قازاق پەن تۇرىك حالقىنىڭ دوستىعىن تەرەڭدەتۋ باستى ماقساتىمىز - ەلباسى
كەشە تۇركيا پرەزيدەنتى رەجەپ تايپ ەردوعانمەن كەلىسسوزدەردەن كەيىنگى بىرلەسكەن مالىمدەمە بارىسىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.
«ەكى حالىقتىڭ، قازاق پەن تۇرىك حالقىنىڭ دوستىعىن، بايلانىسىن تەرەڭدەتۋ ءبىزدىڭ باستى ماقساتىمىز. ساۋدا-ەكونوميكالىق جانە ينۆەستيتسيالىق قاتىناستاردى تالقىلاپ، ءبىرقاتار ۋاعدالاستىققا قول جەتكىزدىك. ونى قول قويعان قۇجاتتاردان كوردىڭىزدەر. قازاقستاندا كوپتەگەن تۇرىك كومپانيالارى تابىستى جۇمىس ىستەيدى. قازىر ەلىمىزدە تۇرىك كاپيتالىنىڭ قاتىسۋىمەن قۇرىلعان 1800 دەن استام كاسىپورىن جۇمىس ىستەپ تۇر. تاۋار اينالىمىنىڭ كولەمى وتكەن جىلى 2 ميلليارد دوللارعا جاقىن بولدى. بۇل كورسەتكىشتى بۇگىن ءبىزدىڭ كەلىسكەنىمىز بويىنشا جاقىن ارادا 5 ميلليارد دوللارعا، كەلەشەكتە 10 ميلليارد دوللارعا جەتكىزۋ جونىندە الدىمىزعا ماقسات قويدىق»، - دەدى ەلباسى.
نۇرسۇلتان نازاربايەۆ ەكى ەلدىڭ ۇكىمەتى وسى سالادا جۇمىس ىستەيتىندىگىن باسا ايتتى.
«بىلتىر رەجەپ تاييپ ەردوعان مىرزانىڭ استاناعا رەسمي ساپارى بارىسىندا «جاڭا سينەرگيا» اتتى بىرلەسكەن ەكونوميكالىق باعدارلامانى جۇزەگە اسىرۋدىڭ 2017-2020-جىلدارعا ارنالعان ءىس-شارالار جوسپارىنىڭ حاتتاماسىنا قول قويعانبىز. وسى قۇجاتقا سايكەس ورىندالىپ جاتقان نەمەسە جوسپارلانعان 24 ينۆەستيتسيالىق جوبا بار. اتالعان جوبالاردىڭ جالپى قۇنى 8 ميلليارد دوللاردان اسادى»، - دەدى مەملەكەت باسشىسى.
قازاقستان پرەزيدەنتى بۇگىن تۇرىك كومپانيالارىنىڭ باسشىلارىمەن كەزدەسكەنىن، ولارمەن ساۋدا-ينۆەستيتسيالىق ىنتىماقتاستىعىنىڭ جاي-كۇيى مەن پەرسپەكتيۆاسى جونىندە پىكىر الماسقانىن باسا ايتتى.
«كوپ بيزنەس باسشىلارمەن مەن ءوزىم جەكە كەزدەسىپ، ولاردىڭ وي-پىكىرلەرىن تىڭدادىم. جالپى ەكى ەلدىڭ ءبىر-بىرىنە ينۆەستيتسيا سالۋعا، ىنتىماقتاسا جۇمىس ىستەۋگە ىنتالى ەكەنىن كوردىم. ساپارىم بارىسىندا قۇنى 2 ميلليارد دوللارعا جاقىن بولاتىن كوممەرتسيالىق جوبالارعا قاتىستى كەلىسىمدەرگە ءىس ادامدارى قول قويدى. الداعى ۋاقىتتا وسى ۋاعدالاستىقتى بىرلەسە جۇزەگە اسىرۋ ءۇشىن كۇش جۇمىلدىرۋىمىز كەرەك»، - دەدى نۇرسۇلتان نازاربايەۆ.