ەردوعان قازاقستان پرەزيدەنتىن «تۇركى الەمىنىڭ اقساقالى» دەپ اتادى

انكارا. قازاقپارات - كەشە انكاراعا رەسمي ساپارمەن كەلگەن ق ر پرەزيدەنتى نۇرسۇلتان نازاربايەۆپەن كەلىسسوزدەردەن كەيىنگى بىرلەسكەن مالىمدەمە بارىسىندا تۇركيا پرەزيدەنتى رەجەپ تايپ ەردوعان ەلباسىن «تۇركى الەمىنىڭ اقساقالى» دەپ اتادى، دەپ حابارلايدى قازاقپارات ءتىلشىسى.

«تۇركيا-قازاقستان جوعارى دەڭگەيلى ىنتىماقتاستىق كەڭەسىنىڭ ءۇشىنشى جينالىسى اياسىندا باس قوسىپ وتىرمىز. قازاقستان پرەزيدەنتى قۇرمەتتى نۇرسۇلتان نازاربايەۆ باستاعان دەلەگاتسيانى قوناق قىلعانىما ريزامىن. تۇركى الەمىنىڭ اقساقالىنا تاعى ءبىر مارتە قوش كەلدىڭىز دەيمىن. 2015-جىلى قازاقستاندا باستالعان جوعارى دەڭگەيلى ىنتىماقتاستىق كەڭەسىنىڭ ءۇشىنشى جيىنىن انكارادا وتكىزدىك. سوڭعى رەت 3- قىركۇيەكتە قىرعىزستاندا وتكەن تۇركى تىلدەس مەملەكەتتەر ىنتىماقتاستىق كەڭەسىنىڭ VI سامميتى بارىسىندا باس قوسقان ەدىك»، دەپ ەسكە الدى تۇركيا پرەزيدەنتى.

سونىمەن قاتار رەجەپ ەردوعان قازاقستان پرەزيدەنتىمەن جەكە جانە دەلەگاتسيالارمەن كەزدەسۋ بارىسىندا ەكىجاقتى، كۇن تارتىبىندە تۇرعان بارلىق ماسەلەلەر شىنايى تالقىلانعانىن باسا ايتتى.

«وتە اۋقىمدى ءارى ءتيىمدى كەزدەسۋ ءوتتى. وسى ساپار اياسىندا ەلدەرىمىزدىڭ اراسىندا ءبىرقاتار قۇجاتقا قول قويىلدى. جاڭا عانا بەس كەلىسىمنىڭ قول قويۋ ءراسىمىن اياقتادىق. كەشە انكارادا وتكەن ينۆەستيتسيالىق فورۋم اياسىندا جالپى سوماسى شامامەن 2 ميلليارد دوللاردان اساتىن 20 دان استام قۇجاتقا ەكى ەلدىڭ جاۋاپتى مەكەمەلەرى مەن جەكە مەنشىك سەكتور كومپانيالارىنىڭ وكىلدەرى قول قويدى... اتاجۇرتىمىز قازاقستاننان كەلىپ، ءبىزدى قۋانتىپ وتىرعان قۇرمەتتى پرەزيدەنت نازاربايەۆقا جانە دەلەگاتسياسىنا العىسىمدى بىلدىرەمىن. تەرەڭ دە تامىرلى تاريحىمىزدان ءنار العان تۇركيا مەن قازاقستان قارىم-قاتىناسىنىڭ بولاشاقتا ودان سايىن نىعايىپ، داميتىنىنا سەنەمىن»، - دەدى ول.

ايتا كەتەيىك، وسىعان دەيىن ەلباسى نۇرسۇلتان نازاربايەۆ پەن تۇركيا پرەزيدەنتى رەجەپ تايپ ەردوعان اراسىنداعى كەلىسسوزدەردەن كەيىن ەكى ەلدىڭ اراسىندا ءبىرقاتار قۇجاتقا قول قويىلعاندىعىن حابارلاعانبىز.