الداعى ءۇش جىلدا زەينەتاقىنىڭ ورتاشا مولشەرى قانداي بولادى؟
ءمينيستردىڭ مىندەتىن اتقارۋشى بەرىك شولپانقۇلوۆتىڭ ايتۋىنشا، ءۇش جىلدا الەۋمەتتىك سالاعا 15,4 تريلليون تەڭگە بولىنەدى. اتالعان شىعىستاردىڭ باسىم بولىگى - الەۋمەتتىك كومەك قارجىسى.
«جالپى، ءۇش جىل ىشىندە الەۋمەتتىك قامسىزداندىرۋعا 9,5 تريلليون تەڭگە بولىنەدى. سونىڭ ىشىندە 2019-جىلعا 3 تريلليون تەڭگە جوسپارلانعان. بۇنىڭ بارلىعى - الەۋمەتتىك تولەمدەر. ول اقشاعا زەينەتاقى مەن جاردەماقى تولەنەدى. سونىڭ ناتيجەسىندە كەلەسى جىلى زەينەتاقىنىڭ مينيمالدى مولشەرى 36108 تەڭگە، ال بازالىق زەينەتاقىنىڭ ورتاشا كولەمى 27732 تەڭگە بولادى. وسىلايشا، 2019-جىلدىڭ 1- قاڭتارىنان باستاپ رەسپۋبليكا بويىنشا زەنەتاقىنىڭ ورتاشا كولەمى 87243 تەڭگەگە دەيىن وسەدى. ول 5728 تەڭگەگە ارتىق» - دەدى ب. شولپانقۇلوۆ پارلامەنت ماجىلىسىندە.
ايتا كەتەيىك، بۇگىنگى وتىرىستا ق ر ۇلتتىق ەكونوميكا ءمينيسترى تيمۋر سۇلەيمەنوۆ دەپۋتاتتارعا 2019-2023-جىلدارعا ارنالعان ەكونوميكالىق دامۋ بولجامىن دا تانىستىردى.
«2019-جىلى مۇناي باعاسىنىڭ ءبىر باررەلى 66,7 ا ق ش دوللارىن قۇرايدى دەگەن بولجام بار. وسىنى ەسكەرە وتىرىپ، بازالىق سەناريدە مۇنايدىڭ باعاسى 60 ا ق ش دوللارى دەڭگەيىندە الىندى. 2019-جىلى جالپى ىشكى ءونىم 3,9 پروتسەنت دەڭگەيىندە، ال 2023-جىلى 4,6 پروتسەنتكە دەيىن وسەدى. اتالعان كەزەڭدە جالپى ىشكى ءونىمنىڭ ورتاشا جىلدىق ءوسۋ قارقىنى 4,2 پروتسەنت بولادى دەگەن بولجام بار»، - دەيدى ت. سۇلەيمەنوۆ.
ونىڭ ايتۋىنشا، كەلەسى جىلى نومينالدى جالپى ىشكى ءونىم 64,1 تريلليون تەڭگە بولسا، 2023-جىلعا دەيىن اتالعان كورسەتكىش 86,9 تريلليون تەڭگەگە دەيىن وسەدى. وسىلايشا، جان باسىنا شاققانداعى جالپى ىشكى ءونىم 9,9 مىڭ ا ق ش دوللارىنان 12,9 مىڭ دوللارعا دەيىن ۇلعايادى.
«ورتا مەرزىمدى پەرسپەكتيۆادا ءونىم وڭدەۋ، اگروونەركاسىپ، قۇرىلىس، كولىك-لوگيستيكا جانە قىزمەت سالاسى ەكونوميكالىق ءوسىمنىڭ نەگىزگى قوزعاۋشى كۇشى بولادى. مۇناي ءوندىرۋ كولەمى 99 ميلليون تونناعا دەيىن وسەدى. ەكسپورت كولەمى 56,5 ميلليارد ا ق ش دوللارىنان 68,5 ميلليارد دوللارعا دەيىن ارتادى. ال يمپورت 41,9 ميلليارد ا ق ش دوللارىنا دەيىن ۇلعايادى. ۇلتتىق بانك ينفلياتسيانىڭ جىلدىق كورسەتكىشىن 2019-جىلى 4-6 پروتسەنت دەڭگەيىندە ساقتايدى. 2020-2023-جىلى ول 3-4 پروتسەنتكە دەيىن تومەندەيدى»، - دەپ اتاپ كورسەتتى ت. سۇلەيمەنوۆ.