اعىلشىن تىلىندەگى «اماناي مەن زاماناي» پوۆەسىنىڭ تۇساۋى كەسىلدى

كوكشەتاۋ. قازاقپارات - كوكشەتاۋدا مەملەكەتتىك سىيلىقتىڭ لاۋرەاتى، قازاقستاننىڭ حالىق جازۋشىسى ساكەن ءجۇنىسوۆتىڭ لوندوندا اعىلشىن تىلىنە اۋدارىلىپ، جارىققا شىققان «اماناي مەن زاماناي» پوۆەسىنىڭ تۇساۋكەسەرى ءوتتى، دەپ حابارلايدى قازاقپارات ءتىلشىسى.

وسىعان دەيىن قازاق ادەبيەتىنىڭ قايماقتارى مۇحتار اۋەزوۆ، ءابىش كەكىلبايەۆ، ورالحان بوكەيەۆتىڭ ەڭبەكتەرى اعىلشىن تىلىنە اۋدارىلسا، ەندى مىنە، ساكەن سەرى ءجۇنىسوۆتىڭ قالامىنان تۋعان تاماشا شىعارما تورتكۇل دۇنيەگە جول تارتىپ وتىر.

شاراعا اقمولا وبلىسىنىڭ اكىمى مالىك مىرزالين قاتىسىپ، ءسوز سويلەدى.

«ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسىندا قويىلعان مىندەتتەر ۇدەسىنەن شىعۋ ءۇشىن شارۋانى ساتىمەن ساباقتاپ جاتىرمىز. وسىنىڭ الدىندا اكادەميك- جازۋشى مالىك عابدۋلليننىڭ 11 تومدىعىن حالىقارالىق قازاق پەن- كلۋبى ارقىلى جارىققا شىعارعان ەدىك. بۇگىنگى قۋانىش سونىڭ ءساتتى جالعاسى»، - دەدى م. مىرزالين.

ساكەن سەرىنى اعىلشىن تىلىندە سويلەتۋگە زور ۇلەس قوسقان حالىقارالىق قازاق پەن- كلۋبىنىڭ پرەزيدەنتى بيگەلدى عابدۋللين ءوز سوزىندە اۋدارما ماسەلەسىنە توقتالدى. سونىمەن قاتار، ساكەن سەرى ارقىلى قازاق ادەبيەتىنىڭ كەسەك تۋىندىسىنىڭ كەمەل بەينەسىن جارتى الەمنىڭ جۇرتشىلىعى تانىپ بىلەتىندىگى دە ءسوز بولدى.

ساكەن سەرى ءجۇنىسوۆتىڭ «اماناي مەن زاماناي» پوۆەسىنىڭ قازاق پروزاسىنداعى ورنى ەرەكشە. تۋىندىدا جيىرماسىنشى عاسىردىڭ وتىزىنشى جىلدارىنداعى ەل ىشىندەگى احۋال، سول ءبىر «تار جول، تايعاق كەشۋ» زاماندا تۋعان توپىراعىنان ۇدەرە كوشكەن قالىڭ قازاقتىڭ زار- مۇڭى سيپاتتالعان. باسقا تۇسكەن تاعدىر تالكەگىنەن تورتكۇل دۇنيەگە تارىداي شاشىلعان بەيكۇنا ادامداردىڭ تۋعان جەرگە دەگەن سارىتاپ ساعىنىشى ءسوز بولادى.

ەسىمدەرى الەمگە ايگىلى سايمون گەيگان، سايمون حوللينگسۆورتا ءتارىزدى اۋدارماشىلار دا شىعارماعا ءوزىنىڭ وڭ باعاسىن بەرگەن.

اۆتور: اسلان وسپانوۆ