قازاقستان تۇركيانىڭ ساياساتىن قولدايدى - نۇرسۇلتان نازاربايەۆ
«قازاقستان مەن تۇركيا ەجەلدەن ۇلى جىبەك جولىن توعىستىرىپ كەلە جاتقان ەلدەر. بۇل يگى ءىستى ودان ارى جالعاستىرۋىمىز قاجەت. بۇعان وراي تۇرىك ينۆەستورلارىن باكۋ- تيبيليسي- كارس تەمىر جولىمەن جالعاسقان اقتاۋ-قۇرىق كولىك-لوگيستيكالىق حابتارىن بەلسەندى دامىتۋعا ات سالىسۋعا شاقىرامىن»، - دەپ اتاپ ءوتتى مەملەكەت باسشىسى.
ەلباسى بۇل جولعا قاتىستى كوپتەن بەرى جۇمىس جۇرگىزىلگەنىن باسا ايتتى.
«جۇك تاسۋدىڭ، قارىم-قاتىناستىڭ جاڭا ءدالىزى ورنادى دەپ ساناۋعا بولادى. مۇنى پايدالانۋىمىز كەرەك. بۇگىنگى كەلىسسوزدەر بارىسىندا ءبىز ەلدەرىمىز اراسىنداعى ترانزيت-كولىكتىك، مۇناي-گاز، اسكەري تەحنيكالىق، اۋىل شارۋاشىلىعى، تۋريزم، مادەنيت، ءبىلىم، عىلىم، تەحنولوگيا سالالارىنداعى قاتىناستى تالقىلاعانىمىزدى باۋىرىم ەردوعان مىرزا ايتىپ كەتتى. اتالعان باعىتتاردى ودان ارى ىلگەرىلەتۋ ماقساتىمەن ىقپالداستىقتى ودان ارى دامىتۋعا ۋاعدالاستىق. جالپى قازاقستان مەن تۇركيانىڭ قارىم-قاتىناسىن بارلىق سالادا نىعايتۋ ءۇشىن مول مۇمكىندىكتەر بار. بارلىق سالادا، حالىقارالىق جاعدايدا، بارلىق جەردە دە قازاقستان تۇركيانىڭ ساياساتىن قولدايدى»، - دەدى نۇرسۇلتان نازاربايەۆ.
مەملەكەت باسشىسى تۇركيانىڭ قازاقستاننىڭ تاۋەلسىزدىك جىلدارىنىڭ ءبىرىنشى كۇنىنەن باستاپ قولداپ كەلە جاتقانىن دا اتاپ ءوتتى.
«ءبىز ونى ەشقاشان ۇمىتپايمىز. 1991-جىلى 16- جەلتوقساندا، ساعات 16 دا پارلامەنتىمىز قازاقستاندى تاۋەلسىز ەل دەپ جاريالادى. ەكى ساعاتتان كەيىن سول كەزدەگى تۇركيانىڭ پرەزيدەنتى مارقۇم تۇرعىت وزال مىرزا ماعان تەلەفون شالىپ: «تۇركيا مەملەكەتى قازاقستاننىڭ تاۋەلسىزدىگىن قولدايدى» دەپ ايتتى. بۇل ءبىزدى قولداعان دۇنيەدەگى ەڭ ءبىرىنشى مەملەكەت ەدى. سودان بەرى قولداپ كەلە جاتىر، سودان بەرى قارىم-قاتىناسىمىز ءبىر ۇزىلگەن ەمەس. سول ءۇشىن زور ريزاشىلعىمىزدى ەش ۋاقىتتا ۇمىتپايمىز. سودان بەرى قول جەتكىزگەن كوپ تابىستار، كوپ مۇمكىندىكتەر بار. وسى كەلىسسوزدەرىمىز ەكى ەلدىڭ دوستىعىنىڭ، بىرلىگىنىڭ جارقىن مىسالى بولىپ سانالادى. وسى جولمەن بارلىعىمىز ءجۇرۋىمىز كەرەك»، - دەدى قازاقستان پرەزيدەنتى.