قىزىلوردادا جاس كاسىپكەر روبوتوتەحنيكا مەكتەبىن اشتى

None
None
قىزىلوردا. قازاقپارات - قىزىلوردادا جاس كاسىپكەر «Samruk-kazyna trust» روبوتوتەحنيكا مەكتەبىن اشتى، دەپ حابارلايدى قازاقپارات ءتىلشىسى.

سەرىكبول ەراليەۆ بۇل ءىسىن باستاماس بۇرىن قالاداعى قوسىمشا ءبىلىم بەرۋ وقۋ- ادىستەمەلىك ورتالىعىندا روبوتوتەحنيكا ۇيىرمەسىندە جەتەكشى بولىپ قىزمەت ەتكەن. ودان كەيىن ءوز ءىسىن اشۋعا تاۋەكەل ەتتى. روبوتوتەحنيكا مەكتەبىن اشۋعا 2,4 ميلليون تەڭگە جۇمساعان. ونىڭ ىشىندە 500 مىڭ تەڭگەسىن  الەۋمەتتىك جوبالاردى دامىتۋ قورىنىڭ تامىز ايىندا ۇيىمداستىرعان بايقاۋىندا جەڭىپ العان ەدى.

روبوتوتەحنيكا مەكتەبىنە جاسى 6-عا تولعان بالالاردان باستاپ كەز كەلگەن نيەت بىلدىرۋشىلەر قاتىسا الادى. مەكتەپ اقىلى نەگىزدە جۇرگىزىلەدى. ال مۇمكىندىگى شەكتەۋلى بالالارعا ساباقتار تەگىن وتكىزىلەدى. روبوتوتەحنيكا مەكتەبىنە قاتىسۋشىلار اپتاسىنا 4 ساعات وقيدى.

«مەكتەپتى اشۋعا تۇرتكى بولعان جايت قازىرگى زاماننىڭ تالابى. روبوتوتەحنيكا سالاسى وتە قارقىندى دامىپ كەلە جاتىر. مەكتەپكە قاجەتتى قۇرال- جابدىقتاردى ءار ەلدەن جيناقتادىق. ماسەلەن، كەي قۇرالدار دانيادان الدىرىلدى، ەندى ءبىرىن رەسەيدەن، قىتاي، الماتى، استانادان الدىق. مەكتەپتى اشقاننان كەيىن كەشەندى جاساعان ءجون. سوندىقتان دا ماتەريالدىق بازانىڭ تولىق بولۋىنا كوڭىل بولدىك»، - دەيدى س. ەراليەۆ.

 مۇنان وزگە، سەرىكبول ايىنا ءبىر رەت وسى مەكتەپتە وقيتىن بالالاردىڭ بارلىعىنىڭ باسىن قوسىپ، جالپى ءىس- شارا وتكىزۋدى قولعا الماق. ول تەحنيكامەن اۋەس بالالار مومىن، توماعا- تۇيىق كەلەتىنىن ايتادى. ال جالپى كوپشىلىك شارالار بالالاردىڭ مىنەزىن اشۋعا سەپتىگىن تيگىزەدى.

 ايتا كەتەيىك، مەكتەپتىڭ اشىلۋىنا وبلىستىق كاسىپكەرلەر پالاتاسى قولداۋ ءبىلدىردى.

اۆتور: ءادىلجان ۇمبەت

سوڭعى جاڭالىقتار