نۇرسۇلتان نازاربايەۆ پەن رەجەپ تايپ ەردوعان نە جايىندا سويلەستى؟

None
None
انكارا. قازاقپارات - حالىقارالىق پروبلەمالارعا بايلانىستى استانا مەن انكارا ءبىر-بىرىمەن اشىق پىكىر الماسىپ، كەڭەسە الادى.

بۇل تۋرالى بۇگىن تۇركيا پرەزيدەنتى رەجەپ تايپ ەردوعانمەن كەلىسسوزدەردەن كەيىنگى بىرلەسكەن مالىمدەمە بارىسىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.

«بۇگىن تۇركيا پرەزيدەنتىمەن ارامىزدا مازمۇندى ءارى ناتيجەلى كەلىسسوزدەر بولدى. بۇل كەزدەسۋ وسى زاماننىڭ وزەكتى ماسەلەلەرى جونىندە وي-پىكىر الماسۋعا مۇمكىندىك بەردى. جالپى حالىقارالىق پروبلەمالارعا بايلانىستى استانا مەن انكارا ءبىر-بىرىمەن اشىق پىكىر الماسىپ، كەڭەسە الاتىنىن تاعى دا ءبىر اتاپ وتكىم كەلەدى. كۇن تارتىبىندەگى ايماقتىق جانە جاھاندىق ماسەلەلەر بويىنشا ءبىزدىڭ ۇستانىمدارىمىز ۇقساس. سونىڭ ارقاسىندا ەلدەرىمىز كوپجاقتى حالىقارالىق باسقوسۋلاردا تىعىز ىقپالداستىق ورناتىپ كەلەدى»، - دەدى نۇرسۇلتان نازاربايەۆ.

قازاقستان پرەزيدەنتى وسى ساپارى اياسىندا وتكەن تۇركيا-قازاقستان جوعارى دەڭگەيلى ستراتەگيالىق ىنتىماقتاستىق كەڭەسىنىڭ ءۇشىنشى وتىرىسىندا ەكىجاقتى ءىس-قيمىلدار جان-جاقتى تالقىلاعانىن باسا ايتتى.

«ونىڭ ناتيجەلەرى ەكى ەلدىڭ قارىم-قاتىناستارىن ودان ارى جانداندىرادى دەپ سەنەمىن. قازاق-تۇرىك ساياسي ديالوگىنىڭ اياسى كەڭەيىپ كەلەدى. بۇل باعىتتا ءوزارا ساپار الماسىپ، ءجيى كەزدەسىپ تۇرۋعا كەلىستىك. مۇنىڭ الدىندا وزدەرىڭىز بىلەسىزدەر، قىرعىزستاندا وتكەن تۇرىك كەڭەسى جينالىسىندا بارلىق باۋىرلار باس قوسىپ، كوپ ماسەلەلەردى تالقىلادىق. ءوز زامانىندا مەنىڭ ۇسىنىسىممەن وسى كەڭەس قۇرىلعان ەدى. قازىرگى جاعدايدا تۇركى تەكتەس ەلدەردىڭ بارلىعىنا ەلدىڭ ىشىندەگى جاعدايلارىن تۇزەپ، بىزبەن باۋىرلاس بولىپ جۇمىس ىستەۋگە ىڭعايلانا تۇسكەندىگى قۋانتادى. ەندى مەنى «تۇركى الەمىنىڭ اقساقالى» دەپ ايتقاننان كەيىن ونداي كەزدەسۋلەر، ارينە، قۋانتادى»، - دەپ اتاپ ءوتتى مەملەكەت باسشىسى.

 

سوڭعى جاڭالىقتار