استانالىق كاسىپكەر گولوۆكينگە ەرەكشە سىي دايىندادى
«GGG» جازۋىمەن، ۇلتتىق ويۋمەن ناقىشتالعان ەتىكتى سامعاۋ ءبىر اي بويى دايىنداعان ەكەن. قولداۋىن سوزىمەن ەمەس، ىسىمەن كورسەتكەن سامعاۋ ءناسىپحانعا قازاقپارات ءتىلشىسى حابارلاسىپ، ەرەكشە سىي مەن ەتىكشىلىك ونەر تۋراسىندا اڭگىمە ءوربىتتى.
«جالپى، گەننادي گولوۆكين مەنى قاراپايىمدىلىعىمەن، بۇكىل جەتىستتىككە جەتكەن تولاعاي ەڭبەگىمەن، قايتپاس قايسارلىعىمەن، الدىندا قانداي ۇلكەن سىندار تۇرسا دا بۇلك ەتپەس سالقىنقاندىلىعىمەن تامساندىرادى. وسىدان كەيىن بوكسشىمىزعا قولداۋ بىلدىرۋگە نيەت بىلدىردىك. تىلەۋىن تىلەۋدىڭ ەكى جولى بار: ءبىرى ىشتەي ريزا بولىپ، گەنا باتىرىمىز جەڭسە دەپ تىلەسەك، ەكىنشىسى تىلەۋىڭ مەن قولداۋىڭدى ءىسىڭ ارقىلى ءبىلدىرۋ، بالكىم جانىندا ءجۇرىپ جاقسى ءسوز ايتۋ. ال ەندى ءبىز بوكسشىمىزدىڭ جانىندا جۇرمەسەك تە، ۇلتتىق ناقىشتاعى ەتىك جاساپ، ارتىندا ەلى بار ەكەندىگىن بىلدىرگىمىز كەلدى»، - دەيدى سامعاۋ ءناسىپحان.
ەتىكتىڭ سىرتى سيىردىڭ، ءىشى ەشكىنىڭ تەرىسىنەن تىگىلگەن. تابانى تۇگەلىمەن تەرىدەن، تازا ماتەريالمەن جاسالعان ەتىك ءبىر ايدىڭ ىشىندە دايىن بولىپتى. تابانىنداعى شەگەلەردىڭ ءبارى تولىعىمەن مىستان سوعىلعان.
«گەننادي گولوۆكينگە ەتىك تىگۋ ارقىلى دا ءوزىمىزدىڭ ۇلتتىق ءونىمىمىزدى دە ناسيحاتتاۋدى كوزدەدىك. قازىرگى زاماندا مەنىڭ ويىمشا، شىن ەڭبەككە بەت بۇرعان ادام ءوزىنىڭ جولىن تابادى. مەنىڭ ماقساتىم - شىنايى وتاندىق ءونىمدى قالىپتاستىرۋ»، - دەيدى ەتىكشى.
سامعاۋ ءناسىپحان شىن ومىردە گەنادي گولوۆكيندى كورمەگەنىن ايتادى. جەر شارىنىڭ ارعى بولىگىندە جۇرگەن بوكسشىعا بۇل سىيدى قالاي تابىستاۋ كەرەك؟ بايىپتى جاس كاسىپكەر ول جاعىن دا ەسەپتەپ وتىر ەكەن. ايلاپ تىگىلگەن ايرىقشا سىيدى ەبىن تاۋىپ تابىستارمىز دەيدى.
«گەننادي گولوۆكين بۇكىل قازاقستان جاستارىنا ۇلگى بولعاننان كەيىن ەتىك تىگەردە كلاسسيكالىق ۇلگىنى تاڭداپ الدىق. ۇستىڭگى جاعىن ۇلتتىق ۇلگىمەن، استىڭعى تۇسىن زامانعا ساي ەتىپ ازىرلەدىك. GGG ءارپىن ءاۋ باستا التىننان سوقساق دەپ ويلادىق تا، ماتەريالدىق جاعدايىمىز جەتپەدى. قازاقتىڭ التىن جىگىتى دەپ، التىننان سوقساق دەگەن نيەتىمىز بار ەدى. ءبىراق، سودان كەيىن جارقىراپ ەلدىڭ الدىندا جۇرگەننەن كەيىن اق بىلعارىمەن تىگۋدى ويلادىق»، - دەيدى ول.
