استانانىڭ جاڭا اكىمى جەتىسۋ جارمەڭكەسىنەن الما ساتىپ الدى

استانا. قازاقپارات - استانا قالاسىنىڭ جاڭا اكىمى باقىت سۇلتانوۆ پەن الماتى وبلىسىنىڭ اكىمى اماندىق باتالوۆ ەلورداداعى جەتىسۋ ءوڭىرىنىڭ اۋىلشارۋاشىلىق جارمەڭكەسىن ارالادى، دەپ حابارلايدى قازاقپارات ءتىلشىسى.

قالانىڭ جاڭا باسشىسىمەن جۇزدەسكەن استانا تۇرعىندارى وسىنداي ارزان جارمەڭكەلەردى كوپتەپ ۇيىمداستىرۋ قاجەتتىگىن جەتكىزدى.

اكىمدەر جەمىس- جيدەك، كوكونىس، ەت، ءسۇت ونىمدەرى قويىلعان سورەلەردى ارالادى جانە ونىمدەردىڭ ساپاسى مەن باعاسىن تەكسەردى. الماتىنىڭ تانىمال اپورتىن كورگەن باقىت سۇلتانوۆ ءاميانىن شىعارىپ، ءبىر پاكەت الما ساتىپ الدى.

سونداي- اق، جارمەڭكەدەن كوكونىس الىپ جۇرگەن شەنەۋنىكتەر اراسىندا پارلامەنت ءماجىلىسى ءتوراعاسىنىڭ ورىنباسارى ۆلاديمير بوجكو، ءماجىلىس دەپۋتاتى زاعيپا باليەۆا دا بار. ولار ب. سۇلتانوۆتى جاڭا قىزمەتىمەن قۇتتىقتادى. ءوز كەزەگىندە جاڭا اكىم ارىپتەستەرىنە ساتتىلىك تىلەدى جانە جىلى قوشتاسىپ، تاكسيگە ءمىنىپ كەتتى.

ايتا كەتەيىك، استاناداعى «قازاقستان» سپورت كەشەنى جانىندا الماتى وبلىسىنىڭ اۋىلشارۋاشىلىق ونىمدەرى ارزان باعامەن ساتىلۋدا. جالپى كولەمى 470 توننادان اساتىن جەتىسۋ ونىمدەرى ەلوردادا ەكى كۇن بويى ساۋدالانباق. ونداعى تاۋارلار نارىقتاعى باعادان % 10-25 دەيىن، كەي ونىمدەر ءتىپتى % 33 دەيىن ارزان ساتىلىپ جاتىر.

اۆتور: ايجان سەرىكجان قىزى