شىمكەنتتە دوللاردىڭ قىمباتتاۋىنا قارسى شارالار قولعا الىنا باستادى

 شىمكەنت. قازاقپارات - شىمكەنتتە دوللار باعامىنىڭ كوتەرىلۋىنە بايلانىستى باعانىڭ وسۋىنە جول بەرمەۋ شارالارى قولعا الىنا باستادى. بۇل تۋرالى قالا اكىمدىگىنىڭ رەسمي سايتىندا جاريا ەتىلدى، دەپ حابارلايدى قازاقپارات ءتىلشىسى.

اكىمدىكتىڭ حابارلاۋىنشا، جەكەلەگەن نارىق سۋبەكتىلەرى ءتۇرلى تاۋارلاردىڭ، سونىڭ ىشىندە وتاندىق ونىمدەردىڭ باعاسىن جاساندى تۇردە كوتەرۋ سياقتى وزگە دە ءتۇرلى الىپساتارلىق ارەكەتتەرى ورىن الۋى مۇمكىن. وسىنداي ارەكەتكە بارعاندارعا قاتىستى زاڭ اياسىندا ءتيىستى شارالار قولدانىلۋى مۇمكىن.

«قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 159-بابىنا سايكەس، بارلىق مونوپوليالىق كىرىستەردى (نەگىزسىز الىنعان تابىس) تاركىلەي وتىرىپ، كىرىستەردىڭ (تۇسىمدەردىڭ) %3 - دان %5 عا دەيىنگى مولشەرىندە اكىمشىلىك جاۋاپكەرشىلىك قاراستىرىلعان. كودەكستىڭ 90-2-بابىندا مونوپولياعا قارسى ورگاننىڭ مىندەتتەرىنىڭ ءبىرى مونوپولياعا قارسى زاڭنامانى بۇزۋدىڭ الدىن الۋ بولىپ تابىلاتىندىعى كورسەتىلگەن» ، دەلىنگەن حابارلامادا.

سونىمەن قاتار، اكىمدىك قىزمەتكەرلەرى قالا تۇرعىندارىنان باسقا نارىق سۋبەكتىلەرىنىڭ، سونداي- اق تاۋار باعاسىنىڭ ءوسۋ ورىن العان جاعدايدا اقپاراتتاردى ءتيىستى ورگاندارعا جولداۋ قاجەتتىگىن ەسكەرتتى.