جالپى، ەتىكشىلىك ەكىنىڭ ءبىرى قولىنان بارا بەرمەيتىن كاسىپ ەكەنى بەلگىلى. ەتىك تىگۋ اسقان شەبەرلىكتى، ەرىك- جىگەر مەن ىجداعاتتىلىقتى تالاپ ەتەدى. ەرتە زاماندا قازاقتىڭ ەتىكشىلەرى قاراپايىم قۇرالدارىمەن اياق كيىمدەردىڭ الۋان ءتۇرىن تىگەتىن بولعان. بۇرىنعىنىڭ ءىزىن جالعاعان سامعاۋ ۇلتتىق ەتىكشىلىك ونەرىنە وزىندىك ورنەگىمەن كەلىپ وتىر.
«ەۋروپادا 3-4 عاسىر بۇرىن اياقتارىنا نە كيەتىنىن بىلمەي جۇرگەن كەزدە قازاقتار تەرىدەن تىگىلەتىن ەتىكتىڭ ءتۇر- ءتۇرىن كيىپ جۇرگەن عوي. وكشەنىڭ قالاي قالىپتاسۋىن رەتتەي تىگۋ ءادىسى دەگەن ورتا ازياداعى اتا- بابالارىمىزدان قالىپتاسىپ كەلە جاتىر ەكەن. سەبەبى، ادام اتقا مىنگەن كەزدە وكشەسى ۇزەڭگىنى تىرەپ وتىرۋ كەرەك ەكەن. ەتىك ۇزەڭگىدەن ءوتىپ كەتسە، ادام وتە قاتەرلى جاعدايعا دۋشار بولعان. ەتىك تىگۋ ونەرى ادامداردىڭ اتتى قولعا ۇيرەتۋىنەن باستالعان عوي. جالپى، ەتىكشىلىك ونەرى ەرتەدەن ءبىزدىڭ حالىقتا اتادان بالاعا ميراس بولىپ كەلە جاتقان ونەر. ەتىكشىلىككە قازىر قازاقستاندا كوپتىڭ ۇيالاتىنداي كاسىپتىڭ ءتۇرى رەتىندە قارايتىنى جاسىرىن ەمەس. جوق! مەن مەن ەتىكشىلىكتىڭ تاڭداۋلى، قادىرلى دە قاستەرلى كاسىپ ەكەنىن كورسەتكىم كەلەدى»، - دەيدى سامعاۋ ءناسىپحان.
ەتىك تىگەر الدىندا جاس كاسىپكەر گولوۆكيننىڭ اياق كيىمىنىڭ ولشەمىن دە ءبىلىپ الىپتى. اقپاراتتىق قولداۋ ءبىلدىرىپ وتىرعان بەلگىلى بلوگەر وركەن كەنجەبەكتىڭ كوپ كومەگى تيگەنىن ايتادى.
«قازىرگى تاڭدا استانانىڭ ىرگەسىندە قاراوتكەلدە ۇلكەن سەح سالىپ جاتىرمىز. جوبانىڭ قۇنى شامامەن 30-40 ميلليون تەڭگە بولادى. وسى كۇزدە، بولماسا كوكتەمگە تاياۋ سەح اشىلادى. جالپى، ۇلكەن ماقساتىمىز - باسەكەگە قابىلەتتى وتاندىق ءونىمدى شىعارۋ جانە بالادان بالاعا ەرتەڭىن ويلايتىن ۇرپاقتان ۇرپاققا قالاتىن ۇلكەن كاسىپ قالدىرسام دەگەن نيەتتە بولاشاعىمىزدى ويلاپ جۇمىس جاساپ جاتىرمىز. شىن نيەتىمىز، العا قويعان ۇلكەن ميسسيامىز وسى. پايدا وزىمە دە، حالىققا دا تيسە دەيمىن. وسى ماقساتتا ۇلكەن سەحىمىزدىڭ قۇرىلىسىن جۇرگىزىپ جاتىرمىز»، - دەيدى سامعاۋ ءناسىپحان.
اۆتور: ايان بەكەن ۇلى