ساۋد ارابياسى يزرايلدەن قارۋ ساتىپ الادى

استانا. قازاقپارات- ساۋد ارابياسىنىڭ ۇكىمەتى يزرايلدەن «تەمىر كۇمبەز» دەپ اتالاتىن زىمىرانداردان قورعايتىن جۇيەنىڭ بىرنەشە باتارەياسىن ساتىپ الاتىنىن جاريالادى. بۇل يەمەندەگى بۇلىكشى حۋسيتتەردىڭ ۇنەمى جاساپ جۇرگەن زىمىران شابۋىلدارىنان قورعانۋ ءۇشىن قاجەت بولسا كەرەك.

 وسىلايشا پارسى شىعاناعىنداعى ەڭ بەدەلدى ەلدەردىڭ ءبىرى العاش رەت ەۆرەي مەملەكەتىنەن قارۋ ساتىپ الماق. بۇل كۇتپەگەن جاڭالىق بولعانى راس. يزرايل بىرەگەي قارۋدى ساتقىسى كەلمەسە كەرەك. ءبىراق ا ق ش اكىمشىلىگى ونى بۇل رايىنان قايتارا بىلگەن. راسىندا ساۋد ارابياسى بۇرىندا دا يزرايلدىك تەحنولوگيالار مەن قۇرال- جابدىقتاردى وزگە ەلدەردەن قۇپيا تۇردە ساتىپ الىپ جۇرگەنى ءمالىم.

ەر- ريادتىڭ ەۆرەي مەملەكەتىنەن قارۋدى ساتىپ الاتىنىن جاريالاۋى بۇل ەلدىڭ سىرتقى ساياساتى كۇرت وزگەرگەنىن كورسەتىپ وتىر. ساۋد ارابياسى يەمەندە بىرنەشە جىل بويى بۇلىكشى حۋسيتتەرمەن سوعىسىپ ءجۇر. سوڭعى كەزدە ولار ارابيانىڭ ءىرى قالالارىن الىسقا ۇشاتىن يراندىق زىمىراندارمەن اتقىلايتىن بولعان. ەر- ريادتىڭ بۇعان قارسى قورعاناتىن قۇرالى جوق ەكەنى بەلگىلى. ال گازاداعى سوڭعى سوعىس كەزىندە «تەمىر كۇمبەز» پالەستيندىكتەر اتقان زىمىرانداردىڭ باسىم بولىگىن قاعىپ تۇسىرگەن بولاتىن.

 الەكساندر نەپومنياشي، ساياساتتانۋشى:

- يزرايلگە وسى ساۋدا- ساتتىقتان تۇسەتىن باس پايدا اقشا ەمەس. ۇزاق ۋاقىت قاس جاۋى سانالىپ كەلگەن ساۋد ارابياسىمەن وسىنداي سەزىمتال سالادا ىنتىماقتاستىق ورناتۋى بولىپ وتىر. جاعداي ەر- رياد پەن تەگەران اراسىندا ءىرى جانجال باستالعاننان كەيىن كۇرت وزگەردى. يران يەمەندەگى جاساقشىلاردى اشىق قولداپ ءجۇر. ولاردى قارۋمەن قامتاماسىز ەتىپ، نۇسقاۋشىلار دا جىبەرىپ وتىرادى.

بۇگىندە ساۋد ارابياسى ءۇشىن ەڭ ماڭىزدىسى ءوزىن يراننان قورعاي ءبىلۋ. اسىرەسە وسى تەكەتىرەستە تەگەراننىڭ العى شەبى سانالاتىن حۋسيتتەردەن ساقتانۋ باستى نازاردا. وسى ماقساتتا يزرايلمەن كەلىسىمگە بارۋ ەڭ تۋرا ءارى جەڭىل جول بولىپ وتىرعانى راس. قارۋدى ساتىپ الۋ تۋرالى كەلىسىم الداعى ايلاردا جۇزەگە اسىرىلماق. ال ءبىرىنشى باتارەيا ساۋد ارابياعا كەلەسى جىلدىڭ باسىندا جەتكىزىلەدى.

www.24.kz