاسىرداعى جاھاندىق مادەنيەتتىڭ كۇن تارتىبىندەگى ماسەلەلەرى ءسوز بولاتىن فورۋمعا ەۋرازيا قۇرلىعىنىڭ تۇكپىر- تۇكپىرىنەن شەت ەل قالامگەرلەرى ( ۇلى بريتانيا، گەرمانيا، قىتاي، رەسەي، تۇركيا، لاتۆيا، ۆەنگريا، پولشا، مولدوۆا، ارمەنيا، ۋكراينا، بولگاريا، موڭعوليا، ازەربايجان جانە وزگە دە مەملەكەتتەر) قاتىسادى.
فورۋم اياسىندا بەلگىلى جازۋشىلار مەن ادەبيەت سىنشىلارىمەن توپتاسقان كونفەرەنسيالار، دوڭگەلەك ۇستەلدەر جانە شىعارماشىلىق كەزدەسۋلەر، كىتاپ كورمەسى مەن سەكسيالار ۇيىمداستىرىلادى. ادەبيەت تىنىسىن زەردەلەۋگە ارنالعان فورۋمدى وتكىزۋ ەلىمىزدىڭ الەمدىك ادەبي كەڭىستىكتەگى ينتەگراتسياسىنا مول سەپتىگىن تيگىزىپ، مادەني بايلانىستىڭ ورىستەۋىنە جول اشپاق.
ايتا كەتەر جايت، 20 - قىركۇيەكتە فورۋمنىڭ سالتاناتتى اشىلۋ ءراسىمى جانە «ادەبيەت جانە جاھاندىق ماسەلەلەر»، «ايماقتىق ادەبيەتتەردىڭ دامۋى» تاقىرىپتارى بويىنشا پلەنارلىق وتىرىس وتەدى. سونداي- اق «زاماناۋي ەۋرازيالىق ادەبيەت» كىتاپ كورمەسى ۇيىمداستىرىلادى. فورۋم اياسىندا قازاقستان جازۋشىلار وداعى مەن يران جازۋشىلارىنىڭ قاۋىمداستىعى اراسىنداعى ىنتىماقتاستىق مەموراندۋمعا قول قويىلۋى كۇتىلۋدە.