كاسىپكەرلەر ءبىر-ءبىرىن نەگە «لاقتىرا» بەرەدى

استانا. قازاقپارات - بۇگىندە «اتامەكەن» پالاتاسىنا تۇسەتىن ارىزداردىڭ ىشىندە كاسىپكەرلەر اراسىنداعى داۋلارعا قاتىستى شاعىمدار از ەمەس.

ولار ءبىر-بىرىنە اقشا تولەمەيدى. ءتىپتى، سەرىكتەستىك كەلىسىمىن راسىمدەسە دە، الاياقتىق جولمەن ارىپتەستىڭ مۇلكىن ۇرلاۋ فاكتىلەرى دە بار، دەپ حابارلايدى قازاقپارات ءتىلشىسى.

ق ر جوعارعى سوتىنىڭ سۋدياسى اقىلتاي كاسيموۆتىڭ ايتۋىنشا، بيزنەس ارىپتەستەر كوپ جاعدايدا كەلىسىم شارتتارىنا جاۋاپسىز قارايدى. ال، ەڭ باستىسى، سول قۇجاتتىڭ ءاربىر ءبولىمى مەن تارماعى جان-جاقتى قارالمايدى. نەگىزگى ماسەلەلەر ءۇستىرت جازىلادى. سونىڭ ناتيجەسىندە ەكەۋىنىڭ بىرەۋى ءوز مىندەتىنەن جالتارىپ كەتەدى. ارتىنان سوتتا دا ونىڭ كىناسىن دالەلدەۋ قيىن.

«نەگىزى، الەمدىك تاجىريبە بويىنشا كەز كەلگەن كومپانيانىڭ زاڭ ءبولىمى كەلىسىمنىڭ ءاربىر تارماعىن زەرتتەپ، بۇگە-شۇگەسىنە دەيىن قاراپ شىعادى. ونداي كەلىسىم بويىنشا سوتتا شەشىم شىعارۋ دا جەڭىل. سەبەبى ءبارى انىق جازىلعان. كىنالى جاقتى انىقتايسىڭ دا، ۇكىمدى شىعاراسىڭ. ءبىراق بۇل جەردە الاياقتىق ارەكەتتى انىقتاۋ قيىن. ونداي ارەكەت ءۇشىن قىلمىستىق جازا قاراستىرىلعان. ماسەلەن، بيزنەسمەننىڭ ارىپتەسى اقشاسىن الىپ، كەلىسىمدى ورىنداماي، ول اقشانى باسقا جەرگە جىبەرسە، وندا بۇل الاياقتىققا جاتادى. دەگەنمەن، ونى دالەلدەۋ كەرەك. ال سەرىكتەس اقشانى العاننان كەيىن قارجى داعدارىسى نەمەسە باسقا دا جاعدايلار بولىپ قالادى. سوندا ول العان اقشاسىن كوبەيتۋ ءۇشىن باسقا بىرەۋمەن كەلىسىمگە وتىرۋى مۇمكىن. وسى كەزدە ءبىرىنشىسى ونى سوتقا بەرەدى. ءبىراق ونداي ىستەردى ازاماتتىق جولمەن قاراعان دۇرىس سياقتى»، - دەيدى ا. كاسيموۆ.

ساراپشى مامانداردىڭ سوزىنە قاراعاندا، وتاندىق كاسىپكەرلەر اراسىندا قۇقىقتىق نيگيليزم ءالى دە بار. سونىڭ سالدارىنان كەلىسىمشارتتار دۇرىس جاسالمايدى. ال بيزنەسمەندەردىڭ وزدەرى وسى ماسەلەگە ات ءۇستى قارايدى. وسىعان بايلانىستى «اتامەكەن» ۇ ك پ ارنايى بازانى ىسكە قوسۋدى جوسپارلاپ وتىر.

ول جەردە بارلىق كەلىسىمشارتتاردىڭ ۇلگىسىن تابۋعا بولادى. باسقارما ءتوراعاسىنىڭ ورىنباسارى رۋستام ءجۇرسىنوۆتىڭ ايتۋىنشا، اتالعان بازا كەلەسى اپتادا ىسكە قوسىلادى. «سايتتىڭ اتاۋى - «كەلىسىمشارتتاردىڭ كونسترۋكتورى». ول جەردە 500-دەن استام كەلىسىمشارتتىڭ ۇلگىسى بولادى. شاعىن جانە ورتا بيزنەستىڭ وكىلدەرى كەز كەلگەن قۇجاتتىڭ ۇلگىسىن تەگىن جۇكتەي الادى. وعان قوسا، كەلىسىمشارتتى ءوز ىڭعايىڭا قاراي جاساپ الۋعا مۇمكىندىك بار. ىشىندە ينسترۋكتسيالار دا بولادى»، - دەپ اتاپ كورسەتتى ر. ءجۇرسىنوۆ سىبايلاس جەمقورلىققا قارسى كۇرەس كەڭەسىنىڭ بۇگىنگى وتىرىسىندا.

ال قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل بولات پالىمبەتوۆتىڭ سوزىنە قاراعاندا، كاسىپكەرلەردىڭ كەلىسىمشارت مىندەتتەرىن ورىنداي الماۋىنا مەملەكەتتىك ورگاندار دا كىنالى. ولار اقشانى ۋاقىتىندا بەرمەيدى. سودان بيزنەسمەندەر ءوز ارىپتەستەرىنە اقشانى تولەي الماي جۇرەدى.

«ماسەلەن، بيزنەسمەن تەندەردى ۇتىپ الادى. ال مەملەكەتتىك ورگان وعان اقشانى تولەمەي قويدى. سودان بۇكىل تىزبەك كەتە بەرەدى. كاسىپكەر ءوز ارىپتەسىنە اقشا بەرە المايدى. سولاي ارى قاراي كەتەدى»، - دەيدى ب. پالىمبەتوۆ.

وسى ورايدا باسقارما ءتورعاسىنىڭ ورىنباسارى ر. ءجۇرسىنوۆ ماڭىزدى ءبىر ماسەلەنى ەسكە سالدى.

«بىزدە مەملەكەتتىك ورگانداردىڭ ءبىرىنشى باسشىسى اۋىسسا، بىردەن بارلىق كەلىسىمشارتتار جويىلادى. اكىم، مينيستر بولسىن، كەلىسىمشارتتاردى لەزدە بۇزا سالادى. وتە قىزىقتى ءۇردىس...»، - دەيدى ر. ءجۇرسىنوۆ.