گەننادي گولوۆكين كاسىپقوي بوكستا تۇڭعىش رەت جەڭىلدى
ءبىرىنشى راۋند قارسىلاستاردىڭ ءبىرىن- ءبىرى بارلاۋىمەن ءوتتى. ءبىر- ءبىرىن ابدەن زەرتتەگەن بوكسشىلار رينگتە قايمىقتايتىندارىن كورسەتتى. «كانەلو» ءبىرىنشى ايقاستاعىداي ەمەس، بۇل جولى بەتپە- بەت ايقاسقا دەن قويعان سەكىلدى. العاشقى راۋند تەڭ دارەجەدە ءوربىدى. مەكسيكالىقتىڭ العا باسۋى گولوۆكينگە دە ىڭعايلى بولا تۇسكەنى انىق.
ەكىنشى راۋندتا الۆارەستىڭ اپەركوتى ءدوپ تيگەنىمەن، گولوۆكين راۋند اياقتالار تۇستا سول جاق قاپتالدان جاقسى سوققىلارىنىڭ ءبىرىن وتكىزدى. اتالمىش راۋندتا قارسىلاستاردىڭ ەشقايسىسىنىڭ ايقىن باسىمدىلىعى بايقالا قويعان جوق. مەكسيكالىق رينگتە شاپشاڭ كورىنەدى. الايدا گولوۆكيننىڭ دە «كانەلونى» ابدەن زەرتتەگەنى كورىنىپ تۇر.
ءۇشىنشى راۋندتا بوكسشىلاردىڭ قيمىلى شيراي ءتۇستى. ايقاس نەگىزىنەن رينگتىڭ ورتاسىندا ءوتىپ جاتىر. مەكسيكالىق ءۇشىنشى راۋندتا كوپ سوققى جاساعانىمەن، ءبارى دارىدى دەيتىن ەمەس. گەننادي دە جاۋاپ قايتارىپ- اق باقتى. « قىزىقتىڭ ءبارى ءالى الدا» دەيدى ايقاستى تىكەلەي ەفيردەن جۇرگىزىپ وتىرعان بوكسشى، وليمپيادا چەمپيونى باحتيار ارتايەۆ.
ءتورتىنشى راۋندتى گولوۆكين بەلسەندى باستادى. قارسىلاستار قايمىقپاي، رينگتىڭ ورتاسىن ءبىر- بىرىنە بەرەتىن ەمەس. وتانداسىمىز ءتورتىنشى راۋندتى ەنشىسىنە بايلاعان سەكىلدى. ءدوپ تيگەن بىرنەشە سوققىسى «كانەلونى» ەسەڭگىرەتىپ تاستادى. مەكسيكالىقتىڭ قيمىلى العاشقى راۋندتاعىداي شيراق ەمەس. بوكس سىرىن ءبىر كىسىدەي بىلەتىن باحتيار ارتايەۆتىڭ ايتۋىنشا، الۆارەستىڭ جۇيكەسى سىر بەرە باستاعانداي.
بەسىنشى راۋندتا گولوۆكين قىسىمدى ۇدەتە ءتۇستى. دەسە دە، ءتورتىنشى راۋندتا كەتكەن ەسەسىن «كانەلو» قايتارۋعا بارىن سالىپ باقتى. مەكسيكالىقتىڭ تاكتيكاسىن وزگەرتكەنى كورىنىپ تۇر. گەنناديدى قىسپاققا الۋعا بارىن سالىپ جاتىر. بەسىنشى راۋندتا «كانەلونىڭ» قاباعى جىرىلىپ كەتتى. ايقاستىڭ بەل ورتاسى - التىنشى راۋندتا بوكسشىلار ءبىرشاما سوققى الماستى. الۆارەس گولوۆكيننىڭ ءبۇيىرىن اڭدىپ، سوققى جاساۋعا تىرىسىپ كوردى. الايدا ول ارەكەتتەرى ناتيجەسىن بەرە قويمادى.
قازاقستاندىق التىنشى راۋندتا قارسىلاسىنىڭ قىسپاعىنا لايىقتى جاۋاپ بەردى. جەتىنشى راۋندتا قارسىلاستار ءبىر- ءبىرىن ءبىر ۋاقىتتا سول قاپتالدان ۇرىپ، ەكەۋى دە اۋىر سوققى العانداي كورىندى. الايدا رينگتىڭ ورتاسىن ءالى ءبىر- بىرىنە ىسىرىپ بەرەتىن ەمەس. سوڭىندا گەناديدىڭ بىرنەشە سوققىسى ءدوپ ءتيىپ، اتالمىش راۋندتى وتانداسىمىز ءساتتى اياقتادى.
سەگىزىنشى راۋندتا «كانەلونىڭ» بىرنەشە سوققىسى گولوۆكينگە ءدوپ ءتيدى. راۋندتىڭ ورتاسىنا دەيىن مەكسيكالىقتىڭ باسىمدىعى بايقالعانى انىق. دەسە دە، بەتپە- بەت ايقاس توقتاعان جوق. ءبىر- بىرىنەن قايمىقپايتىن بوكسشىلاردىڭ ناعىز ايقاسى توعىزىنشى راۋندتا دا باسەڭدەگەن جوق. قانشا سوققى العانىمەن، «كانەلونىڭ» شەگىنەر ءتۇرى جوق. ونىنشى راۋندتا گولوۆكين بىرنەشە سوققىسىمەن ايقاستى ۋاقىتىنان بۇرىن اياقتاۋعا شاق قالعانداي بولدى. الايدا قازاقستاندىقتىڭ بۇل جويقىن شابۋىلىنا كانەلو شىداپ بەردى. قوس قارسىلاستىڭ ابدەن شارشاعانى بايقالىپ تۇر.
ونىنشى راۋند گولوۆكيننىڭ ەنشىسىندە دەپ ايتۋعا ابدەن بولاتىن سەكىلدى. ون ءبىرىنشى راۋندتا الۆارەس شەگىنگەندەي بولدى. ون راۋند بويى العا باسقان مەكسيكالىق سىر بەرە باستاعانداي. دجەپ پەن كروستى قاتار تيگىزگەن گولوۆكيننىڭ سوققىسى زالداعى كورەرمەندەردى اياعىنان تىك تۇرعىزعانى انىق. ال راۋند سوڭىندا كانەلو قايتادان قىسپاققا الىپ كورۋگە تىرىسقانىمەن، شابۋىلدارىن اياعىنا دەيىن جەتكىزە المادى. قوس بوكسشى دا ناعىز تەمىردەي ءتوزىم يەلەرى ەكەنىن دالەلدەدى.
سوڭعى راۋندتا گولوۆكيننىڭ سول جاقتان ۇرعان بىرنەشە سوققىسى ءدوپ ءتيدى. «كانەلونىڭ» اياعى تايىپ ءبىر جىعىلىپ تۇرعانىمەن بۇل نوكداۋن ەمەس ەدى. 12- راۋندتا ابدەن شارشاعان بوكسشىلاردىڭ ايقاسى وسىلايشا نوكاۋتسىز اياقتالدى. تورەشىلەردىڭ شەشىمىمەن تارتىستى جەكپە- جەكتە كانەلو جەڭىسكە جەتتى ەسكە سالا كەتسەك، وسىدان تۋرا ءبىر جىل بۇرىن قوس بوكسشى لاس- ۆەگاستا كەزدەسۋ وتكىزىپ، تورەشىلەردىڭ شەشىمىمەن تەڭ تۇسكەن بولاتىن.
فوتو: hbo.com/boxing